¹ Agbetɔwo mɛ yí wo canɔ avɔsatɔ gangantɔ lɔ ɖekpokpoi le yí ɖoini anyinɔnɔ nɔ́ a sɔ agbetɔwo 'fɔ ɖo ete le Mawu gbɔ. Edɔ ci yí é ɖo a wa yí nyí kpɔ́ bé yí a nanɔ enuwo Mawu yí a gbe sanɔ avɔwo nɔ́ Mawu dó eta nɔ enuvɔ ciwo yi agbetɔwo wanɔ. ² Ci yí ehɛnwo le avɔsatɔ, gangantɔ ŋtɔ nú hɛnnɛ ɔ, á sɛn eŋ se enu gɔnmɛ nɔ amɛmanyaɖewo kodo enumanyɔ manyɔ watɔwo. ³ Ehɛn hɔnwo ŋci ɔ, d'é nyí jukɔn lɔ enuvɔnwo ɖekɛ yí á sanɔ avɔ do eta nɔ yiŋtɔ 'nuvɔnwo hɛnne. ⁴ Amɛdekpokpoi d'a sɛn eŋ sɔ́ nunu ci yí le avɔsatɔ gangantɔ lɔ ŋu ná yiɖeki go. Nɔ́ Mawu yɔ́ amɛ yí sɔ amɛ ɖoi ɔ, é yí wo trɔnɔ avɔsatɔ gangan shigbe lehanci yí é yɔ ahalɔn yí sɔ́ ɖoi do nɛnɛ. ⁵ Nɛnɛ hanke yí Kliso lɔ de sɔ́ bubu ci yí le avɔsatɔ gangantɔ lɔ nú ná yiɖeki go do nɛ. Vɔ ɔ, Mawu yí sɔ́ɛ nii yí nú so nu bé: «É nyi Evinyɛ, ŋ ji Eo egbɛ.» ⁶ Eyi le afi buwo ɔ, wo gbe nu hɛnnɛ bé: «Avɔsatɔ gangantɔ lɔ yí é nyi sɔyi mavɔmavɔ. Sɔ zɔndo Mɛlukisedɛki ɖoɖo ji.» ⁷ Hwecinu yi Yesu le nyigban cɛ ji ɔ, é nyá bé Mawu ɖó ŋsɛn yí a hwlɛn eye gan le eku shi. Nɛnɛ ɔ, é wanɔ gbedoɖa nii yí ɖenɔ kuku nii, axwa kodo ɖashi le ŋmɛ. Eyi mawu wanɔ do ji nii nɔ́ ci yí yesu buini sugbɔ ŋci. ⁸ Ci yí é nyi Mawu Eviɛ can ɔ, é kplán lehanci yí wo a se etonu nɔ mawu dó le vevi ciwo yi é se mɛ. ⁹ Ci yí Mawu ɖe egbɔ nɔ enu ci yí e drɔ dó ete to jí vɛ ɔ, Yesu lɔ vá trɔ́ hwlɛngan mavɔ jɔxu nɔ́ amɛ ciwo pleŋ yí senɔ eto nu nii. ¹⁰ Ɖó Mawu sɔ́ ɖó avɔsatɔ gangantɔ lɔ sɔ́ zɔndo Mɛlukisedɛki ɖodo ji. ¹¹ Enyɔ sugbɔ le mì shi yí mì a nú mí so enyɔta cɛ nu. Vɔ ɔ, enyɔ wo wo nyí yí wowo mɛ ɖeɖe nɔ mí a gbɔn enu. Ɖó mí trɔ́ amɛ ciwo yí de sɛ́n eŋ senɔ enu gɔnmɛ kaba go. ¹² Azan ci yí mí wa le Mawu 'nyɔwo sese mɛ yɛ sun be mí a nyí cicawo nɔ amɛwo sasa yɛ́ drú. Gankegan kpɔ́ mí de senɔ wo nyuiɖe go. É yí ná taɖo yí mí gbe ʒian bé wo a gbe kplankplan mí afɔɖeɖe ŋkɔtɔwo le Mawu 'nyɔ mɛ. Ci yí mí ɖo a nyí mɛganxoxuwo le xɔse mɛ yí a ʒián enuɖuɖu sɛnŋsɛnŋwo sasa ɔ, mí gbe le shigbe ɖeviwo nɛnɛ yí é nyi avɔshi yí wo a gbe kpɔtɔ a nana mí. ¹³ Amɛ ɖekpokpoi ci yí a kpɔtɔ a le anɔ nɔɔgɔ ɔ, ɖevi yí é kpɔtɔ nyi tɛgbɛɛ yí d'a sɛ́n eŋ jeshi enujɔjɔɛ ɖɛ le Mawu ŋmɛ go. ¹⁴ Vɔ ɔ, mɛganxoxuwo yí ɖunɔ enu sɛnŋsɛnŋwo. Eyi sɔ́ to enu enu sugbɔ ciwo mɛ yí wo tó kpɔ́ ɔ, wo zán wowo susuwo yí sɔ́ jeshi enunyui le enu manyɔmanyɔ gbɔ kaka e ma do wo dó nɛnɛ han ji.