¹ Ci yí é nyi kpɔ́ bé evi veviwo yí mí nyi nɔ́ Mawu ɔ, mí tekpɔ a wa enu yitɔhan. ² Mí nɔ agbe le lɔnlɔn mɛ shigbe lehanci yí Kliso lɔ cán lɔn mì do yí sɔ́ yiɖeki jó nɔ Mawu yí é sɔ wa enunana kodo avɔsa dó mìwo ta shigbe amihwɛnte ci 'ŋwa yí nyá hwɛnhwɛn nɛnɛ. ³ Wo de ɖó yí a agbe se mateliwawa, laganuwawa hatahata ɖe, alo sukanujiji 'nyɔ ɖe le míwo domɛ o shigbe lehanci yí e ɖo a nɔ do nɔ́ xɔsetɔwo nɛnɛ. ⁴ Kpɔ́ d'é nyɔ́ hɛnnɛ bé enyɔdadɛwo, ŋunumanya nuxuwo kodo enyɔyawo a tonɔ le míwo 'glanwo mɛ o. Vɔ ɔ, akpedodo nɔ́ Mawu nuxuwo le tonɔ le aglanmɛ nɔ́ mí. ⁵ Ɖo ɔ, mí ɖo a nya nyuiɖe bé: matelitɔnɔ ɖe, lagatɔnɔ ɖe suhanujitɔ ɖé (ɖó sukanujiji ɔ, vojusɛnsɛn yɔ) d'a sɛ́n eŋ a kpɔ texwe le Kliso kodo Mawu 'fiɔɖuxu mɛ gbeɖe o. ⁶ Amɛɖe ŋgbe va ble mí kodo nuxu gbaliwo o. Ɖo ɔ, nɛnɛ wawa dɔnɔ Mawu dɔmɛzi vanɔ egufɔntɔwo ji. ⁷ É yí ná taɖo ɔ, mí ŋgbe do eha ɖe kodo nɛnɛ 'mɛwo o. ⁸ Sasavayi nyao ɔ, mí nyi viviciwo. Vɔ ecɛyɛ ɔ, mí va nyí klɛnklɛn le Axwetɔ mɛ. Ci yí é le nɛnɛ ɔ, mí nɔ agbe shigbe klɛnklɛnmɛviwo nɛnɛ. ⁹ Ɖo klenklɛn lɔ 'kusɛnsɛnwo yí nyí dɔmɛnyɔnyɔ, jɔjɔɛnyinyi kodo nyɔnɔnuitoto. ¹⁰ Mí ɖo a donɔ jeshi enu ci yí jɔnɔ eji nɔ Axwetɔ. ¹¹ Mí ŋgbe do enu vivimɛ 'dɔwawa maɖotawo mɛ o. Vɔ ɔ, mí ɖo a klonɔ enu so wo jí. ¹² Nyao ɔ, enu ciwo yí wo wanɔ le bebemɛ ɔ, enuwo wo nyí nɔ́ wo va nunuɔ wo cán wo a kpaca kpaca amɛ. ¹³ Vɔ nɔ́ wo kló enu so enu hɔn pleŋ jí ɔ, klɛnklɛn ɖenɔ wo toi dɛngbuii. ¹⁴ Ɖó enu ci nu wo kpɔ́ enu je petii ŋtɔkpu can va nyinɔ klɛnklen. É yí ná taɖo yí wo nunuɔ be: « Eo alɔndɔntɔ, nyɔ̀, fɔ̀n so amɛkukuwo domɛ, eyi nɛnɛ ɔ Kliso lɔ a klɛ́n dó eo ji.» ¹⁵ Ci yí é le nɛnɛ ɔ, mí kpɔ míwoɖekiwo jí nyuiɖe le lecihan yí mí nonɔ agbe domɛ. Mi ŋgbe nonɔ agbe lɔ shigbe sukunɔwo nɛnɛ o; vɔ ɔ, mí nɔ agbe shigbe ŋununyatɔwo nɛnɛ. ¹⁶ Mí ɖe eblɛ dó gamɛ lo nú. Ɖó ŋkeke lɔwo de nyɔ́ o. ¹⁷ Nɛnɛ ɔ, mí ŋgbé gbe ŋɖɛmanya o.Vɔ ɔ, mí tekpɔ yí a mɔŋje enu ci yí nyí Axwetɔ 'dró mɛ. ¹⁸ Mí ŋgbe nu aha kaka yí a mú o: ɖó mateliwo wawa mɛ yí é dɔnnɔ amɛ do.Vɔ ɔ, Gbɔngbon kɔkɔɛ lé ɖɔ́ lanmɛ mí. ¹⁹ Mí a jinɔ kanfukanfu 'hawo, bubudoamɛ nu 'hawo kodo Akpedodo 'ha gbɔngbɔnmɛtowo dó eju yí a sɔ́ donɔ ŋsɛn nɔnɔ. mí a jinɔ ehawo yí a sɔ́ mlanɔ Axwetɔ kodo míwo 'ji blebu. ²⁰ Mí a donɔ akpe dó enushanu 'ta le míwo 'xwetɔ Yesu Kliso nyikɔ mɛ hweɖekpokpoinu nɔ́ amɛ ci yí nyí Mawu yí gbe nyi Eda. ²¹ Mí bɔbɔ míwoɖekiwo nɔ́ míwo nɔnɔwo le shishiɖoɖo nɔ́ kliso lɔ mɛ. ²² Nyɔnuwomíwo domɛtɔ ɖekaɖeka lé bɔbɔ yiɖeki nɔ́ asuɔ shigbe Axwetɔ yí mí bɔbɔbɔ nɔ nɛnɛ. ²³ Ɖó ɔ, ŋsu yí nyí eta nɔ nyɔnu shigbe lehanci yí Kliso lɔ nyí eta yi lankpu, ci yí é nyi hwlɛngantɔ nɔ́ dó nɛnɛ. ²⁴ Shigbe lehanci yí Mawu 'há lɔ bɔbɔnɔ yiɖeki nɔ́ Kliso do nɛnɛ ɔ, nenɛke yí nyɔnuwo ɖó a bɔbɔnɔ wowoɖekiwo le enushanu mɛ nɔ wowo le enushanu mɛ nɔ wowo 'suwo dó nɛ. ²⁵ Ŋsu axwetɔwo, míwo domɛtɔ ɖekaɖeka lé lɔn ashiɛ shigbe lehanci yí Kliso lɔ lɔn mawu 'há lɔ kaka yí sɔ́ yiɖeki jó yí wo wui do eta nii dó nɛnɛ. ²⁶ É wɛɛ nɛnɛ yí sɔ́ ɖe eha lɔ dó akpo yí klɔ́ eɖyiwo le nu nɔ Mawu sɔ́ to eshilele kodo Enyɔ lɔ mɛ. ²⁷ Nɛnɛ nɔ́ á sɛn eŋ a vayí doasɛ Mawu 'ha lɔ le Kliso ŋmɛ yí a dada ezo, eɖyi ɖe ɖ'a le nú o. ²⁸ Nɛneke ɔ, ŋsu do a lɔn ashiɛ shigbe lehanci yí é lɔnnɔ yiŋtɔ lankpu do nɛnɛ. Ŋsu ci yí lɔn ashiɛ, lɔn yiɖeki. ²⁹ Nyao ɔ, amɛɖe de li yi a gbé yiŋtɔ lankpu ma lɔn gbeɖe o. Vɔ ɔ, kpɔ é kpɔnɔ jí yí lenɔ ebu nii shigbe lehanci yí Kliso wɛɛni do nɔ Mawu 'ha dó nɛnɛ. ³⁰ Ɖó ɔ, mì nyí ŋcinuwo le yi lankpu nu. ³¹ É yí ná taɖo ɔ, ŋsu a sogbe edalɔ kodo enɔlɔ ɖɛ́ yí á vayí ca dó qshiɛ nu yí wo amɛve lɔwo a trɔ lankpʊ kuɖeka. ³² Enudanŋdonu gangan ɖeka le hɔn. Enyɛ yɛ ɔ, ŋ kpɔ bé Kliso kodo Mawu 'há lɔ 'nyɔ nuɔ yí e le. ³³ Ɖekpokpoiɖe ɔ, míwo domɛtɔ ɖekaɖeka lé lɔn ashiɛ shigbe lecihan yí é lɔn yiɖeki dó nɛnɛ yí nyɔnu lé ɖó shishi nɔ́ asuɔ.