¹ Nɔ́ mì a va yí dɔ taɖo yí kliso lɔ cú eka nɔ mì dó. Ci yí é le nɛnɛɔ, mí li eke geŋgoŋ le vovo lɔ mɛ yí mí ŋgbe sɔ hwashinyinyi 'kukuci kplá ekɔ nɔ míwoɖekiwo ké go. ² Enyɛ Pɔlu, ŋ nunuɔ nɔ mí be nɔ́ gbe ɖe emɔ yí wo so evo nɔ mí ɔ, á nyí ke edɔ ci yí Kliso lɔ va wa nɔ mí nyi edɔ gbali. ³ Ŋ gbe trɔ yí ɖoɖoɔ ekpe i jí nɔ amɛ ɖekpokpoi ci yí gbe dɔ yí wo so evo nii baŋ: é le nɔ amɛ lɔ dandandan be á wa do ese jí vɛ. ⁴ Míwo ciwo yi bubuɔ be Yuɖatɔwo 'sé ji yí yewo a wa do yí a nyi amɛjɔjɔɛwo le Mawu ŋmɛ ɔ, mí gli Mawu xomɛvu lɔ dó. ⁵ Vɔ míwo yɛ ɔ, Gbɔngbɔn kɔkɔɛ ji yí mí ti yí nɔnɔ ete kpɔ amɛjɔjɔɛnyinyi sɔ to Kliso lɔ jixɔsɔse mɛ. ⁶ Ɖó nɔ́ wo le Yesu Kliso mɛ ɔ, evososo alo tɔtɔnɔnyinyi de le veviɖe go. Enu ci yí le vevie yí nyi xɔse ci yí a le edɔ wagɔ sɔ́ to amɛ lɔnlɔn mɛ. ⁷ Mí nɔnɔ eju jí sasa nyuiɖe a! Ecɛviɛ ɖe, mí yí va ɖo ete mi yí xé emɔ dó mí be míwo ŋgbe gbe kando nyɔnɔnui lɔ ji go ɔ? ⁸ Enyɔ hɔn ci yí wo nú kaka yí mí xɔ egbe do ji de so Mawu ci yí yɔ́ mí gbɔ go. ⁹ Amɛwo donɔ elo be kpɔnnɔ 'wɔ́ blebu. ¹⁰ Enyɛ ɔ,ŋ kando mí ji le Axwetɔ mɛ be: míwo d'a bui do ebu ɖe tó akpo nɔ kinyɛ go. Vɔ amɛ ci yí cacaka ́mí ỳ ɔ, eɖekpokpoiɖe ci yí é le ɔ á ɖu i 'tɔzu. ¹¹ Vɔ enyɛ yɛ ɖe, nɔvinyɛwo, nɔ́ enyɛ, ŋ gbe va nunuɔ evosasa 'nyɔ yí dandaan ɖee, nyi yí na taɖo yí wo a gbe va cí yumɛ nɔ ŋ ke ɔ? Nɔ́ ŋ nunuɔ nɛnɛ ɔ, aci soga lɔ 'nyɔ ci yí nyinyiɛ afɔklɛnnu nɔ amɛwo á trɔ enyɔ gbali hɔnnɔ. ¹² Amɛ hɔnwo ci yí cacaka mì kodo evososo 'nyɔ lé gbe ta wowoɖekiwo kpíi! ¹³ Vɔ nɔvinyɛwo, míwo yɛ ɔ, mawu yɔ mí a nɔ mí a nɔ míwoɖekiwoshinu. Enu ci yí le mɛ kpoŋ yí nyi be amɛɖekishinunɔnɔ lɔ ŋgbɔ dɔ nɔ mí a tɔ́ enu ciwo yí dro míwo gbaza wawa go. Vɔ to lɔnlɔn ci yí Mawu lɔn mí jí ɔ, mí nyi edɔwaviwo nɔ míwonɔnɔwo le lɔnlɔn mɛ. ¹⁴ Ɖó ɔ, ese lɔ pleŋ xoxu do enyɔ cɛ mɛ be: «Lɔ́n nɔvio shigbe eoŋtɔ nɛnɛ.» ¹⁵ Vɔ nɔ́ mí kankan míwoɖekiwo ɖu, nɔ mí drɛndrɛɛn míwonɔnɔwo shigbe elanwadanwo nɛnɛ ɔ mí kpɔ míwoɖekiwo ji! Nɔ́ d'é nyí nɛnɛ go ɔ, mí a vá gu míwonɔnɔwo. ¹⁶ É yí na taɖo ɔ, ŋ nunuɔ nɔ mí be: mí zɔn to Gbɔngbɔn lɔ ŋsɛn mɛ; nɔ mí wɛɛ nɛnɛ ɔ, mí d'a vá wawa enu ciwo yí dronɔ gbaza lɔ gbeɖe go. ¹⁷ Ɖo enu ciwo yí dronɔ gbaza lɔ tó akpo nɔ enu ciwo yí dronɔ gbɔngbɔn lɔ. Ahan lɔ ké yí enu ciwo yí dronɔ gbɔngbɔn lɔ́ akpo nɔ gbaza lɔ tɔwo nɛ. Wo amɛve lɔwo nɔnɔ evu wagɔ le agbetɔ lɔ mɛ yí le vɔvɔnu ɔ, agbetɔ lɔ de vá sɛn eŋ wanɔ enu ci yí droi go. ¹⁸ Nɔ́ Gbɔngbɔn kplɔkplɔ mí ɔ, mí de le ese gɔnmɛ go. ¹⁹ Keŋ ɔ, edɔ ciwo yí gbaza lɔ wanɔ ze goɖoo: wowo nyí heteliwawa, enuxoɖyixoɖyi mateliwawa, ²⁰ vojusɛnsɛn,maʒikiwawawo, amɛmalɔnmalɔnwo, evuwawawo, ŋhwan baɖawo, domɛzidodowo, amɛɖekɛtɔjiji, mamawo, makpemakpewo; ŋbiawo, ahanumuwo, sukanuɖuɖuwo kodo enu baɖa hɔn han gbɛmuwo. ²¹ Ŋ gbe ɖoɖoɔ afɔ afɔta nɔ mí shigbe lehanci yí ŋ wɛɛ nɔ mí vayi do nɛnɛ be: amɛ ci yí wawa enu hɔnwo d'a sɛn eŋ kpɔ́ texwe ɖe a xɔ le Mawu 'fiɔɖuxu lɔ mɛ go. ²² Vɔ Gbɔngbɔn kɔkɔɛ yɛ ɔ, eku ciwo yí yɛ sɛn nɔ le agbetɔ mɛ uí nyi lɔnlɔn, jijɔ, fafa, jigbɔn€, dɔmɛnyɔnyɔ, xomɛvuwawa, xose, ²³ ecufafa kodo amɛɖekijiɖuɖu. Ese de gbe enu hɔnwo go. ²⁴ Vɔ ɔ, amɛ ci wo yí nyí Yesu Kliso "mɛwo kan gbáza lɔ kodo enuvɔn jɔjɔmɛ ci yí le shi kodo yi 'drowo do acisoga nu. ²⁵ Ci yí é nyi to Gbɔngbɔn lɔ ji yí mì le agbe le ɔ, mí na nɔ mì a gbe wanɔ enu to Gbɔngbɔn lɔ ŋsɛn mɛ. ²⁶ Mí na nɔ mì ŋgbe trɔ egoyitɔ wo go, mì na nɔ mì a mi enyɔ jiji le mìwonɔnɔwo nú, mì a mi eŋbiabia mìwonɔnɔwo.