¹ Le ŋkeke hɔnwo jí ɔ, nukplanviwo va le egbɔ suɔ do jí yi Yuɖatɔ ciwo yí se Glɛkigbe le enyɔ toɔ, nɔ ciwo yi le Eblegbe doɔ be nɔ wo le enu ɖuɖu maa gbeɖeka dùu ɔ, wo de nanɔ yewo kposhiwo nyuiɖe go. ² Eyi amɛdɔdɔ wive lɔwo va yɔ nukplanvi sugbɔ lɔwo yí nu nɔ wo be: « D'é nyɔ be mí a tashi Mawu 'nyɔ nunu ɖɛ yí a vayi le enuɖuɖu maa go. ³ É yí na taɖo ɔ, nɔvinyɛwo, mí can ŋsu amɛdrɛ le miwonɔnɔwo mɛ yí a sɔ edɔ hɔn doashi nɔ wo. Ŋsu lɔwo ɖo a nyi amɛ ciwo nu wo ɖenɔ kunu nyui so, amɛ ciwo yí Gbɔngbɔn kɔkɔɛ ɖɔ kodo amɛ ciwo yí nya ŋunuɖɛ. ⁴ Míwo yɛ ɔ, mí wo a sɔ́ míwo gamɛ wo jo nɔ gbedoɖa wawa kodo Mawu nyɔnunu 'dɔ́ koŋ.» ⁵ Enyɔ ci yí wo nu lɔ jɔ eji nɔ agun lɔ pleŋ. Eyi wo can Etiyɛnu amɛ ci yí xɔ Mawu ji se nyuiɖe yí Gbɔngbɔn kɔkɔɛ ɖɔ mɛ, Filipu, Plokɔ, Nikanɔ, Timɔ, Pamɛnasu kodo Nikola, Antiwɔshitɔ ci yí de xɔ Mawu ji se sa gbɔxwe yi va ɖo Yuɖatɔwo sɛnsɍn mɛ go. ⁶ Wo dansin amɛ lɔwo nɔ amɛ dɔdɔ lɔwo yí wo do egbe ɖaɖa nɔ wo yí wo sɔ alɔ dado eta nɔ wo. ⁷ Mawu 'nyɔ lɔ kankaan do jí yí yiyiɛ. Nukplanvi wo va susuɔ egbɔ do ji haan le Ʒeluzalɛmu yí Yuɖatɔwo 'vɔsatɔwo sugbɔ va xɔxɔɔ Yesu ji se. ⁸ Etiyɛnu ɖɔ kodo xomɛvu kodo ŋsɛn yí le enu danŋdo wo kodo jeshidu ganganwo waa le jukɔn lɔ dodomɛ. ⁹ Eyi ŋsu ɖekawo tɔ ɖyika dodo Etityɛnu. Mawusɛnxu ci yí wo yɔnɔ be hwashixɔvovowo tɔxu yí wo nɔnɔ. Le wo mɛ ɔ, ɖekawo nyi yuɖatɔ ciwo yí so Silisi kodo Azi 'kanwo mɛ. Wo pleŋ tɔ enyɔ dɔndɔn kpɔ kodo Etiyɛnu. ¹⁰ Vɔ kpɔ́ wo de sɛ́n eŋ ɖu ŋununyanya kodo Gbɔngbɔn kɔkɔɛ ciwo yí é sɔ xoxoɔ nuxu ji go. ¹¹ Eyi wo va na eho ŋsu ɖekawo yí wowo va nú be: « Mì se yi é le enyɔwo nuɔ yí sɔ gbagbali Mɔyizi kodo Mawu!» ¹² Nɛnɛ ɔ, wo le ezo doɔ nɔ jukɔn lɔ kodo mɛganwo kodo esedɔwatɔwo yí wowo va va Etiyɛnu gbɔ yí lii yí kplɔɛ yi sɛnsɛn 'hwɛxɔnu. ¹³ Wo ji kunuɖetɔwo yí kplɔ hɛn yi ehwɛxɔnu lɔ hɛnnɛ yí wo vayi nu be: « Enyɔwo yí ŋsu hɔn nunuɔ le elɛ yí sɔ gbagbaliɛ mìwo Mawuxwe kɔkɔɛ lɔ kodo ese ciwo yi Mawu na to Mɔyizi ji! ¹⁴ Ɖo mi se yi é nunuɔ be Yesu ci yí so Nazalɛti jugan mɛ lɔ a va gban Mawuxwe cɛ lɔ a trɔ kɔnu ciwo yí Mɔyizi ɖo anyi nɔ mì.» ¹⁵ Eyi amɛshamɛ ci yí le sɛnsɛn 'hwɛxɔnu lɔ le Etiyɛnu gloɔ kpɔ. Wo vá kpɔ́ be yi ŋmɛ kɔ shigbe Mawu dɔla ɖé ŋmɛ nɛnɛ.