¹ Galatitɔ ŋunumanyatɔwo, mí yí flu eta gbɔ nɔ́ mí nɛnɛ ɔ? D'é nyi míwo ŋ mɛ yí ŋ dre lehanci yí wo kan Yesu Kliso do acisoga ji dó le ba? ² Enyɔ ci ɖekɛ yí ŋ jijiɛ a se so mí gbɔ ge: Eseji ci yí mí wawa do yí na yí mí xɔ gbɔngbɔn kɔkɔɛ lɔ dó a alo ci yí mí se Eŋɛnyui lɔ yí yí xɔɛ ji se yí dɔ yí mawu sɔ́ na mí do? ³ Ɖee, mí jɔ ŋunumanyatɔwo kaka yí aba hɔn mɛ nii yɔ́ a? ci yí mí waɖaŋ je agbenɔnɔ gɔmɛ kodo gbɔngbɔn kɔkɔɛ ŋsɛn ɖee, mí jijiɛ a vayi vɔvɔnu nii kodo gbaza yɔ a? ⁴ Enu ciwo pleŋ yí mí kpɔ yí wo jɔ ɖee, enugbaliwo yí wo nyí a? Wo a sɛn ɛn nyí enugbaliwo ba! ⁵ Amɛ ci yí sɔ́ yí gbɔngbɔn kɔkɔɛ na mí yí le enujiŋwo waa le míwo dom€ ɖee, Yuɖetɔwo 'sejiwawado yí dɔ yí é wɛɛwɛɛ do alo ci yí mí se Eŋɛnui lɔ yí xɔɛ ji se yí dɔ yí é wɛɛ nɛnɛ dó? ⁶ Nɛnɛ ɔ, wo ŋwlɛ daɖɛ so Ablahamu nu be: «Ablahamu xɔ Mawu ji se eyi wo xɔ mawu jixɔxɔse lɔ nii dó amɛjɔjeɔ nyinyi jí.» ⁷ É yí na taɖo ɔ, mí ɖo a mɔŋje mɛ be amɛ ciwo yí wo kpɔ́ le Mawu jixɔxɔse 'nyɔ mɛ yí nyí Ablahamu jijimɛvi ŋtɔŋtɔwo. ⁸ Sasa lɔ ci yí wo nyanya be. Mawu a vá sɔ́ amɛmanyi Yuɖatɔwo wa amɛjɔjɔɛwo sɔ́ to xɔse mɛ ɔ, wo ŋwlɛ daɖɛ do Mawu 'nyɔ wemawo mɛ be wo doŋkɔ yí dó eŋɛnyui lɔ nɔ Ablahamu be: «Mau a cu eshi nɔ akɔtawo pleŋ to eo jí.» ⁹ Nɛnɛ ɔ, amɛ ciwo kpɔ le mawu jixɔxɔse 'nyɔ mɛ yí nyí Ablahamu jijimɛvi ŋtɔŋtɔwo. wo anyi Yuɖatɔwo kodo Ablahamu, amɛ ci yí ɖó xɔse lɔ. ¹⁰ Vɔ amɛ ciwo yí wo kpɔ le esejiwawado 'nyɔ mɛ ɔ wo pleŋ le Mawu 'finxodo gɔnmɛ. Ɖó ɔ, wo ŋwlɛ daɖɛ be: «Efinxodo lé va amɛɖekpokpoi ci yí d'a dovevi enu ciwo pleŋ yí le ese wema lɔ mɛ yí a wawaa do pleŋ ji go.» ¹¹ É zé petii be amɛɖekpokpoi d'a xɔ amɛjɔjɔɛnyinyi le Mawu ŋmɛ sɔ to ese jiwawado mɛ go. Ɖo ɔ, wo ŋwlɛ daɖɛ be: «Amɛ ci yí nyi amɛjɔjɔɛ sɔ to xɔse ŋsɛn mɛ a nɔ agbe.» ¹² Keŋ ɔ, ese 'nyɔ de nyí xɔse 'nyɔ ɖe go. Vɔ ese nú yí wo ŋwlɛ daɖɛ be:«Amɛ ci yí do enu honwo ji a gbe nɔ to enu lɔwo wawa jí.» ¹³ KLiso lɔ cú efɛn yí sɔ xwle mì le ese 'finxodo shi gacimɛ yí yiŋtɔ trɔ efinxodonu do mìwo 'ta. Ɖo ɔ, wo ŋwlɛ daɖɛ be: «Efinxodo le amɛɖekpokpoi ci yí wo kan do aci jí.» ¹⁴ Yesu wɛɛ nɛnɛhan nɔ Ablahamu Shicu lɔ a to Yesu Kliso ji nɔ amɛmanyi Yuɖatɔwo hɛnnɛ. É gbe wɛɛ nɛnɛhan nɔ mì a xɔ Gbɔngbɔn kɔkɔɛ ci ŋgbe yí Mawu dó lɔ sɔ́ to xɔse mɛ. ¹⁵ Nɔvinyɛwo, ma sɔ́ kpɔwɛ cɛ le agbetɔ 'nuwawawo mɛ: nɔ́ amɛɖe ɖu ebla le enuɖe ji shigbe lehanci yí é jé do nɛnɛ ɔ, amɛbu ɖé d'a sɛ́n eŋ cucu ebla lɔ alo a da enuɖe dó ji nii go. ¹⁶ Keŋ ɔ, Ablahamu kodo yi jijimɛ yí Mawu ɖó egbe lɔwo nɔ́ . wo d'é nu be: « nɔ́ yi jijimɛviwo» Shigbe be jijimɛ sugbɔ 'nyɔ yí wo nunuɔ go. Vɔ ɔ, jijimɛ kuɖeka kṕŋ 'nyɔ yí wo nunuɔ be: « kodo ń ao jijimɛ.» Jijimɛ lɔ yí nyí Kliso lɔ. ¹⁷ Enyɛ ci yí ŋ jijìɛ a nu yí nyi be enublabla ci yí Mawu wa kodo Ablahamu koŋ yí é li ɖɛ ɔ, ese ci yí vá vá nɔ́ Yuɖatɔwo bóó le exwe sanŋdimɛ taatɔn (45) dodu d'a sɛ́n eŋ cucu enublabla lɔ ci yí Mawu wa kodo Ablahamu go. Nɔ́ è cucui ɔ, à nyi eʒbeu lɔ nyí enugbali. ¹⁸ Ɖó nɔ́ dɔkunu kpɛnkpɛn ci yí wo a kpɔ a xɔ le mawu mɛ a sé esejiwawado mɛ ɔ a nyi be d'a gbe so egbeɖu mɛ go. Keŋ ɔ, egbeɖu lɔ jí yí Mawu wa do yí wa afenu nɔ Ablahamu. ¹⁹ Ecɛviɛ ɖe, nyi yí dɔ́ taɖo yí Mawu do ese ɔ? Mawu sɔ ese kpíi do adɔjejewo 'ta kaka a sɔna gacimɛ yí Ablahamu jijimɛ hɔn lɔ ci yí wo ɖo egbe lɔ nɔ́ a vá. Mawu sɔ ese lɔ na yi dɔwo yí wo sɔ va na agbetɔwo to amɛdomɛdradotɔ ɖeka ci yí le agbetɔ lɔwo kodo Mawu domɛ ji. ²⁰ keŋ ɔ, kpɔ́ wo de ʒian amɛdomɛdradotɔ nɔ́ é nyi be amɛ kuɖeka yí le enu wagɔ go. É trɔ nyi be Mawu ɖeɖɛ yí le enu wagɔ. ²¹ Ci yí é le nɛnɛ éé, ese só je ete do Mawu 'gbeɖuwo nú yɔ́ a? Gbee, á jɔ kpɔ go. nɔ é nyi be wo ná ese ɖé ci yí a na agbetɔwo a nɔ agbe sasa ɔ á nyi ké amɛjɔjɔɛnyinyi cán a vá nyɔnɔuitɔ sasa to esejiwawado ²² mɛ.Vɔ ɔ Mawu 'nyɔ wemawo ŋwlá enuwo pleŋ dó enuvɔn mɛ. Nɔ́ nɛnɛ ɔ, Mawu a sɔ́ agbetɔvi lɔ ná amɛ ciwo yí xɔɛ ji se sɔ to Yesu Kliso lɔ jixɔxɔse mɛ. ²³ Gbɔxwe yí xɔse 'nyɔ a vá vá ɔ, Yuɖatɔwo 'se gɔnmɛ yí mì le yí é cu mì ɖɛ shigbe gakpamɛnɔtɔwo nɛnɛ. Nɛnɛhan yí mì le nɛ yí sɔ nɔ ete kpɔ xɔse lɔ ci yí wo & vá ɖe dansin. ²⁴ Nɛnɛ ɔ ese ɖu amɛcɔtɔ nɔ mì gahɔnmɛ kaka va sɔna gacimɛ yí Kliso lɔ vá. é le nɛnɛ nɔ́ mawu asɔ mí wa amɛjɔjɔɛwo le yi ŋmɛ to Kliso lɔ jixɔxɔse mɛ. ²⁵ Écɛviɛ ci xɔse vá vá ɔ mì de gbe le amɛcɔtɔ ɖe gɔnmɛ go. ²⁶ Ɖó to xɔse mɛ ɔ, mí pleŋ nyí Mawu eviɛwo le Yesu Kliso mɛ. ²⁷ Nyao ɔ, mì pleŋ ciwo yí wo le mawushi nɔ le Kliso lɔ mɛ ɔ, mì sɔ Kliso lɔ dó shigbe awu nɛnɛ. ²⁸ Ci yí é le nɛnɛhan ɔ, kpɔ́ yuɖatɔge, amɛmanyi Yuɖatɔ nɛ, hwashi ge amɛmanyi hwashi nɛ, ŋsu ge, nyɔnu n̂ ɖe de gbe li go. Ɖó mí pleŋ ɔ, mí nyi enu kuɖeka le kliso lɔ mɛ. ²⁹ Nɔ́ mí nyí Kliso 'mɛwo ɔ,á nyi míwo yi nyí Ablahamu jijimɛ yí gbe nyi egbeɖunuwo 'kpaɖexɔtɔ.