¹ Eyi Avɔsatɔ gangantɔ nú nɔ Etiyɛnu be: « Nyɔnɔnui yí nyi enyɔ ci yí wo nunuɔ so eo nu a?» ² Eyi Etiyɛnu ɖoŋci be: « Fofonyɛ wo kodo edanyɛwo, mí ɖo eto yí a se enyɔ ci yí na nú. Gbɔxwe yí mìwo togbi Ablahamu a hun le Mezopotami a vayi ci Halanu ɔ, Mawu kafukajenɔtɔ ɖe yiɖeki dansin nii yí nú nii be: ³ "Hùn le ao 'ju kodo ao xomu mɛ keŋ a yi ci eju ci yí na dansin nɔ eo mɛ." ⁴ Eyi Ablahamu so le Kalude 'kan mɛ yí vayi ci Halanu. Ci yí edalɔ ku godu ɔ, Mawu na yí é hun le Halanu yí vayi fini ci yí mì va le egbɛ viɛ. ⁵ Gahɔnmɛ ɔ, Mawu de kan nyigban afɔkpanu ɖeka kpetii le nyigban lɔ nú nɔ Ablahamu be yí a nyi yiŋtɔtɔ go. Vɔ ci yí evi de le Ablahamu shi cán go ɔ, Mawu ɖó egbe nii be ye a sɔ́ nyigban lɔ na yi kodo yi jijimɛviwo yí nɔ yi vá ku cán ɔ, yi a nyi yo jijimɛvi lɔwo tɔ tɛgbɛɛ. ⁶ Enyɔ ci yí Mawu nu nɔ Ablahamu lɔ yi nyi :" Ao jijmɛviwo a vayi ci mɛdru nyigban ji le eju ɖeka mɛ. Wo a sɔ wo wa hwashi yí a ɖe efun nɔ wo a sɔ na exwe sanŋdi nɛ ( 400 ). ⁷ Vɔ ɔ, enyɛ Mawu yí a ɖo kojo kodo ju kɔn ci yí a sɔ wo wa hwashi lɔ. Le i godu ɔ, wo a so le ehɔntɔxu yi a va sɛn ŋ le elɛ." ⁸ Le enyɔ hɔn wo godu ɔ, Mawu ɖu ezo kodo Ablahamu yi nú nii be nɔ wo ji evi le xomu ɖe mɛ ɔ, wo ɖo a so evo nii a sɔ dansin be ye ɖu ezo kodo eyɛ Ablahamu. É yi ná taɖo ci yí wo ji Izaki yi é xɔ ŋkeke amɛ nyi ɔ, Ablahamu so evo nii. Izaki, yɛ va so evo nɔ Ʒakɔbu yi Ʒakɔbu va soi nɔ amɛ ciwo yi va trɔ míwo tɔgbi wive lɔwo. ⁹ Tɔgbi lɔwo hwan eŋ kodo Ʒosɛfu yí sɔ sa hwashi nɔ́ wo a hiin yi Eʒiputu. Vɔ ɔ, Mawu le kodoi. ¹⁰ Yi ɖii toi le yi funkpekpewo mɛ Mawu lɔ na ŋunuyanya yi yí yi je eŋ nɔ Falawɔn, Eziputu 'fiɔ yí yɛ sɔ ɖo Eziputu 'ju lɔ pleŋ kodo efiɔxwemɛjikpɔtɔ. ¹¹ Ecɛ viɛ ɔ, shive va to le afishafi le Eʒiputu kodo Kanaan 'kan mɛ. Efunkpekpe va sugbɔ. Mìwo tɔgbi lɔwo de gbe kpɔ enuɖe yi a ɖu go. ¹² Ci yí Ʒakɔbu va se be eliku le Eʒiputu ɔ, é va dɔ míwo tɔgbi lɔwo ɖaɖa ŋkɔtɔ. ¹³ Zevetɔ lɔ ci yi wo yi ɔ, Ʒozɛfu va ɖe amɛ ci yí é nyi gɔnmɛ nɔ fofoɔ wo. É yi Falawɔn va nyá xomu ci mɛ yí Ʒozɛfu so. ¹⁴ Le yi godu ɔ, Ʒozɛfu va dɔ fofoɔ lɔwo be wo le yi kplɔ yedaye Ʒakɔbu kodo xomu lɔ keŋ keŋ vɛ nɔ eye. Wo pleŋ lɔ nyi agbetɔ eka howi howo hoatɔn. ¹⁵ Nɛnɛ yí Ʒakɔbu vayi ci Eʒiputu do nɛ. Ehɔntɔxu yí yi kodo mìwo tɔgbi kpɛtɛwo va nɔ yí ku nɛ. ¹⁶ Wo sɔ wowo 'cɔwo yi Shishɛmu jugan mɛ yí vayi ɖyi wo do yɔdu ci yí Ablahamu sɔ eho xwle le Hamɔ eviɛ wo shi mɛ. ¹⁷ Ci yí gamɛ tɔ sunsun nɔ Mawu yi a wa do egbe ci yi é ɖo nɔ Ablahamu ji ɔ, jukɔn lɔ jijiɛ yí susuɔ egbɔ do jí le Eʒiputu. ¹⁸ Vɔ gbeɖe ka ɔ, efiɔ ɖeka va xɔ ʒinkpin le Eziputu. Efiɔ lɔ yɛ de jeshi Ʒozɛfu sasa vayi go. ¹⁹ Efiɔ hɔn lɔ wa aye yí flu mìwo jukɔn lɔ yí ɖe efun nɔ mìwo tɔgbiwo yí gbe ʒin amɛwo ji be nɔ wo a shi gbe wowo 'viwo ɖɛ nɔ wo ŋgbe nɔ agbe go. ²⁰ Gahɔnmɛ yí wo ji Mɔyizi do nɛ. Mɔyizi nyi evi nya kpɔkpɔ ɖeka le Mawu ŋmɛ. Wo hiin le eda lɔ xwe mɛ na wleci amɛtɔn. ²¹ Ci yí edalɔ kodo enɔlɔwo tashii ɖɛ ɔ, Falawɔn eviɛ nyɔnuvi ɖeka va kpɔɛ yi sɔɛ yí hiin shigbe yiŋtɔ 'vi nɛnɛ. ²² Wo hɛn Mɔyizi le Eʒipututɔwo ŋununyanya wo pleŋ mɛ. É ɖo ŋsɛn le nuxu xoxo kodo enu wawa mɛ. ²³ Ci yí Mɔyizi xɔ exwe eka vɔ ɔ, susu va nii be ye a yi ji ye nɔviye Israyɛliviwo kpɔ. ²⁴ É kpɔ yi Eʒiputu tɔ ɖeka le efun ɖeɛ nɔ Israyɛlivi ɖeka. É ji be ye a hwlɛn ata nɔ Israyɛlivi lɔ yí wu Eʒiputu tɔ lɔ yí sɔ ɖe ehlɔn nii. ²⁵ É bubuɔ be yetɔye Israyɛliviwo a mɔŋje mɛ be ji Mawu jijiɛ a to eye ji yí a xɔ nɔ wo vɔ kpɔ wo de mɔŋje mɛ go. ²⁶ I ŋkegbu ɔ, Mɔyizi va kpɔ Israyɛliviwo le evu waa. E ji be ye a ɖa wo yí a kpaca wo. É nu nɔ wo be: " Nyaŋ xlɔwo, ci yí mí nyi amɛ ɖeka wo ɖee, nyi yí jɔ yí mí le evu waa kodo míwonɔnɔwo ɔ?" ²⁷ Vɔ ɔ, amɛ ci yí le nɔviɛ xoɔ cucu Mɔyizi ɖaɖa yí nú be: "Mi yí sɔ eo ɖo ega kodo kojoɖotɔ nɔ mí ɔ". ²⁸ Ji é jijiɛ be ye a wu enyɛ shigbe lehanci yí é wu Eʒiputɔ lɔ do esɔ nɛnɛ yɔ a?" ²⁹ Ci yí Mɔyizi se enyɔ hɔnwo ɔ, é shi yí vayi Madiyanu 'ju mɛ . É nɔ ehɔn shigbe mɛdru nɛnɛ kaka ji evi amɛve . ³⁰ Exwe eka godu ɔ, Mawu dɔla ɖeka va ɖe yiɖeki dansin nii to avekui ɖeka ci yi bibiɛ ezo le zogbe ci yí le axa nɔ Shinayi 'tó ji. ³¹ Mɔyizi kpɔɛ, eyi é ji eŋ nii. Vɔ ci yí é zɔn yiyiɛ gbɔ yí a kpɔɛ nyuiɖe ɔ, Mawu 'gbe ɖyi va ehɔn be : ³² "Enyɛ yí nyi tɔgbiowo Mawu, Ablahamu, Izaki kodo Ʒakɔbu Mawu." Vɔnvɔn ɖo Mɔyizi yi é hunhunhuɔn kaka de gbe do eji yi a le ŋkuvi do Mawu dɔla lɔ nú go. ³³ Eyi Mawu nu nii be: "Ɖe fɔkpawo le afɔ ɖo ɔ, tɛxwe kɔkɔɛ yí nyi fini ci yí è ci ete do . ³⁴ Ŋ kpɔ lehanci yí wo ɖeɖeɛ efun nɔ nyaŋ jukɔn do le Eʒiputu nyuiɖe. Ŋ se lehanci yí é nyɛnyɛ edɔ do eyi ná taɖo yi ŋ ɖyi va be na ɖii toi le mɛ . Ecɛ viɛ ɔ, và. Ŋ jijiɛ a dɔ eo ɖaɖa Eʒiputu." ³⁵ Mɔyizi hɔn lɔ yí Israɛliviwo gbé yi nu nɔ be: "Mi yí sɔ eo ega kodo kojoɖotɔ ɔ?" Vɔ ɔ, é yí lɔ ke yí Mawu va dɔ ɖaɖa, to Mawu dɔla ɖeka ji yí sɔ ɖo ega nɔ wo yí é xɔ nɔ wo le Eʒipututɔwo shi. Mawudɔla lɔ dansin yiɖeki nɔ Mɔyizi le avekui ɖeka mɛ. ³⁶ Moyizi kplɔ Israyɛliviwo toi le Eʒiputu yí wa enu danŋdowo kodo jeshiduwo le eju lɔ mɛ, le Klogbu 'xu lɔ tu, le zogbe lɔ mɛ sɔna exwe eka. ³⁷ Mɔyizi lɔ ke yí nu nɔ Israyɛliviwo be: "Mawu a na yí yi 'ŋɛdotɔ ɖeka a tó so míwo xomu mɛ yí á dɔɛ ɖaɖa mí shigbe lehanci yí é dɔ ŋ ɖaɖa do nɛnɛ." ³⁸ Gacimɛ yí jukɔn lɔ bɔdo zogbe lɔ mɛ ɔ, Moyizi li . Mɔyizi lɔ yí nɔ gblamɛ nɔ mìwo tɔgbiwo kodo Mawu dɔla lɔ le Shinayi 'tó ji yí xɔ agbe 'nyɔwo so gbɔ́ yí va nu nɔ mì. ³⁹ Vɔ ɔ, mìwo tɔgbiwo de ji be yewo a ɖo eto yi go. Wo gbii. Eʒiputu trɔtrɔyi yí le eji mɛ nɔ wo. ⁴⁰ Wo nú nɔ Ahalɔn be: " Li voju ciwo yí a kplɔ mì nɔ mí. Ɖo Mɔyizi hɔn ci yí kplɔ mì toi so Eʒiputu ɔ, mì de nya enu ci yí va tɔ wɛɛwɛɛ cucucu go." ⁴¹ Eyi le ŋkeke hɔn wo ji ɔ, wo mɛ xwenyivi ɖeka nɔ wowo ɖekiwo. Wo sà avɔ nɔ voju togbovi lɔ yí ɖu azan nii; eyɛ ci yí wowoŋtɔwo sɔ alɔ sɔ mɛ. ⁴² Eyi Mawu ɖe ekɔ so wo nu yí tashi wo yí wo le jiŋkushimɛ wlɛciviwo sɛɛn. Nɛnɛ yí Mawu 'ŋɛdotɔwo núi yí wo ŋwlii do wema mɛ daɖɛ be: "Israyɛli jukɔn, ci mí wa exwe eka le zogbe mɛ ɖe, enyɛ Mawu yí mí wuwuɔ elanwo yí sɔ sasaa avɔ nɔ a? ⁴³ D'é nyi agbaxɔ mí cu nɔ voju Mɔlɛki ci mí li yí sɛn ba? Mí doŋdo nɔ enu mɛmɛ hɔnwo! É yí ná taɖo ɔ, na ná yí mí a yi nyí mɛdru le nyigban buwo ji le kaka Babilɔnu godu ɖàa." ⁴⁴ Agbaxɔ ci yí ɖenɔ kunu be Mawu li kodo mìwo togbiwo le mìwo tɔgbi lɔwo shi sasa le zogbe lɔ mɛ. Nɔnɔmɛ ci yí Mawu dansin nɔ Mɔyizi ji yí wo wɛɛ do . É cui shigbe le Mawu nu nii be yi le cui nɛnɛ. ⁴⁵ Agbaxɔ cɛ yí mìwo tɔgbiwo xɔ so wowo 'dawo gbɔ́ le wo shi gaci mɛ yi Ʒozuwe kplɔkplɔ wo yi wo xɔ eju lɔ le jukɔn ci yí Mawu doŋkɔ yi nya soi nɔ wo shi . Vadagba lɔ nɔ ehɔntɔxu kaka vá sɔ na Davidi gamɛ. ⁴⁶ Davidi 'nu jɔnɔ eji nɔ Mawu. É yi ná taɖo yi é biɔɛ egbe yi be ye a cu axwe kɔkɔɛ ɖeka nɔ Ʒakɔbu jijimɛviwo. ⁴⁷ Vɔ ɔ, Salomɔ yí va cu axwe nɔ Mawu. ⁴⁸ Gankegan kpɔ Mawu ci yí nɔnɔ eji boo de nɔnɔ exɔ ciwo yi agbetɔwo cu mɛ go, shigbe lehanci Mawxu 'ŋɛdotɔ ɖeka núi daɖɛ do nɛnɛ be: ⁴⁹ Axwetɔ Mawu nú be " Jiŋkushi nyi nyaŋ 'fiɔʒinkpin yí nyigban nyi nyaŋ 'fɔɖojinu. Exɔ hin han yí mí a sɛ́n eŋ cu nɔ ŋ ɔ? Fini yi na sɛ́n eŋ nɔ yí a gbɔn do mɛ ɔ? ⁵⁰ D'é nyi nyaŋ 'lɔnudɔwawawo yí nyi hɔnwo plɛŋ ba?" ⁵¹ Míwo etotritɔwo, ŋtashintɔwo kodo Mawugbemasetɔwo, mi fɔn nɔ egu tɛgbɛɛ do gbɔngbɔn kɔkɔɛ ji shigbe lehanci yí míwo tɔgbiwo wɛɛ do vayi nɛnɛ. ⁵² Mawu 'ŋɛdotɔ hin yí míwo tɔgbiwo de ci yumɛ nɔ vayi go ɔ? Wo wu amɛ ciwo yí nú daɖɛ be amɛ jɔjɔɛ kuɖeka lɔ le emɔ ji gbɔgbɔ. Egbɛ viɛ ɔ, amɛ jɔjɔɛ lɔ yí míwo sɔ doashi nɔ amɛwo yí wo wu. ⁵³ Míwo ciwo yí xɔ Mawu 'sé lɔwo so Mawu dɔlawo gbɔ taŋ yi gbé be yewo d'a wa do wo ji go!» ⁵⁴ Ci yí amɛ ciwo, yí le ehwɛxɔnu lɔ se Etiyɛnu 'nyɔ cɛ wo ɔ, wo do dɔmɛzi yí tɔ aɖukli ɖuɖu do Etiyɛnu nu. ⁵⁵ Vɔ ci yi Gbɔngbɔn kɔkɔɛ ɖɔ eyɛ ɔ, yɛ ɖe ekɔ kpɔ eji yí kpɔ Mawu klɛnklɛn kodo Yesu ɖaɖa yí Yesu le ete le ɖushi mɛ nɔ Mawu. ⁵⁶ Eyi é nu nɔ amɛ wo be: « Ŋ kpɔ jiŋkushi le hùnhùn yi amɛ Agbetɔvi lɔ le ete le ɖushi mɛ nɔ Mawu.» ⁵⁷ Eyi amɛ lɔwo do axwa sɛnŋsɛnŋɖe yí cú eto yi wo pleŋ lɔn wuu cɔn Etiyɛnu ji. ⁵⁸ Yí nyi toi le jugan lɔ mɛ yí tɔ ekpe xoxoi kaka nɔ aku. Enu lɔ tɔxukpɔtɔwo ɖe wowo 'wuwo dado ɖajɛvi ɖeka ci yí wo yɔnɔ be Sɔlu gbɔ. ⁵⁹ Gacimɛ wo le ekpe lɔ dɛɛ ɔ, Etiyɛnu do egbe ɖaɖa be: « Axwetɔ Yesu, xɔ nyaŋ gbɔngbɔn!» ⁶⁰ Eyi é je eklo yí do axwa be: « Axwetɔ ŋgbe dro enuvɔn cɛ gban nɔ wo go! » Enyɔ lɔ yí é nu ɖegbɔ ahan yi fa.