¹ Ci yí enyɔ lɔwo le nɛnɛ ɔ, enyɛ amɛ ci yí nyí gakpamɛnɔtɔ le Axwetɔ lɔ mɛ, dodoɔ ŋsɛn lanmɛ nɔ mí bé míwo ciwo yí Mawu yɔ́ ɔ, míwo le nɔ agbe do alɔkpa ɖe ci yí sɔ egbe kodo yɔyɔ ci yí mí xɔ. ² Mí a sɔ́ míwoɖekiwo hwe blebu, a fanɔ ecu keŋ yí a gbɔnnɔ eji ɖɛ. Mí a gbɔnnɔ eji ɖɛ yí a xɔnɔ míwonɔnɔwo kodo lɔnlɔn. ³ Mí a tehpɔ yí a lé Gbɔngbɔn lɔ ɖeka wawa lɔ ɖɛ́ sɔ to fafa 'kacaca lɔ mɛ. ⁴ Lankpu kuɖeka yí li yí gbɔngbon kuɖeka ke yí li shigbe lehanci yí e nyi emɔkpɔkpɔ ci yí Mawu yɔ mí nɔ kuɖeka yí li do nɛnɛ. ⁵ Axwetɔ kuɖeka yí li, xɔse kuɖeka yí li yí mawushilele kuɖeka can yí li. ⁶ Mawu kuɖeka , ci yí nyí Eda nɔ amɛwo pleŋ yí li e yí kpa a cɛ do amɛwo pleŋ jí yí wawa edɔ to amɛwo pleŋ ji yí leamɛwo pleŋ mɛ. ⁷ Gankegan ɔ, Kliso lɔ na enunana mìwo domɛtɔ ɖeka ɖeka dó lehanci yí ewa xomɛvunu nɔ́ amɛ ɖeka ɖeak do nɛnɛ. ⁸ É yí na taɖo ɔ, wo ŋwlɛ ɖɛ bé: «Hwecinu yí e yi ejixomɛ bóo ɔ, e kplɔ gakpamɛtɔwo yi e na enunanawo egbetɔwo.» ⁹ Keŋ ɖe, nyi yí nyí « é yi eji bóo» lɔ ɔ? Enyɔ ci mɛ wo a gbe se dru yí nyí kpɔ bé é ɖyi je nyi gban gɔnmɛ hɛnnɛ. ¹⁰ Amɛ ci yí ɖyi va gɔnmɛ o, amɛ lɔ ké yí gbe yi eji bóo le jeŋkushiwo tamɛ ɖaa kɛŋ yí a sɛn ɖɔ enuwo pleŋ mɛ. ¹¹ Amɛ lɔ yí ná yí amɛɖewo nyí amɛdɔdɔwo, amɛbuwo nyí Mawu 'ŋɛdotɔwo, ebuwo gbe nyi Eŋɛnyui lɔ 'nyɔnutɔwo, ebuwo nyi ehakplɔtɔwo. ¹² É ná nɛnɛ 'mɛwo sun yí a tó enukplankplanwo mɛ kodo xɔsetɔwo nɔ wo a le egbesɔsɔmɛ nɔ Mawu ''dɔwawa a sɔ cu Kliso lanlpu lɔ dó ete. ¹³ Mì a le ji nɛnɛ kaka yí mí pleŋ a sɛ́n eŋ wa ɖeka to xɔse kodo Mawu Eviɛ lɔ jejeshimɛ. Nɛnɛ ɔ, mì a shinshin ɛgɔ kaka a shin vɛ shigbe mɛgan xoxuwo nɛnɛ yí a va ɖó nɔnɔmɛ ploploplo ci yí le Kliso lɔ shí nɛnɛ. ¹⁴ Gahɔnmɛ ɔ, mì d'a gbe nyi ɖevihwɛwo yí etɔɖɔɖɔwo a lɔlɔ mì ɖaɖa alɔwo pleŋ mɛ go. Kpɔ́ mì da gbe nyi ɖeviciwo yí enukplankplan yoyu 'nyɔwo a lɔlɔgɔ kpe afishafi go. nɛnɛke amɛwo d'a gbe sɛn eŋ a xoxo mì shigbe balɔn nɛnɛ , a sɔ mì yigɔ trɔntrɔnmɛ kodo wowo 'yewawawo kodo enukplankplan mɛnyɔ manyɔ manyɔwo go. ¹⁵ Vɔ ɔ, nɔ mì nunuɔ nyɔnɔnui lɔ nɔ amɛwo le lɔnlon mɛ ɔ, mì a shinshin ɛgɔ le Kliso lɔ, amɛ ci yí nyí eta lɔ mɛ. ¹⁶ Kliso lɔ jí yí lankpu blebu lɔ, ci ŋcinuwo pleŋ bɔ le ɖoɖonu yí le eju sɔ tó kpekpexu hamɛhamɛ ciwo yí le lankpu nu mɛ. Lankpu lɔ shinnɔ nɔ ŋcinu ɖeka ɖeka le yí dɔ́ wagɔ dó lehanci yí é je do jí. Eyi nɛnɛ ɔ, lankpu ŋtɔ lɔ cunɔ yiɖeki dó ete le lɔnlɔn mɛ. ¹⁷ Ci yí é le nɛnɛ ɔ, enyɔ ci yí ŋ nunuɔ yí gbe tɛtɛ egbe do jí le Axwetɔ mɛ ge: mí de ɖó yí agbe nɔnɔ agbe shigbe lehanci yí akɔta kpɛtɛ mɛnɔtɔwo nɔnɔ agbe do nɛnɛ le wowo susu flufluwo nú nɛnɛ go. ¹⁸ Ahɔnmɛ do vivi nɔ́ wo, wo ci azɔge nɔ mawu 'gbenɔnɔ dó enumanya ci yí le wo mɛ ŋci. Ɖo ɔ, ŋtasɛ́nsɛ́n le eji mɛ nɔ wo. ¹⁹ Ci yí wananyuiwo pleŋ vɔ le lanmɛ nɔ wo ŋci ɔ wo zo do ŋsuxwe kodo nyɔnuwe 'fɛnwawawo mɛ yí tɔ́ mateli hamɛhamɛwo wawa wowoɖekiwo jimaɖu. ²⁰ Vɔ míwo yɛ ɔ, d'é nyí nɛnɛ yí míwo kplán so Kliso lɔ nú nɛ go! ²¹ Nɔ é nyí kpɔ bé Kliso lɔ yí xo nuxu yí mí se teŋ yí nɔ é yí lɔ mɛ wo kplán enu mí le do nyɔnɔnui lɔ 'lɔ ji le Yesu mɛ ɔ, ²² é le bé mí ɖo a ɖe míwoɖekiwo le jɔjɔmɛ xoxwi ci yí le mí shi sasa, ci yí sɔsɔ kodo agbe xoxwi ci yí mí nɔnɔ sasa lɔ nú. Jɔjɔm€ xoxwi lɔ 'nudrodro fluamɛ fluamɛwo kplɔnɔ amɛ yi trɔntrɔnmɛ. ²³ Mí tashi míwaɖekiwo nɔ́ Gbɔngbon lɔ a trɔ́ a wa mí yoyu sɔ tó miwo ŋɖɛnyanya trɔtrɔyoyu mɛ. ²⁴ Mí sɔ jɔjɔmɛ yoyutɔ lɔ sɔɔ́ dó shigbe awu nɛnɛ. Jɔjɔmɛ yoyutɔ lɔ hɔn yí Mawu wa le jɔjɔɛnyinyi kodo kɔkɔɛnyinyi ci yí nyɔnɔnui lɔ jinɔ mɛ. ²⁵ É yí na taɖo ɔ, mí mi ŋsu kankan! Amɛɖeka amɛɖeka le tó nyɔnɔnui nɔ́ yi kpena. Ɖó ɔ, ŋcinuwo yí mì pleŋ bɔ nyi nɔ́ mìwonɔnɔwo. ²⁶ Nɔ́ mí wa dɔmɛziɔ, mí ŋgbe wa enuvɔn go. Ewe ŋgbe yí exɔ do míwo domɛzi gbɔxwe nɔ avɔ go. ²⁷ Mí ŋgbe gbe texwe eɖeeɖe ɖɛ nɔ́ Legba go. ²⁸ Flanfinɔ lé li efi fifi; vɔ ɔ, lé ɖɔ eŋ yí a sɔ́ yiŋtɔ 'lɔwo wa edɔ nyɔnɔnuitɔ keŋ yí a sɛ́n eŋ wa enu ɖɛ́ kaka yí a ná amɛ ciwo yí le eʒian mɛ. ²⁹ Nuxu manyɔ manyɔ ɖe ŋgbe tnɔ lé míwo 'glanwo mɛ go. Vɔ nɔ́ é ʒiánɔ enyɔnyui ci yí a cu amɛ do ete yí a cucuɔ enunyui afenutɔ ɖe dó lanmɛ nɔ amɛ ciwo yi ɖonɔ eto mí yí a tonɔ le aglan mɛ nɔ mi. ³⁰ Mi ŋgbe na yí Mawu Gbɔngbɔn kɔkɔɛ lɔ a ci ŋshishi mɛ go. É yí jí wo tó yí sɔ jeshidu ɖó mí nu daɖɛ nɔ́ hmlɛnhwlɛngan so enuvɔn mɛ ŋkeke lɔ. ³¹ Dɔmɛzivevesese, elannuwawa, dɔmɛzi, amɛzuzu 'nuwaw ɖekpokpoi lé gu le míwo domɛ. ³² Mí nyɔ dɔmɛ do míwonɔnɔwo nu yí a fá ecu le xomɛvuwaw mɛ nɔ míwonɔnɔwo. Mí wanɔ xomɛvunu nɔ míwonɔnɔwo shigbe lehanci yí mawu wa xomɛvunu nɔ́ mí do to Kliso lɔ ji nɛnɛ.