¹ Mi ɖo agojidediɖe gbɔxwe yi va se be Mati yi wo yɔnɔ etɔ domɛju lɔ. ² Amɛ ciwo yi le hɔntɔxu lɔ xɔ mi mɛdru nyuiɖe. Ci yi eshi kɔ ɖɛ yi vuvɔ glo ɔ, wo bɔ ezo gangan ɖeka nɔ mi yi xɔ do gbɔ. ³ Pɔlu vayi lɔ nake yɔ yɔɛ ɖekawo do ezo lɔ mɛ. Zakpata ɖeka le nake lɔwo mɛ: ci yi ezo wlɔɛ ɔ, e zo to yi treci alɔ nu nɔ Pɔlu. ⁴ Etɔdomɛju lɔ mɛtɔwo kpɔ yi edan lɔ treci alɔ nu nii yi nu nɔ wowonɔnɔwo be:«Dandandan ɔ, amɛwutɔ yi nyi ŋsu cɛ. Ɖo ci yi é gan le axu shi ɔ, Mawu kojoɖoɖo ji be ku yi a ku kokoko.» ⁵ Vɔ ɔ, Pɔlu hunhɔn alɔ yi edan lɔ je ezo me kpɔ enuɖe de wa Pɔlu go. ⁶ Amɛwo bubuɔ be Pɔlu a va tɛn alo a va ku kpataa. Vɔ ci yi wo nɔ ete kakaka yi enuɖe de va wa Pɔlu go ɔ, susu trɔ nɔ wo yi wo nu be voju yi nyi. ⁷ Ega ci yi le eju lɔ mɛ yi wo yɔɛni be Publiwusu wa nyigban ɖeka ɖɛ do hɔntɔxu. É xɔ mi mɛdru yi kpɔ mi ji sɔnanɔ ŋkeke amɛtɔn. ⁸ Publiwusu adalɔ le edɔ 'ba ji. Vuvɔfun wɛwɛ yi é gbe le shigui nyɛɛ. Pɔlu ɖo exɔ mɛ le gbɔ yi do egbeɖaɖa yi sɔ alɔ daɖo ji yi edɔ lɔ mi nii. ⁹ Eyi dɔnɔ kpɛtɛ ciwo yi le etɔdomɛju lɔ mɛ va Pɔlu gbɔ hɛnnɛ yi a da edɔ nɔ wo. ¹⁰ Amɛwo donɔ bubu gangan mi nu. Ci yi mi jijiɛ a só ɔ, wo na mi enu ciwo yi zian mi. ¹¹ Wleci amɛtɔn yi mi wa le hɔntɔxu yi so jeŋkɔ Hlɔmu jugan mɛ. Mi ɖo etɔjihungangan ɖeka ci yi só Alɛsandri yi va dre do etɔdomɛju lɔ mɛ yi a nɔ hɔntɔxu nɔ vuvɔ hwenu lɔ a vayi. Wo ɖo nyikɔ nii be: «Diwɔsukui». ¹² Ci yi mi vayi ɖo etɔjihun drexu ci yi le Silakuzu jugan mɛ ɔ, mi nɔ hɔntɔxu sɔnanɔ ŋkeke amɛtɔn. ¹³ Mi sɔ le hɔntɔxu yi zɔn agonu kaka va ɖo Hleziwo jugan mɛ. I ŋkegbu ɔ, aya ci yi xonɔ so fɔɖe agé tɔ xoxo yi mi sɔ nkeke amɛve va sɔ ɖo Puzɔlu jugan mɛ. ¹⁴ Hɔntɔxu yi mi va dó ego nɔvi xɔsetɔ ɖekawo le nɛ. Nɔvi lɔwo biɔ so mi gbɔ be miwo le nɔ yewo gbɔ yi a wa ŋkeke amadrɛ yi mi xɔ egbe nɔ wo. Nɛnɛ yi mi vayi Hlɔmu jugan mɛ do nɛ. ¹⁵ Nɔvi xɔsetɔ ciwo yi le Hlɔmu se be mi gbɔgbɔ yi amɛɖewo va do ego mi dó kaka Apiyusu shimɛ yi amɛ buwo va nɔ ete kpɔ mi le fini ci yi wo yɔnɔ be Mɛdruzexu Amɛtɔn lɔ wo. Ci yi Pɔlu kpɔ wo ɔ, é do akpe nɔ Mawu yi edɔngbegbe gbe ɖo lanmɛ nii. ¹⁶ Ci yi mi va ɖo Hlɔmu jugan mɛ ɔ, wo ɖe emɔ nɔ Pɔlu be yi le nɔ akpo kodo sɔja ci yi cɔcɔɛ. ¹⁷ Yi nyisɔ mɛ ɔ, Pɔlu yɔ bɔbɔ amɛ ciwo yi nyi mɛganwo nɔ Yuɖatɔwo le hɔntɔxu. Ci yi wo bɔ ɔ, é nu nɔ wo be :« Nɔvinyɛ wo , ci yi ŋ de wa enuɖe kodo miwo jukɔn lɔ go yi n de da le miwo tɔgbiwo 'kɔnu ɖe ji go can ɔ, wo lé ŋ le Zeluzalɛmu jugan mɛ yi sɔ ŋ do ashi nɔ Hlɔmutɔwo. ¹⁸ Wowo biɔ enyɔwo ŋ se yi ji be yewo a tashi ŋ. Ɖo wo de kpɔ mɔ ŋ wa enuɖe kaka yia je nɔ eku go. ¹⁹ Vɔ Yuɖatɔwo gbé. Eyi ŋ biɔ be Seza, Hlɔmutɔwo 'fiɔgangan ŋtɔ yi a ɖó kojo nɔ ŋ. Ɖé nyi kpɔ be ŋ dodo ɔ ehwɛ nɔ anyi 'kɔta lɔ yɔ go. ²⁰ Enu ci ŋci biɔ be miwo le va nɔ ma kpɔ mi yi a xo nuxu nɔ mi nɛ. Ɖo amɛ ci yi Izrayɛli jukɔn lɔ kpɔkpɔ emɔ nɔ ŋci yi wo dó ega ŋ do.» ²¹ Megan lɔ wo ɖoŋci nii be:«Mi de xɔ wema ɖe so zude 'kan mɛ kuso eo nu go yi mi wo nɔvi ɖé can de só hɔntɔxu yi va je ao 'hwɛ nɔ mi alo nu ao 'nyɔvɔn ɖe nɔ mi go. ²² Vɔ ɔ, mi ji be mi a se susu ci yi le eoŋtɔ shi. Ɖó ɔ, mi nya be amɛwo gbe sɛnsɛn 'gbɛ cɛ le afishafi.» ²³ Eyi wo ɖo azan nɔ Pɔlu yi va trɔgbɔ, le egbɔsusu mɛ, va gbɔ le fini ci yi é le . E le nuxu xoɔ nɔ wo so nyidin kaka ezan do. E ɖe kunu nɔ wo so jiŋkushi fiɔɖuxu lɔ nu. E tenɔ kpɔ nɔ wo a nya be lehanci yi ye se Yesu gɔnmɛ do nyi nyɔnɔnui yi sɔ le ese ciwo yi Mawu do to Mɔyizi ji kodo enyɔ ciwo yi Mawu 'ŋɛdotɔwo nu daɖɛ gɔnmɛ ɖeɛ nɔ wo. ²⁴ Amɛɖekawo xɔ egbe do enyɔ lɔwo ji yi amɛɖewo gbe be yewo d'a xɔ wo ji se go. ²⁵ Ci yi wo va ma do eve ahan gbɔxwe yi a só ɔ, Pɔlu sɔ enyɔ cɛ kpii nɔ wo kpoŋ be: «Gbɔngbɔn kɔkɔɛ xo nuxu nɔ miwo tɔgbiwo to Mawu 'ŋɛdotɔ Ezayi ji nyuiɖe, ²⁶ hwecinu yi é nu be: " yi jukɔn hɔn gbɔ yi anu nii be: Mi a se enyɔ ci yi wo nu nyuiɖe, vɔ kpɔ mi d'a se yi gɔnmɛ go; ŋkuviwo a le ete nɔ mi nyuiɖe, vɔ kpɔ mi d'a kpɔ enuɖe go. ²⁷ ɖo ɔ, enu de gbe wawa eɖe le lanmɛ nɔ jukɔn cɛ go. Jukɔn lɔ mɛtɔwo cu wowo 'towo, yi ŋwla wowo ŋkuviwo yi a mi enukpɔkpɔ a mi eto nusese, a mi enugɔnmɛsese, gahunnɔtɔmɛ nɔ wo ŋgbe va trɔ wowoɖekiwo yi aji nɔ ma da edɔ nɔ wo go". ²⁸ Eyi na tado ɔ, mi a nya be Mawu sɔ yi hwlɛngan ɖaɖa amɛmanyi Yuɖatɔwo wowo a sii!» ²⁹ Ci yi Pɔlu nu enyɔ hɔnwo ɖegbɔ ɔ, Yuɖatɔ lɔwo tɔ enyɔ baɖa le wowonɔ nɔ wo mɛ sɛnŋsɛnŋɖe yi so le gbɔ. ³⁰ Pɔlu nɔ zexu ci yi e haya lɔ sɔ nanɔ exwe amɛve yi xɔxɔ ame ciwo pleŋ yi va kpɔkpɔe. ³¹ E xoxoɔ nuxu so jiŋkushimɛ 'fiɔɖuxu lɔ nu kodo axwa yi vo yi le enu kplaan amɛwo so Axwetɔ Yesu Kliso nu kodo kankandoji.