¹ Ci yi wo sɔ gbeta be mìwo a ɖó etɔjihungangan yí a yi Itali 'ju mɛ ɔ, wo sɔ Pɔlu kodo gakpamɛtɔ ɖekawo doashi nɔ́ sɔjakavehowiga ci yí wo yɔnɔ be Ʒuliwusu. É le ŋkɔ nɔ sɔjawo 'hwakɔn ci yí wo yɔnɔ be «Hlɔmutɔ 'fiɔgangan sɔjawo.» ² Mí ɖo etɔjihungangan ɖeka yító etɔji yí ɖedo. Etɔjihungangan lɔ so Adramitiyɔmu yí yigɔ etɔjihungangan drexu ciwo yí le Azi 'kan mɛ agé mɛ. Maseduwanutɔ ɖeka ci yí so Tɛsaloniki jugan mɛ yí wo yɔɛni be Alishitaki can le etɔjihungangan lɔ mɛ kodo mì. ³ I ŋkegbu ɔ, mi vayi ɖo Sidɔn jugan mɛ. Zuliwusu wawa xomɛvu nɔ Pɔlu. É na egbe yi be yi le yɔ yi 'xlɔwu yi a xɔ enu ciwo yi ziin. ⁴ Ci yi mi so le hɔntɔxu ɔ, mi zɔn shiplo 'tɔdomɛju lɔ 'tu tiin yi ji. Ɖo ɔ, aya xoxo ɔ kpaŋkɔ etɔjihungangan lɔ. ⁵ Mi zɔn axwu lɔ ji le Silisi kodo Panfili 'kanwo 'xaji yi ji Milu jugan ci yi le Lusi 'kan me mɛ. Eyi etɔjihungangan dre do hɔn. ⁶ Sɔja kave howiga lɔ va kpɔ etɔjihungangan bu le hɔn yi é so Alɛsandri jugan mɛ vayi gɔ Itali ju mɛ. É na yi mi ɖoi. ⁷ Etɔjihungangan lɔ kuku gbɔngbɔn enu nɔ mi sɔna ŋkeke ɖewo kaka gbɔxwe yi mi va ɖewo kaka gbɔxwe yi mi va je axaji nɔ Kinidi jugan lɔ. Ci yi aya de na emɔ mi yi mi a yi ŋkɔ do ji go ɔ, mi trɔ to fini ci wo yɔnɔ be Samɔnɛ yi va ɖó fɔde agé nɔ Klɛti 'tɔdomɛju lɔ. ⁸ Mi teteɛ kli kli kli kaka va ɖó afiɖeka yi wo yɔnɔ be etɔjihungangan Drexunyui yi é le axa nɔ Lasayiya jugan. ⁹ Vɔ ɔ, mi gu gamɛ sugbɔ le emɔ lɔ zɔnzɔn mɛ. Nɔ wo a gbe zɔn axwu lɔ ji so hɔn a yi ɔ, afɔku le mɛ. Ɖo ɔ, enublabla 'xwe ci yi wo ɖunɔ gamɛ vayi. ¹⁰ Éyi na taɖo yi Pɔlu ɖoɖo ɔ afɔ afɔta nɔ etɔjihungangankutɔ lɔwo be:«Nyaŋ 'xlɔwo, ŋ kpɔ be afɔku le emɔzɔnzɔn cɛ mɛ yi enu sugbɔ jijiɛ a gble le mɛ. Etɔjihungangan lɔ kodo agban ciwo le mɛ a gble. Gbe sɔwu nɛnɛ ɔ, miwoŋtɔwo a vɔ do mɛ dru.» ¹¹ Vɔ ɔ, sɔjakavehowiga lɔ kando etɔjihungangan lɔ kutɔ kodo amɛ ci tɔ yi nyi etɔjihungangan lɔ 'nyɔwo ji sɔ wu Pɔlu tɔwo. ¹² Ci yi etɔjihungangan lɔ drexu hɔn de nyɔ be wo a nɔ vuvɔ gamɛ go ɔ , amɛ sugbɔ ci yi le mɛ sɔ gbeta be ye wo ɖó a só le hɔn yi a yi yewo a kpɔ be yewo ɖo Fenisi, etɔjihungangan drexu ci yi le Klɛti 'tɔdomɛju ce mɛ anɔ hɔn kaka nɔ vuvɔ gamɛ lɔ a vayi. Etɔjihungangan drexu kpanŋkɔ eweɖoxɔxu agé nɔ fɔɖe kodo tagbe. ¹³ Aya ci yi xo nɔ so fɔde agé xoxo ɔ blɛwu yi wo bubu ɔ be yewo a sun ye wo tótó lɔ ji yi a wa. Ci yi wo ɖe etɔjihungangan shinu 'ga lɔ sii ɔ, wo je axu lɔ ji yi toto ɔ Klɛti 'tɔdomɛju lɔ tu. ¹⁴ Eyi Sabaa vɔ, aya sɛnŋsɛnŋ ɖeka ci yi wo yɔnɔ be Elakilɔn xoxo ɔ so etɔdomɛju lɔ mɛ kodo adan. ¹⁵ Ci yi aya lɔ dɔn etɔjihungangan lɔ yi de gbe sɛn eŋ a kpanŋkɔ i go ɔ, mi tashii é hɛn mi yi. ¹⁶ Mi to axa nɔ etɔdomɛju ɖeka ci yi wo yɔnɔ be Koda yi é xe aya ci soso ɔ tagbe agé nɔ mi sa hwɛɖeka. Nenɛ ɔ, enu sun mi gbɔxwe yi mi va sɛn en yi dɔn etɔjihunvi ci yi wo sɔ kunɔ amɛ je ago le ehujɔjɔgamɛwo. ¹⁷ Le i godu ɔ, etɔjihungangan kutɔ lɔ wo kɔɛ do etɔjihungangan lɔ mɛ nɔ ŋgbe bu go. Wo sɔ etɔjihungangan shinu 'gawo shi etɔjihungangan lɔ dó ete nɔ ŋgbe gban o. Ci yi wo vɔnvɔn be ye wo a yi je ekɔ ciwo yi le eshi gɔnmɛ le fini ci yi wo yɔ nɔ be Libi ɔ, wo ɖe avɔ ci yi xɔnɔ aya le ŋkɔ nɔ etɔjihungangan lɔ soi yi tashi wowo dekiwo yi aya kplɔ wo ɖedo. ¹⁸ Aya sɛnŋ sɛnŋ lɔ cuku lanmɛ nɔ mi. I ŋkegbu ɔ, amɛ ci wo yi le etɔjihungangan lɔ mɛ tɔ agban ɖekawo lɔlɔ kɔ do axu lɔ mɛ nɔ etɔjihungangan lɔ a foɖa hwɛ ɖeka. ¹⁹ Ŋkeke amɛtɔntɔ lɔ gbe ɔ, wowoŋtɔwo lɔ enu kpɛnkpɛn ciwo yi le etɔjihungangan lɔ nu koŋgbe. ²⁰ Ewe kodo wleciviwo de to sɔ na ŋkeke ɖewo go yi aya lɔ trɔ kpɔtɔ le eŋ sɛngɔ. Mi de kandoji be mi a gbe gan go. ²¹ Amɛ ciwo yi le etɔjihungangan lɔ mɛ de gbe ɖu enu sɔna ŋkeke sugbɔ go. Eyi Pɔlu va shi ete le amɛwo dodomɛ yi nu be:«Nyan xlɔwo nɔ mi nya sa ɔ, mi a se enyɔ ci yi ŋ nu yi a ci Klɛti 'tɔdomɛju mɛ. Gahɔnmɛ ɔ, mi a ze nɔ afɔku cɛ kodo enugbenɔ amɛ cɛ. ²² Ecɛviɛ ɔ, ŋ biɔbiɔ so mi gbɔ be miwo le do eji. Ɖo amɛ ɖekpokpoi d'a vɔ do mɛ le mi mɛ go. Etɔjihungangan lɔ ɖekɛ yi a trɔn. ²³ Egbɛ ezanmɛ ɔ, Mawu citɔ yi ŋ nyi ɔ Mawu ci yi ŋ sɛnnɔ 'dɔla ɖeka va ŋgbɔ. ²⁴ Yi nu nɔ ŋ be: "Pɔlu ŋgbè vɔn go. É le be wo a kplɔ eo yi SEza ŋkɔ. Mawu kpɔ do eo nu yi tashi amɛ ciwo yi le etɔjihungangan lɔ mɛ kodo eo do agbe. ²⁵ É yi na taɖo ɔ, nyaŋ 'xlɔwo nɔ do eji. Ɖo ŋ kando Mawu ji be lehanci yi wo nui nɔ ŋ do, é yi a a jɔ. ²⁶ Vɔ ɔ, mi ɖo a va yi je etɔdomɛju ɖe 'go ji.» ²⁷ Ezan winɛtɔ lɔ mɛ yi mi le yi jihɔn lɔ gbe kpɔtɔ dɔn mi yigɔ Mɛditɛlanɛxu lɔ ji. Shigbe ezangawive han nɛnɛ ɔ, etɔjihungangankutɔ lɔ wo bubu ɔ be mi gogo nyigban gba ɔ ; ²⁸ Yi dó eka deka ci nu yi wo bla ega kpenkpin ɖeka dó ɖaɖa yi kpɔ be axu lɔ cito shigbe mɛta egbanhoadrɛ han nɛnɛ. Ci yi etɔjihungangan lɔ gbe teyi ŋkɔ hwɛɖeka ɔ, wo gbe do enu lɔ ɖaɖa yi kpɔ mɛta wivɔnnyi han. ²⁹ Ci yi wo vɔnvɔn be etɔjihungangan lɔ ava lɔ ekpegbaja wo ɔ, wo sɔ etɔjihunganshinu 'ga amɛnɛ shi etɔjihungangan lɔ dó godu agé do ete. Wo wɛɛ nɛnɛhan yi a sɔ nɔnɔ ete kpɔ ŋkeke ŋkuvi biabiatɔ. ³⁰ Vɔ ɔ, etɔjihungangan kutɔ lɔ wo jijiɛ ashi le ehun lɔ mɛ. Eyi wo ɖyiɖyi etɔjihunvi lɔ dó eshimɛ yi sɔ nunu ɔ be ye wo a sɔ etɔjihungangan shinu 'ga shi etɔjihungangan lɔ doŋkɔ agé do ete goŋ. ³¹ Eyi Pɔlu nu nɔ sɔjakavehowiga kodo sɔjawo be:«Nɔ ŋsu cɛwo de le etɔjihungangan lɔ mɛ gbɛsasa go ɖe, mi d'a gan go.» ³² Eyi sɔja lɔ wo so ekawo nɔ etɔjihunvi lɔ yi tashii yi é jɔn. ³³ Nyidin kucu kucu ɔ, Pɔlu ɖe kuku nɔ wo plen be wo le ɖu enu be:«ŋkeke wive yi nyi ecɛ yi mi le xaxa mɛ yi le shive, enu ma ɖu. ³⁴ É yi na taɖo ŋ yɔyɔ mi be mi wo le ɖu enu keŋ yi a gan. Etaɖa d'a jɔn nɔ amɛ kuɖeka kpetii le mi mɛ go.» ³⁵ Ci yi Pɔlu nu enyɔ cɛyo ɖegbɔ ɔ, é sɔ kpɔnɔn yi dó akpe nɔ Mawu le ŋmɛ nɔ wo pleŋ yi mii mɛ yi tɔ ɖuɖu. ³⁶ Gahɔnmɛ yi wo lɔ wo pleŋ va do eji yi tɔ enu ɖuɖu hɛnnɛ. ³⁷ Mi pleŋ ci yi le etɔjihungangan lɔ mɛ nyi agbetɔ sandive taadrɛ ciadɛn (276). ³⁸ Ci yi amɛshamɛ ɖu enu yi ɖɔ eko ɖegbɔ ɔ, wo lɔ eliku ci yi le etɔjihungangan lɔ mɛ. Kɔŋgbe do axu mɛ. Nɔ etɔjihungangan lɔ a foɖa hwɛɖeka. ³⁹ Ci yi eŋ ke ɔ, etɔjihungangan kutɔ lɔ wo de jeshi nyigban ci yi wo kpɔkpɔ ɖaɖa go. Wo kpɔ yi axu do enu nyigban mɛ do afiɖeka yi ekɔ le hɔntɔxu lɔ. Eyi wo sɔ gbeta be yewo a cucu etɔjihungangan lɔ kpɔ be yewo a sɛn eŋ yi dre do hɔn mɛ. ⁴⁰ Eyi wo ɖe etɔjihungangan shinu lɔ danŋkpɛn do axu mɛ yi gbe cu ekawo le emɔjɔjɔ nuwo nu. Le i godu ɔ, wo do avɔ ci yi xɔ nɔ jihɔn do ŋkɔ nɔ etɔjihungangan lɔ yi jihɔn dɔin gbe axutu lɔ. ⁴¹ Vɔ ɔ, wo vayi cu ekɔ gangan ɖeka yi ŋkɔ ɖyi do ekɔmɛ nɔ etɔjihungangan lɔ yi é ci ete góŋ. Axu shi ci wo yi bliɛbliɛ adan-adan va kan kan kaan do godu nɔ etɔjihungangan lɔ yi godu lɔ gban. ⁴² Sɔja lɔ wo ji be ye wo a wu gakpamɛtɔ lɔwo nɔ eɖe ŋgbe xu eshi yi a shi go. ⁴³ Vɔ ɔ, Hlɔmutɔwo sɔjakavehowiga ci yi jijiɛ be ye a hlen Pɔlu gan gbé nɔ wo be wo ŋgbe wa nɛnɛ go yi nu nɔ amɛ ciwo yi nya eshi xuxu ɖé be wo le teje eshi lɔ mɛ do ŋkɔ yi a xu eshi yi a agoji le nyigban. ⁴⁴ Le i godu ɔ, amɛ kpɛtɛwo lé kplɔ wo dó yi a kutɔ kpakovi wo alo etɔjihungangan lɔ kankanwo. Nɛnɛ yi wo wɛ do yi amɛshamɛ sen eŋ yi agoji le nyigan dediɖe nɛ.