¹ É yí ná taɖo ɔ, enyɛ Pɔlu, ŋ nyi Gakpamɛnɔtɔ dó Yesu Kliso ŋci yí le edɔ wagɔ nɔ Mawu do mìwo, amɛmanyi Yuɖatɔwo tamɛ. ² Nyao ɔ; mí se edɔ ci yí mawu ɖo nɔ ŋ sɔ to yi xomɛvunu 'nunana ci yí é na ŋ yí na wa nɔ mí mɛ. ³ Enuɖeɖedoasɛ nɔ amɛ mɛ yí é to yí na yí ŋ jeshi enudaŋdonu lɔ shigbe lehanci yí ŋ ŋwlɛ enu so nú le Kleŋ mɛ sabaaɖe do nɛnɛ. ⁴ Nɔ mí hlɛnhlɛ̀n enyɔ lɔ ɔ, mí a mɔŋje ŋɖɛnyanya ci yí le ŋ shi huso Kliso lɔ 'nudanŋdonu nu mɛ. ⁵ Wo de hun enu so enudanŋdonu cɛ nu nɔ agbetɔwo wo yí jeshii ɖɛ le jijimɛ ciwo yí vayi mɛ shigbe lehanci yí wo va ɖii doasɛ ɖɛyɛ to gbɔngbɔn lɔ jí nɔ Kliso lɔ 'mɛdɔdɔ kɔkɔɛwo kodo mawu 'ŋɛdotɔwo do nɛnɛ go. ⁶ Kliso lɔ 'nudanŋdonu lɔ yí nyí bé: sɔ to Eŋɛnyui lɔ jí ɔ, amɛmanyi Yuɖatɔwo can a bɔ a xɔ enunana ŋmɛɖeka lɔ, wo nyí lankpu kuɖeka yí gbe bɔ ɖo alɔ le egbeɖu kuɖeka lɔ mɛ le Yesu Kliso mɛ. ⁷ Enyɛnui lɔ 'dɔwatɔ yí ŋ vá trɔ shigbe lehanci yí xomɛvunu 'nunana ci yi mawu na ŋ le do sɔ to yi ŋsɛn 'dɔwawa mɛ nɛnɛ. ⁸ Enyɛ ci yí nyí amɛ hwɛhwɛ kpɛtɛkpɛtɛtɔ lɔ le xɔsetɔwo mɛ ɔ, enyɛ yí mawu va wa xomɛvunu nɔ bé ma yi nu Kliso lɔ dɔkunu manumanu, yi 'ŋɛnyui lɔ nɔ amɛmanyi Yuɖatɔwo. ⁹ Ŋ ɖo a dré lehanci yí Mawu, enuwo pleŋ watɔ, wa enudanŋdonu lɔ ci yí é sɔ wla so tɛgbɛɛ lɔ nɔ agbetɔwo pleŋ nɔ wo a mɔŋjemɛ petii. ¹⁰ Nɛnɛ nɔ ɖɛyɛ ɔ, mawu 'ha lɔ a doasɛ mawu ŋununyanya lɔ, dó hata gangan ciwo pleŋ mɛ yí e le, nɔ gbɔngbɔnmɛ 'gawo kodo gbɔngbɔnmɛ 'cɛkpakpa ciwo plɛŋ yí le jeŋkushimɛ nɔxuwo mɛ. ¹¹ Wo a wɛɛ nɛ do totomɛ ci yí mawu wa ɖɛ so tɛgbɛɛ yí va wa do ji jí. ¹² kliso lɔ mɛ yí mìwo ɖo kankandoji ci yí le veviɖe yí mì a sɔ gogo mawu kodo ejiɖeɖe le sɔ xɔxɔ ci yí mì xɔɛ ji se mɛ. ¹³ É yí na taɖo ɔ, ŋ biɔbiɔ mí be míwo ŋgbe na nɔ efun cɛwo, ciwo yí ŋ kpekpeɛ do míwo 'ta a gbɔjɔ lanmɛ nɔ mí go. Wowo mɛ yí bubu gangan ci yi wo a va do mí nu lé. ¹⁴ Ci yí e le nɛnɛ ɔ, ŋ jenɔ ekloji nɔ Mawu Eda, ¹⁵ ci yí ná nyikɔ kpɔtɔ le ete nɔ xomu ciwo pleŋ yí le jeŋkushimɛ kodo ciwo pleŋ yí le nyigbanjí. ¹⁶ Ŋ biɔɛni bé yí le ná nɔ mí a nyí ŋsu agbowo kodo ŋsɛntɔwo sɔ kodo yí gangangan manumanu lɔ sɔ to yi gbɔngbɔn ŋsɛn mɛ. Nɛnɛ ɔ, a nyɔ nɔ amɛnyinyi míwotɔ ci yí le mí mɛ. ¹⁷ Kliso lɔ lé nɔ míwo 'ji mɛ sɔ to xɔse mɛ yí a lí eke yi a ʒin goŋgoŋ le anyiɖu ci yí nyí lɔnlɔn mɛ. ¹⁸ Gahɔnmɛ ɔ, míwo kodo xɔsetɔwo pleŋ a sɛn eŋ a mɔŋje lehanci yí lɔnlɔn ci Kliso lɔ ɖo nɔ mì keke do, jinjin do, kɔkɔ do kodo lehanci yí é cito do mɛ. ¹⁹ Nɛnɛke lí a gbe jeshi Kliso lɔ lɔnlɔn ci yí lá eta nɔ agbetɔ ŋununyanyan kaka enu ci yí Mawu nyí a va ɖɔ mí mɛ blebu. ²⁰ Mawu ci yí a sɛn eŋ yí a wa edɔ le mí mɛ kaka sɔwu enu ci yí míwo biɔbiɔɛ alo ci yí le míwu susu mɛ so to Gbɔngbɔn ci yí le edɔ wagɔ le mì mɛ ji ²¹ tɔ yí nyí kanfukanfu le Mawu 'há lɔ mɛ kodo le Yesu Kliso lɔ mɛ le jijimɛwo pleŋ mɛ kaka a sɔyí mavɔmavɔ. Xoaɖyi!