¹ Ŋkeke amatɔn godu ɔ, avɔsatɔ gangantɔ Ananiyasi kodo ejumɛmɛgan ɖekawo kodo Tɛtulusu, etahwlɛnnɔamɛtɔ ɖeka vá ɖó Sezale jugan mɛ. Wo yi ekanjikpɔtɔ Felisi gbɔ yí a vayi do ehwɛ nɔ Pɔlu le gbɔ. ² Eyi wo yɔ Pɔlu vɛ yí Tɛtulusu tɔ ehwɛ dodo nɔ́ Pɔlu yí nu nɔ ekanjikpɔtɔ lɔ be: «Bubutɔ, eo ji yí mì tó yí eto lɔ mɛ fa yí ao 'bulele nɔ́ enu ná yí enudradradowo gbe le akɔta cɛ mɛ. ³ Bubutɔ gangantɔ Felisi. Enu lɔwo pleŋ ci yí è wawa nɔ mì gaɖekpokpoi mɛ le afishafi ɔ, mì xɔnɔ wo kodo akpedodo. ⁴ Vɔ nɔ́ enyɛ, ŋgbe do aya nɔ eo sugbɔ do ji go ɔ, ŋ ɖe kuku nɔ eo be eo le wa xomɛvunu nɔ mì yí a se enyɔ kankin ci yí ŋ jijiɛ a nú. ⁵ Nyɔnɔnuitɔ ɔ, mì kpɔ be ŋsu cɛ baɖa. É ná yí Yuɖatɔwo le enyɔwo dɔɔn le wowonɔnɔwo mɛ le xexe lɔ pleŋ mɛ. É yí nyi ega nɔ ega nɔ Nazalɛtitɔwo 'gbɛ. ⁶ Gbe sɔwu nɛnɛ ɔ, é tekpɔ be ye a xo eɖyi Mawuxwe lɔ. Eyi mì lii. Mì ji be mì a sɔ mìwo 'sewo xoi. ⁷ Vɔ ɔ, sɔjawo 'gá Lisiyasi va ɖó enyɔ lɔ mɛ yí gui le mì shí kodo ŋŋsɛn. ⁸ Le i godu ɔ, Lisiyasi ɖe egbe nɔ amɛ ciwo yí dodoɔ ehwɛ nii be wo le yi eo, Felisi gbɔ. Nɔ́ è biɔ enyɔwo ŋsu hɔn se ɔ, eoŋtɔ a nyá be nyɔnɔnui yí nyí ehwɛ ciwo pleŋ yí mì dodoɔ nii.» ⁹ Le i godu ɔ, Yaɖatɔ ciwo yí le ehɔntɔxu lɔ ɖó ekpe Tɛtulusu 'nyɔ lɔwo jí yí nú be nyɔnɔnui yí wo nyí. ¹⁰ Ci yí ekanjikpɔtɔ lɔ na nuxu Pɔlu ɔ; Pɔlu nu be: « Ŋ nya be eo tɔ kojoɖoɖo le mìwo 'kɔta cɛ mɛ viɛ ɔ, é wa exwe sugbɔ. É yi ná taɖo yí ŋ ɖe eji ɖɛ yí ahwlɛn eta nɔ enyɛɖeki le eo gbɔ́. ¹¹ Eoŋtɔ a sɛ́n eŋ ji gɔnmɛ kpɔ nii be ŋkeke wive ge yí ŋ yi Ʒeluzalɛmu be na yi sɛn Mawu le ehɔntɔxu. ¹² Le ŋkeke hɔn lɔwo mɛ ɔ, amɛɖe de kpɔ ŋ le Mawuxwe lɔ mɛ yí ŋ le enyɔ dɔɔn kodo amɛɖe go. Nɛnɛke wo de kpɔ ŋ yí ŋ na yi amɛɖewo dɔn enyɔ le wowonɔnɔwo mɛ le Mawusɛnxuwo alo le jugan lɔ mɛ go do nɛ. ¹³ Jeshi ɖe de le amɛ lɔwo shí yí wo a sɔ́ ɖó ekpe ehwɛ ciwo yí wo nu be enyɛ, ŋ wu ji viɛ go. ¹⁴ Vɔ ɔ, na sɛ́n eŋ hun enyɔ cɛ mɛ nɔ nɔ eo. Ŋ le mìwo tɔgbiwo Mawu sɛɛn sí zɔnzɔn to emɔ ci yí wowo nu be yi de nyɔ́go ji yí yɔɛni be sɛnsɛn 'gbɛbɔbɔ vɔ enyɛ ɔ, ŋ xɔ enu ciwo pleŋ wo ŋwlɛ do ese wemawo mɛ ji se. ¹⁵ Ŋ kpɔkpɔ emɔ nɔ Mawu shigbe wowo cán nɛnɛ be amɛshamɛ, amɛjɔjɔɛ can, amɛmajɔmajɔɛ can a va fɔ́n so ekuwodi. ¹⁶ É yi ná taɖo yí enyɛ can ŋ tenɔkpɔ be nyaŋ 'yexa ŋgbe kpɔ afɛn ɖe ŋ nu le Mawu kodo agbetɔwo ŋmɛ go. ¹⁷ Ŋ wa exwe sugbɔ le egbeji yí trɔgbɔva Ʒeluzalɛmu kodo enunanawo yí a sɔ kpedo nyaŋ 'kɔta lɔ nú yí a gbe sa avɔwo nɔ Mawu. ¹⁸ Enu ci yi ŋ wawa le Mawuxwe yí wo kpɔ ŋ nɛ. Eɖyiklɔklɔ 'kɔnu yi ŋ wawa ɖegbɔ ahan. Kpɔ ʒigidi ɖé de ɖyiɖyiɛ le ahwakɔn lɔ mɛ le ŋ gbɔ go yí eʒin ɖe de tɔntɔɔn le ŋ gbɔ go. ¹⁹ Vɔ ɔ, Yuɖatɔ ɖeka ciwo yí so Azi 'kan mɛ le tɔxu. wowo taŋ yí ɖó a vá eo gbɔ le elɛ sá yí a vá le ehwɛ doɔ nɔ ŋ nɔ́ wo kpɔ́ afɛn ɖé nɔ ŋ. ²⁰ Alo ci yí wo kplɔ ŋ yí wo sɛnsɛn 'hwɛxɔnu nɔ amɛ ciwoyí vá elɛ kpɔ́ be ŋ wu ehwɛ ɖe gbehɔngbe ɔ, wo le nui. ²¹ Enyɔ kuɖeka ci yí ŋ nɔ ete le sɛnsɛn 'hwɛxɔnu 'ga lɔwo ŋmɛ gbehɔngbe yí dó axwa yí nú yí nyi be: "Ŋ xɔse be amɛkukuwo a va fɔ́n so ekuwodi. Enu ci yí dɔ wo yí wo kplɔ ŋ va kojo mɛ le mí gbɔ egbɛ do nɛ!"» ²² Felisi ci yí nyá enu soAxwetɔ 'mɔ́ lɔ nú nyuiɖe gli kojo lɔ yí nu nɔ amɛ ciwo yí dodoɔ ehwɛ nɔ Pɔlu be: «Sɔjawo 'ga Lisiyasi a va gbɔxwe na ɖo kojo lɔ.» ²³ É ɖe egbe nɔ sɔjakahowiga lɔ be yi le kpɔ́ Pɔlu ji le gakpamɛ. Yi lé ná vovo yi. Nɔ enuɖe ʒíin ɔ, yi le ɖe emɔ nɔ́ yi 'mɛwo nɔ́ wo a wɛɛ nii fɛɛ. ²⁴ Ŋkeke ɖewo godu ɔ, Felisi va kodo ashiɛ Druziyi ci yí nyí Yuɖatɔ. Felisi dɔ yí wo yi kplɔ Pɔlu vɛ. È ɖó eto yí se Pɔlu xo nuxu so Yesu kliso jixɔxɔse nu. ²⁵ Vɔ gacimɛ yí Pɔlu tɔ nuxu xoxo so jɔjɔɛnyinyi, amɛɖekijiɖuɖu kodo kojoɖoɖo ci yí gbɔgbɔ nu ɔ, Felisi vɔn yí nu nii be: «Egbɛtɔ sun. Yi gbɔxwe. Nɔ́ ŋ va kpɔ vovo ɔ, na gbe yɔ eo.» ²⁶ Felisi kpɔkpɔ emɔ be Pɔlu a ná eho eye. É yí ná taɖo kabakaba ɔ, é dɔnɔ yí wo kplɔɛni vɛ yí é kannɔseŋ kodoi. ²⁷ Nɛnɛ wo le ji kaka exwe eve vayi yí Pɔsiwusu Fɛsutusu va ɖɔ eli Felisi nɛ. Vɔ ɔ, Felisi ji be ye a wa xomɛvunu nɔ́ Yuɖatɔwo yí gbe Pɔlu do gakpamɛ.