¹ Ɖeviwo, mí se etonu nɔ́ míwo jitɔwo le Axwetɔ mɛ. Ɖó enu ci yí le jɔjɔɛɖe nɛ. ² «Bú edao kodo enɔo» yí nyí ese ŋkɔtɔ ci nu yí egbeɖu bɔdo le Mawu 'sewo mɛ bé ³ «nɔ́ agbemɛ a nyɔ́ nɔ́ eo yi ná nɔ agbejiji le nyigban jí.» ⁴ Míwo evidawo, mí ŋgbe dono domɛzi nɔ míwo 'viwo go. Vɔ ɔ, mí hen wo sɔ to enukplankplan kodo afɔɖoafɔtanɔamɛ 'nyɔ Axwetɔ tɔwo mɛ. ⁵ Míwo hwashiwo, mí se etonu nɔ́ míwo 'xwetɔ nyigban cɛ ji tɔwo. Mí se etonu nɔ́ wo le vɔnvɔn nɔ́ amɛ kodo hunhunhun mɛ, kodo míwo 'jifaa shigbe lehanci yí mí senɔ etonu nɔ́ Kliso lɔ dó nɛnɛ. ⁶ Ŋgbé nyi ŋmɛ ɖekɛ yí mí a shinɔ nɔ wo nɔ á le shigbe bé agbetɔ yí mí jijiɛ a je eŋ nɔ nɛnɛ go. Vɔ ɔ, mí shinɔ wo shigbe bé Kliso lɔ hwashiwo yí mí nyi yí wawa do Mawu 'dró jí kodo míwo ji blebu nɛnɛ. ⁷ Mí wa edɔ nɔ wo kodo edronyui shigbe Axwetɔ hwashiwo nɛnɛ. Mí ŋgbe wɛɛni shigbe lehanci yí agbetɔwo hwashiwo wɛɛni do nɔ́ wowo 'xwetɔwo nɛnɛ go. ⁸ Mí a nyá dɛ́ bé, amɛɖɛka amɛɖeka, hwashi can amɛmanyi hwashi a vá xɔ efɛncu le Axwetɔ gbɔ nɔ enunyui ci yí é wa yiŋtɔ. ⁹ Vɔ míwo axwetɔwo ɔ, mí klpɔ míwoɖekiwo dó alɔ ŋmɛɖeka lɔ jí ɖaɖa míwo hwashiwo gbɔ́. Mí ŋgbe kannɔ adan nɔ wo go mí a nyá ɖɛ́ bé wowo kodo míwo 'xwetɔ te jeŋkushimɛ yí le eyɛ gbɔ ɔ, vovototo dodoamɛmɛ de li go. ¹⁰ A sɔ́ vɔ anyi 'nyɔ ɔ, mí nyi ŋsɛntɔnɔwo le Axwetɔ lɔ mɛ sɔ to yi ŋsɛn enuwopleŋjikpetɔ mɛ. ¹¹ Mí sɔ mawu 'hwawanuwo pleŋ sɔ́ kplá keŋ yí a sɛ́n eŋ a nɔ et gliŋ le legba 'dɔwawawo ŋkɔ. ¹² Nyao ɔ, d'é nyí agbetɔ, ci nyi gbaza kodo ehun yí mì le ahwa wagɔ kodo go. Vɔ ɔ, gbɔngbɔnmɛ 'gawo; gbɔngbɔnmɛ 'cɛkpakpawo, vivicimɛ ŋsɛn xexe cɛ mɛtowo kodo gbɔngbɔnmɛ ŋsɛn baɖa ciwo yí le ejixomɛ nɔxuwo mɛ yí mì le ahwa wagɔ kodo. ¹³ É yí na taɖo ɔ, mí sɔ Mawu 'hwawanuwo pleŋ sɔ́ kplá keŋ nɔ mí a sɛn eŋ a cu afɔ egu gligán le ŋkeke 'vɔn lɔ gbe. Eyi nɔ mí do ŋsugo le ahwa lɔ mɛ kodoi sɔyi vɔvɔnu ɔ mí a kpɔtɔ a le ete góŋgóŋ. ¹⁴ Ɛɛ, mí nɔ ete gliŋ: mí sɔ nyɔnɔnuitoto wa kpablanu yí a sɔ ta keŋ yí a sɔ jɔjɔnyinyi wa akɔncnnuga. ¹⁵ Mí sɔ kpakpa ci yi sɔnɔ amɛ nɔ fafa 'ŋɛnyui lɔ dodo nɔ amɛwo sɔ wa fɔkpa yí a dó dó afɔ. ¹⁶ Le nɔnɔmɛwo pleŋ mɛ ɔ, mí sɔ xɔse 'kpoxɔnu yí a sɔ́ ciciɛ ezo 'hwa ciwo yí amɛvɔn lɔ a dada mí. ¹⁷ Mí sɔ xɔxɔ ci Mawu xɔ mí gan sɔ́ cɔ́n shigbe ahwakuku nɛnɛ yí a sɔ Mawu 'nyɔ wa Gbɔngbɔn kɔkɔɛ dekpi do alɔmɛ. ¹⁸ Mí wa nɔ gbedoɖa hweɖekpokponu to Gbɔngbɔn lɔ jí a wawa gbedoɖa kodo kukuɖeɖe hata ɖekpokpoi. Ci yí e le nɛnɛ ɔ, mí nɔ zanŋte yí a lé gbedoɖa wawa do ecunu mamimami yí a ɖenɔ kuku nɔ mawu dó xɔsetɔwo pleŋ 'ta. ¹⁹ Mí wanɔ gbedoɖa dó eta nɔ enyɛ can b& nɔ́ ŋ ke enu ɔ, Mawu a sɔ́ enyɔ nɔ ŋ nɔ́ ma dré enudanŋdonu ci yí le eŋɛnyui lɔ mɛ nɔ amɛwo kodo 'kankandoji. ²⁰ Eŋɛnyui hɔn lɔ 'fɔɖotetɔ yí enyɛ, ŋ nyi le awlɛgawo mɛ le elɛ; é yí na taɖo ɔ, mí wa gbedoɖa nɔ mawu dó eta nɔ ŋ nɔ́ á na nɔ ma sɛn eŋ xoxoɔ nuxu so Eŋɛnyui lɔ nú kodo kankandoji shigbe lehanci yí é je do nɛnɛ. ²¹ Nɔ́ míwo cán, mí a sɔ́ nyá nɔnɔ mɛ ci mɛ yí ŋ le ɔ, Tishiki, nɔvi le Axwetɔ lɔ mɛ, edɔwatɔ egbejinɔtɔ ɖeka a vá yí a ɖe enyɔwo pleŋ mɛ nɔ mí. ²² Ŋ dɔdɔɛ ɖaɖa mí gbɔ akpobutɔ nɔ́ mí a sɛ́n eŋ jeshi nɔnɔmɛ ci mɛ yí mì le yí nɔ́ á gbe do ŋsɛ lanmɛ nɔ mí. ²³ Mawu Eda kodo Axwetɔ Yesu Kliso lé ná fafa kodo lɔnlɔn nɔvi ciwo pleŋ yí le xɔse mɛ. ²⁴ Mawu lé wa xomɛvunu nɔ́ amɛ ciwo pleŋ yí lɔnnɔ mìwo 'xwetɔ Yesu Kliso kodo lɔnlɔn mavɔmavɔ.