¹ E yi na taɖo ɔ, mí ɖo a lé ŋkuvi sɛnŋṣɛnŋɖe do enyɔ ciwo yi wo nu yí mí se nu nɔ mí ŋgbe va tran so wowo 'mɔ ji go. ² Eŋɛ ci yi dɔlawo va do nɔ jukɔn lɔ ɖo kankandoji. Amɛ ciwo yi de xɔ eŋɛ lɔ go yí gbé wawa do ji ɔ Mawu dɔn eto nɔ wo shigbe lehanci yi e je do nɛnɛ. ³ Ci yi e le nɛnɛ han, ɖee, Mawu a sɛ́n eŋ gbé etomadɔnmadɔn nɔ mi nɔ mi gbali hwlɛngan gangan hɔn nuxu ciwo yi é xo mi ba! Axwetɔ ŋtɔ yí do eŋɛ lɔ doŋko yi amɛ ciwo yí se yi Axwetɔ le enyɔ lɔwo nunɔ, nu nɔ mi be nyɔnɔnui yi enyɔ lɔwo nyi. ⁴ Mawu cán ɖoɖoɔ ekpe i ji zeɖeka be wowo kunuɖeɖe wo nyi nyɔnɔnui yí wawa jeshidonu, enudanŋdo kodo enujiŋ vovovowo sɔto wo ji. E gbe na Gbɔngbɔn kɔkɔɛ́ nuwó wo ɖeka ɖeka shigbe lehanci yi e droui do nɛnɛ yí sɔ ɖó ekpe wowo kunuɖeɖe lɔwo ji. ⁵ Mawu de sɔ xexe ci yi gbɔgbɔ lɔ, xexe ci yi nuxu mi xoxoɔ lɔ doashi nɔ dɔlawo nɔ wo a kplɔɛ go. ⁶ Vɔ ɔ, le Mawu 'nyɔ wema ɖeka mɛ ɔ, amɛɖeka ɖe kunu cɛ be: «Mawu, nyí yí agbetɔ nyi yí è ɖoɖo eŋui yí nɛnɛ ɔ? ⁷ E na yi e va hwe le hwe le dɔlawo 'gbɔ sɔnanɔ hwenu kleŋ ɖeka, yi sɔɛ dado bubu kodo kɔkɔ texu. ⁸ E sɔ enuwo pleŋ do yi 'cɛkpakpa gɔnmɛ.» Nɔ Mawu sɔ enuwo pleŋ do yi 'cɛkpakpa gɔnmɛ ɔ, i gɔnmɛ yi nyi kpɔ be enuɖe de li yí d'é gbe Masɔ do yi 'cɛkpakpa gɔnmɛ go. Gankegan ecɛyɛ ɔ, mi de kpɔkpɔ enu lɔwo pleŋ le agbetɔ lɔ 'cɛkpakpa gɔnmɛ vɛ hɔɖe go. ⁹ Vɔ ɔ, enu ci nu mi le ŋkuvi do yi nyi kpɔ be: Mawu na yi Yesu va hwe le yi dɔlawo gbɔ́ sɔnanɔ hwenu keŋ ɖeka, nɔ sɔso xomɛvunu Mawu tɔ mɛ ɔ, a ku nɔ́ a do agbetɔwo pleŋ ji. Ecɛviɛ ɔ, Mawu sɔɛ dado bubu kodo kɔkɔkɔ texu. Ɖo ɔ, e se gbazavi. ¹⁰ Ɖo Mawu ci yí wa xexe lɔ yi le enushanu do ete le mɛ ji be ye a kplɔ evi sugbɔ va ye klɛnklɛn gangan lɔ mɛ. e yi na taɖo yi é lɔn yi Yesu to efunkpekpewo mɛ yi a kplɔwo vayi klɛnklɛn hɔn lɔ mɛ. Ɖo Yesu yi nyi wowo hwlɛngantɔ. ¹¹ Ɖo ɔ, Yesu ci yi klɔnɔ enuvɔnwo sɔi le amɛvo nu kodo amɛ ciwo nu wo klɔklɔ enuvɔnwo so, bɔ yi ɖo Eda ɖeka. Ci yi e le nɛnɛ han ɔ, d'e wanɔ ŋkpɛn nɔ Yesu be a yɔ wo be yenɔviyewo go. ¹² Ɖo ɔ, é nunɔ bé: «Mawu na xo nuxu sɔso eo nu nɔ nɔvinyɛwo, Nakanfu eo le Mawu 'ha lɔ ŋmɛ.» ¹³ e gbe nu be: «Na kando Mawu ji.» E gbe nu hɛnnɛ be: «enyɛ gé, enyɛ kodo evi ciwo yi Mawu na ŋ.» ¹⁴ Ci yi ɖevi hɔn lɔwo nyi agbetɔwo yi ehun le wo mɛ yi lankpu le wo nu ɔ Yesu ŋtɔ can va trɔ agbetɔ yí nɔ agbe shigbe wowo nɛnɛ. Nɛnɛ han yi é wɛɛdo nɛ yi sɔ to yi 'ku mɛ ɔ, é wu ete nɔ Legba ci 'lɔ mɛ eku ŋsɛn le sasa ¹⁵ yí hwlɛn amɛ ciwo yi vɔnvɔn nɔ eku sasa kaka va trɔyi hwashiwo gan le wowo 'gbe ŋkekewo pleŋ mɛ. ¹⁶ Ɖo ɔ d'e nyi dɔlawo nu yí é va kpedo go; vɔ ɔ, Ablahamu jijimɛviwo nu yi e va kpedo. ¹⁷ Ci yí é le nɛnɛ han ɔ, Yesu ɖo a ci shigbe be nɔviɛ agbetɔwo nɛnɛ le enu wo pleŋ mɛ. Nɛnɛ ɔ, a sɛn eŋ trɔ avɔsatɔ gangantɔ ŋshishikunɔamɛtɔ kodo egbejinɔtɔ ɖeka ci yí a sa avɔ nɔ Mawu nɔ jukɔn lɔ 'nuvɔnwosɔsɔke. ¹⁸ Ecɛviɛ ɔ, a sɛn eŋ kpedo amɛ ciwo yí je tetekpɔwo mɛ nu. Ɖo ɔ, yiŋtɔ too tetekpɔwo kodo efunkpekpewo mɛ yí ɖu wo ji.