¹ Sasa vayi ɔ, Mawu xo nuxu zenɛniɖe sɔso yi 'ŋɛdotɔwo ji be míwo tɔgbuiwo sɔso alɔkpa sugbɔ ji. ² Vɔ ecɛyɛ le ŋkeke cɛ ciwo yi nyi ŋkeke vɔvɔ kpɛtɛkpɛtɛwo mɛ ɔ, é xo nuxu nɔ mí sɔso Eviɛ ji. E yi lɔ yi é doŋkɔ yi can daɖɛ yi sɔ enuwo pleŋ jo nii mavɔmavɔ, ³ Evi lɔ mɛ yi Mawu klɛnklɛn dadaezo le yi Mawu nɔnɔmɛ pɛpɛ le shi. E lé enushanu do ete sɔso yí nuxu ŋsɛntɔ lɔwo mɛ. Ci yí e klɔ enuvɔwo sɔi le agbetɔwo nu ɖegbɔ ɔ, e yi nɔ anyinɔnɔ do ɖushimɛ nɔ Mawu, ŋsɛntɔ gangantɔ lɔ, le jeŋkushi mɛ. ⁴ Mawu Eviɛ lɔ wu egan akplɔtɔwo. E yi na daɖo yí Mawu sɔ nyikɔ ci yí wu egan Mawudɔlawotɔ sɔ jo nii. ⁵ Ɖo ɔ, Mawu de nunɔ yi dɔla ɖe gbeɖe go be: « E nyi Evinyɛ, ŋ ji Eo egbɛ.» D'é nu sɔso dɔla ɖe nu gbeɖe go be: «Na nyi Eda nɔ yi na nyi Evi nɔ ŋ.» ⁶ Vɔ gacimɛ yi Mawu le egbesɔsɔ vɔ yí a dɔ Eviɛ ŋkɔtɔ jiji lɔ ɖaɖa xexe lɔ mɛ ɔ, enu bé: «Mawu 'dɔlawo pleŋ le doŋdo nii!» ⁷ Mawu nu sɔso dɔla wowo nu be: E sɔ yí dɔlawo wanɔ shigbe jihɔn han nɛnɛ yi sɔ 'dɔwaviwo sɔ wanɔ edɔ shigbe ezoɖe hanwo nɛnɛ.» ⁸ Vɔ sɔso Eviɛ lɔ nu ɔ, e nu be: «Mawu yi e nyi; ao 'fiɔɖuɖu li tɛgbɛɛ. Enujɔjɔwawa yi nyi alɔnuci ci yi e sɔ kplɔnɔ ao jukɔn. ⁹ E lɔn enujɔjɔɛwawa, yi d'é lɔn enudɔndɔnwawa 'nyɔ gbo go. Eyi na taɖo yi Mawu, ao Mawu, ɖe eo do akpo yi shi jijɔ 'mi do eta nɔ eo, sɔwu ao kpenawo.» ¹⁰ E gbe nu hɛnnɛ bé: « Axwetɔ yi ɖo nyigban lɔ anyinɔnɔ so gɔnmɛjeje ɖii yí jeŋkushi nyi ao 'lɔnudɔwawa. ¹¹ Enu hɔnwo pleŋ d'a gbe va li go. Vɔ eo yɛ ɔ, a kpɔtɔ yi a li tɛgbɛɛ. Wo a va xlɔ shigbe lehanci yi awu xlɔnɔ do nɛnɛ, wo a ɖɔ eli wo Shigbe enudodowo nɛnɛ. vɔ eo yɛ eo a kpɔtɔ a le nɛnɛ han tɛgbɛɛ yi ao 'gbe d'a ɖó sɛnxu go.» ¹² A va ŋwla wo shigbe enudodowo nɛnɛ. Vɔ eo yɛ ɔ, eo a kpɔtɔ a le nɛnɛ han tɛgbɛɛ yi ao 'gbe d'a ɖo sɛnxu go.» ¹³ Mawu de nu nɔ yi 'dɔlawo domɛtɔ ɖe kpɔ o be: «va nɔ anyinɔnɔ do nyaŋ ɖushimɛ, nɔ ma sɔ ao ketɔwo wa afɔɖejinuwo nɔ eo.» ¹⁴ D'e nyi gbɔngbɔnwo yi dɔlawo nyi yi le edɔ waa nɔ Mawu yi e dɔnɔ wo ɖaɖa nɔ nɔ wo a vayi kpedo amɛ ciwo yi a hwlɛn gan nu ba?