¹ Sɔlu xɔ egbe do Etiyɛnu wuwu ji. Gbehɔngbe lɔ ke ɔ, wo tɔ yumɛ cici sɛnŋsɛnŋɖe nɔ Mawu ha lɔ ci yi le Ʒeluzalɛmu. Xɔsetɔ lɔwo pleŋ gbanhlɛn yi jeŋkɔ Ʒude kodo Samali kanwo mɛ. Amɛdɔdɔ wo ɖekɛ yi kpɔtɔ ci Ʒeluzalɛmu. ² Amɛ ciwo yi donɔ bubu Mawu nu domɛtɔ ɖekawo sɔ Etiyɛnu cɔ yi dyii yi fiin nyuide. ³ Sɔlu yɛ le agbla jeɛ be ye a gban Mawu ha lɔ. E ɖo nɔ axwewo mɛ, axwewo mɛ yi lenɔ xɔsetɔ, nyɔnuwo kodo ŋsuwo donɔ gakpamɛ. ⁴ Amɛ ciwo yi gbanhlɛn le Ʒeluzalɛmu lɔ toto afi, afiwo yi le eŋɛnyui lɔ doɔ yi yiyiɛ. ⁵ Filipu yi Samali jugan mɛ yi vo nuxu so kliso lɔ nu nɔ wo kodo axwa. ⁶ Ci yi eju lɔ mɛ tɔwo pleŋ se enyɔ ciwo yi Filipu nunu ɔ yi gbe kpɔ jishidu ciwo yi e wawa ɔ, wo sɔ egbe ɖo eju yi xɔ enyɔ lɔwo. ⁷ Ɖo ɔ, gbɔngbɔn vɔnwo dodo axwa sɛnsin yi toto le amɛ sugbɔ mɛ. Ekplɛwotɔwo tɔ zɔnlin yi ebutɔntɔntɔwo can gbe tɔ zɔnlin zɔnzɔn nyuide. ⁸ Enu lɔwo jɔ eji nɔ eju lɔ mɛtɔwosugbɔ. ⁹ Ŋsu ɖeka le jugan lɔ mɛ sasa xoxoxo. Wo yɔɛni be Simɔ, ŋsu lɔ wanɔ maziki nuwo. Samali jukɔn lɔ kpɔɛni yi é ji nɔ eŋ nü ŋsu lɔ nunɔ be eye yi nyi ŋsɛntɔ. ¹⁰ Amɛshamɛ ci le jugan lɔ mɛ, so ɖeviwo ji kaka va je mɛganxoxuwo ji ɔ, wo ɖonɔ eto yi yi nunɔ be Mawu ŋsɛn ci wo yɔnɔ be « ŋsɛn gangan» le eye shi. ¹¹ Wo ɖonɔ eto yi. Ɖo mazikinu ciwo é wanɔ tɔ eŋ jiji nɔ wo yɛ́ ɔ, yi tɔxu de sɔ o. ¹² Vɔ ci Filipu va dó eŋɛnnyui lɔ nɔ wo so Mawu fiɔɖuɖu lɔ kodo amɛ ci yi Yesu kliso nyi nu yi wo xɔ enyɔ lɔwo ji se ɔ, wo wazinzindo tɔmɛ Mawu tɔ nɔ wo, le ŋsu mɛ, le nyɔnu mɛ. ¹³ Siwɔ lɔ ŋtɔ can xɔ enyɔ lɔwo ji se kaka wo le Mawushi nii yi é kplɔ Filipu do. Ci yi é kpɔ jeshidu kodo enujiŋ gangan ciwo Filipu wawa ɔ, wo je eŋ nü. ¹⁴ Amɛdodɔ ciwo yi le Ʒeluzalemu se be samalitɔwo kando Mawu nyɔ lɔ ji yi dɔ Piyɛ kodo Ʒan ɖaɖa wo gbɔ. ¹⁵ Ci yi wowo vayi ɖo ɔ, wo wa egbedo-do ɖaɖa do eta nɔ vɔsetɔ lɔwo nɔ wo a xɔ gbɔngbɔn kɔkɔɛ. ¹⁶ Do ɔ, gbɔngbɔn kɔkɔɛ de dyiva amɛɖe ji le wo mɛ hɔɖe o. Mawushi ɖekɛ yi wo le nɔ le Axwetɔ Yesu nyikɔ mɛ. ¹⁷ Eyi Piyɛ kodo Ʒan sɔ alɔ dado wo ji yi wo xɔ gbongbɔn kɔkɔɛ lɔ. ¹⁸ Ci yi Simɔ kpɔ be nɔ awɛdɔdɔ lɔwo sɔ alɔ dada sɔsetɔ lɔwo ji, wo xɔxɔ gbɔngbɔn kɔkɔɛ ɔ, é na eho Piyɛ kodo Ʒan. ¹⁹ Yi nú nɔ wo be: « Mi na ŋsɛn hɔn enyɛ can. Gahɔnmɛ nɔ ŋ sɔ alɔ dado amɛɖe ji ɔ, a xɔ gbɔngbɔn kɔkɔɛ. » ²⁰ Vɔ ɔ, Piyɛ nu nii be: « Eo kodo ao ho lɔ le trɔn. Ɖo yɛ bubu be ye a sɛn eŋ xwle Mawu nunana kodo eho! ²¹ Enuɖe kan eo le enyɔ cɛ mɛ go. Ɖo ɔ, eo ji mɛ de kɔ le Mawu gbɔ o. ²² Ci yi é le ahan ɔ, tashi susu vɔin hɔn yi aɖe kuku nɔ Mawu lɔ. Taŋfɔin ɔ á sɔ susu lɔ ci yi le eji mɛ nɔ eo ke eo. ²³ Ɖo ɔ, ŋ kpɔ be ŋhwan kodo enudɔndɔn bla eo do ete ɖɛ.» ²⁴ Eyi simɔ nu nɔ Piyɛ kodo Ʒan be:« Miwoŋtɔwo le wa egbedodoɖoɖa nɔ Mawu do eta nɔ ŋ nɔ enyɔ ciwo mi nu hɔnwo domɛtɔ ɖe ŋgbe va jɔ do ŋ ji o.» ²⁵ Ci yi Piyɛ kodo Ʒan nu Mawu nyɔ lɔ yi sɔ ɖe kunu nü ɖegbɔ ɔ, wo trɔ jeŋkɔ Ʒeluzalɛmu. Le emɔ ji ɔ, wo do Axwetɔ ŋɛnyui lɔ le Samalia kɔxwi sugbɔ mɛ, gbɔxwe vayi ɖo. ²⁶ Mawu cikplɔtɔ ɖekanu nɔ Filipu be: « So jeŋkɔ fɔde agé a sɔ emɔ ci yi so Ʒeluzalɛmu yi yi Gaza jugan mɛ. Amɛɖekpokpui de le emɔ lɔ ji o.» ²⁷ Eyi Filipu so jeŋkɔ zeɖeka. Hɔn ɔ ŋsutata Etiwopi fiɔhadɔwatɔ gangan ɖeka vayi sɛn Mawu le Ʒeluzalɛmu. E yi kpɔnɔ dɔkunuwo pleŋ ji nɔ kandashi, nyɔnu ci yi ɖu efiɔ le Etiwopi. ²⁸ E trɔ so Ʒeluzalɛmu lɔ yi vayikɔ axwe. E nɔ anyinɔnɔ do yi hwahun ji yi le enu hlɛnhlɛn sɛnsɛn le Mawu ŋɛdotɔ Ezayi wema mɛ. ²⁹ E yi gbɔngbɔn kɔkɔɛ nu nɔ Filipu be :« Ɖeblɛ a xotɔ ahwahun hɔn.» ³⁰ Filipu shi eju yi xotɔɛ yi se yi Etiwopitɔ lɔ le enu hlɛn le Mawu ŋɛdotɔ Ezayi wewa mɛ. Eyi Filipu nu nii be: « E se enu ci yi e hlɛn hlɛn gɔnmɛ a ?» ³¹ Ŋsu lɔ ɖoŋci nii be:« le na wɛɛ yi a se gɔnmɛ nü nɔ amɛɖe de ɖemɛ nɔ ŋ o ɔ?» Eyi e yɔ Filipu be yi le ɖo ahwahun lɔ mɛ yi a va nɔ axa nɔ eye. ³² Wo ŋwle do fini ci yi e hlɛn hlɛn le wema lɔ mɛ be:« Amɛ lɔ le shigbe lɛngbɔ ci yi wo kplɔ yigɔ wuwugbe nɛnɛ. E bɔ enu kplii shigbe lɛngbɔvi a wo soso efu kpɔtɔ le gotu nɔ nɛnɛ. Déke enu yi nu enyɔ ɖe o. ³³ Wo do ŋkpɛn yi. Vɔ kpɔ wo de so kodo jɔjɔɛ nii o. Ciyi wo gu eta nɔ yi gbe le xexe cɛ mɛ ɖee, Mi yi a sɛn eŋ xo nunu so yi jijimɛviwo nu ɔ ?» ³⁴ Etiwopi fiɔhadɔwatɔ lɔ ɖe kuku nɔ Filipu yi biɔɛ se be:« Mi nu yi Mawu ŋɛdotɔ Ezayi xoxo nuxu so ahan ɔ ? yiŋtɔ nú yɔ a alo amɛ bu nu? » ³⁵ Eyi Filipu xɔ nuxu yi nu Yesu ŋɛnyui lɔ nü sɔ tó enyɔ ci yi le hɔntexu nɔ Ezayi wema lɔ ji. ³⁶ Wo le emɔ lɔ ji yi yikɔ yi vayi ɖo afiɖeka ci yi eshi xɔ do. Efiɔhadɔwatɔ lɔ nú nɔ Filipu be :« Eshi nɛ. Ŋyi yi kpɔtɔ yi wo ado eshi ta nɔ ŋ ɔ?» ³⁷ Filipu doŋci nú be: « Nɔ é nɔ Yesu ji se kodo ao ji blɛbu vɔ wo a do eshi ta nɔ eo dru.» Eyi ŋsu lɔ ɖoŋci nü be: « ŋ xɔɛ ji se be Yesu Kliso yi nyi Mawu Eviɛ lɔ?» ³⁸ Le i gadu ɔ é dɔ yi wo ɖo ete ahwahun lɔ. Filipu kodo ŋsu lɔ dyi yi ɖo ashi lɔ mɛ. Eyi Filipu do eshi ta nii. ³⁹ Ci yi wo to le eshi lɔ mɛ ɖegbɔ ɔ, Mawu gbɔngbɔn ko Filipu le ŋsu lɔ gbɔ yi d'e gbe kpɔɛ o. Vɔ ɔ? ŋsu lɔ le yi mɔ do enu kodo jijɔ. ⁴⁰ Filipu yɛ ɔ, kaka Azotosu jugan mɛ mɛ yi yɛ vayi toto do yi jeŋkɔ sezale jugan mɛ agé. Nɔ e ɖo jugan ɖe mɛ, é nunɔ eŋɛnyui lɔ le hɔntexu. Ahan yi é wɛwɛɛ kaka vayi ɖo nɛ