¹ Míwo ɖe, mí ku sasa le gbɔngbɔnmɛ do míwo 'fɛnwawawo ŋci míwo nuvɔn ² ciwo yí mí wanɔ hwehɔnnu ci yí mí le xexegbɛ lɔ 'fiɔɖuɖu gɔnmɛ mɛ. Xexe cɛ 'ga ci yí nyí gbɔngbɔn ci yí le edɔ ji ɖɛyɛ le egufɔntɔwo domɛ, kpakpa acɛ do mí ji gahɔnmɛ. ³ Sasa lɔ ɔ, mìwo pleŋ cán, mí le amɛ hɔn lɔwo mɛ. yí zannɔ agbe lɔ shigbe lehanci yí é dro mìwo gbaza do nɛnɛ, yí wanɔ do enu ciwo yí vá susumɛ nɔ mì jí. Nɛnɛ ɔ, mìwo jɔjɔmɛ dradra mì dó ɖɛ́ nɔ́ Mawu dɔmɛzi shigbe lehanci yi é dradra amɛ kpɛtɛwo dó daɖɛ nɛnɛ. ⁴ Vɔ ɔ, Mawu ɖɔ́ kodo ŋshishikpɔkpɔ nɔ amɛ. Ɖó lɔnlɔn gangan ci yí é ɖó nɔ́ mì ŋci ɔ, ⁵ é ná yí mìwo ciwo yí kú vayi do mìwo 'fɛnwawawo ŋci fɔ́n dó agbe mɛ kodo Kliso lɔ. Xomɛvunu yí Mawu wa nɔ mí yí hwelɛn mí gan. ⁶ É bɔ fɔn mì dó eju kodo Kliso lɔ yi bɔ sɔ mì ɖó anyinɔnɔ le jeŋkushimɛ nɔxuwo mɛ le Yesu Kliso mɛ. ⁷ Nɔ́ nɛnɛ le hwenu ciwo yí gbɔgbɔ mɛ ɔ, á doasɛ lehanci yí xomɛvunu yitɔ lɔ gangan yí dó manumanu dó sɔ́ to yi dɔmɛnyɔnyɔ nɔ́ mì mɛ le Yesu Kliso mɛ. ⁸ Nyao ɔ, xomɛvunu lɔ 'ji yí Mawu tó yí hwlɛn mì gan sɔ to xɔse lɔ ci yí mì ɖo mɛ. Enu hɔn d'é só míwo gbɔ́ o, Mawu 'nunana yí é nyi. ⁹ D'é nyí kpɔ́ bé sɔ́ to míwo 'dɔwawawo mɛ yɔ o. Nɛnɛ ɔ, amɛɖekpokpoi d'a sɛn eŋ sɔ́ɛ geze o. ¹⁰ Ɖo ɔ, Mawu 'nuɖoɖo yí mí nyí; é ɖó mí le ɖeka ci mì wa kodo Yesu Kliso mɛ nɔ́ mì a wawa edɔ nyui ciwo yí é doŋkɔ yí drado ɖɛ́ bé nɔ́ mì a vá lé ecunu yi a wanɔ. ¹¹ Ci yí e le nɛnɛ ɔ, mí ɖo eŋui enu cɛ: míwo ciwo yí nyí amɛ manyi Yuɖatɔwo sasavayi le gbaza mɛ ɔ, amɛ ciwo yí nyí evosoiwo yɔnɔ mí be tɔtɔnɔwo. vɔ ɔ, gbazamɛ yí wowo nyí evosoi lɔwo le yí é nyi agbetɔwo 'lɔwo yí soi nɔ wowo. ¹² Nyao ɔ, Kliso lɔ de le mí mɛ hwehɔnnu o. mí de ɖó ejuvinyinyi 'cɛ ɖekpokpoi le Israyɛli 'ju mɛ o, mí nyi mɛdruwo nɔ́ Mawu 'gbeɖu lɔ 'zoɖuɖuwo; mí le xexe lɔmɛ kpoŋ sasa emɔkpɔkpɔmɛ male nɔ enue yí kpɔ́ mí mí de jeshi Mawo. ¹³ Vɔ ecɛyɛ ɔ, ci yí mí va lé yesu Kliso mɛ ɔ, míwo ciwo yí le azɔge nɔ mawu sasa ɔ mí va gogoi sɔ́ to Kliso lɔ 'hun mɛ. ¹⁴ Ɖó ɔ, Kliso lɔ yí ŋyí míwo fafa, eyɛ yí sɔ́ yuɖatɔwo wa jukɔn kuɖeka hwecinu yí é sɔ yiŋtɔ lankpu na yí to yɛ mɛ ɔ, é gban mama 'gli ci yí le wowo domɛ sasa soi: é yí nyí makpemakpe 'gbli. ¹⁵ sɔ́ to yí lankpu lɔ mɛ ɔ, é gu acɛ nɔ yuɖatɔwo 'sé lɔ, yi 'gbeɖeɖewo kodo yi sɛnsɛnɖoɖowo. É wɛɛ nɛnɛ keŋ yí sɔ́ to eyɛ mɛ ɔ, é sɔ jukɔn amɛve lɔwo wa agbetɔ yoyu kuɖeka yí fafa vá wowo gblamɛ. ¹⁶ Sɔ́ to eku ci yí é ku dó acisoga ji mɛ ɔ Kliso lɔ kpata amɛ hata eve lɔwo kodo Mawu dó lankpu kuɖeka mɛ yí dra wowo gblamɛ do. Eyi sɔ́ to acisoga ji 'kú mɛ ɔ, Kliso lɔ gu makpemakpe lɔ le yuɖatɔwo kodo amɛmanui yuɖatɔwo domɛ. ¹⁷ Kliso lɔ vá yí va dó fafa 'ŋɛnyui nɔ́ míwo ciwo yí le azɔge sasa kodo nɔ amɛ ciwo yí gogoi sasa. ¹⁸ Nyao ɔ, sɔ́ to Kliso lɔ ji ɔ, mì pleŋ lɔ bɔ ɖo acɛ a sɛ́n eŋ a yi Eda gbɔ kuɖeka ŋmɛ mɛ ¹⁹ Ci yí é le nɛnɛ ɔ, mí de gbe nyi mɛdruwo alo ejubumɛtɔwo go. Vɔ ɔ, mí nyí ejuɖekɛmɛtɔwo kodo xɔsetɔwo, yí le mawu 'xwemɛtɔwo domɛ. ²⁰ Wo cu mí do ete shigbe exɔ nɛnɛ dó anyiɖu ciwo yí Kliso lɔ 'mɛdɔdɔwo kodo mawu 'ŋɛdotɔwo ɖó ɖɛ́ ji; Yesu Kliso ŋtɔ yí nyí zogojikpe nɔ́ exɔ lɔ. ²¹ Eyɛ mɛ yí exɔcucu ci nu yí wo waɖaŋ wa ɖoɖo dó je ete le keŋ yí a nyi gbedoɖatɔxu kɔkɔɛ ɖɛka le Axwetɔ lɔ mɛ. ²² É yí ké mɛ yí wo cu míwo cán dó ete do eju keŋ nɔ́ mí a nyi Mawu nɔxu ɖeka le gbɔngbɔn lo mɛ.