¹ É nu nɔ wo be:«Edanyɛwo kodo nɔvinyɛwo, mi ɖo eto a se enyɔ ci yi le ŋ shi yi ŋ jijiɛ a nu nɔ mi yi a sɔ hwlɛn anyi ' ta.» ² Ci yi wo se yi é le eblegbe do ɔ ɔ, eɖa va ɖo ɖo ji. Eyi Pɔlu nu be: ³ «Enyɛ ɔ, Yuɖatɔ ŋ nyi yi so Tasi jugan mɛ le Silisi 'kan mɛ. Vɔ ɔ, Zeluzalɛmu elɛ yi ŋ nɔ yi shin ke. Gamaliyɛli yi yni anyi cica. E kplan ese ci Mawu na miwo tɔgbiwo to Moyizi ji ŋ nyuiɖe. Ŋ gbe bianɔ ŋkuvi do Mawu sɛnsɛn ji hɛnnɛ shigbe lehanci yi miwo pleŋ wɛwɛ dó, egbe ɛnɛ. ⁴ Vayi ɔ, ŋ ci yumɛ nɔ amɛ ciwo yi zɔnnɔ to emɔ ci yi Axwetɔ be wo be wo le tɔ ji kaka nyɔnuwo do gakpamɛ kpɔ. ⁵ Avɔsatɔ gangantɔ kodo amɛ ciwo yi le ehamɛmɛganwo bɔbɔ a sɛn eŋ ɖe kunnu nɔ ŋ be nyɔnɔnui yi ŋ totoɔ. Wowo yi ŋwlɛ wemawo do ashi nɔ ŋyi n hɛnsɔyi nɔ miwo nɔvi Yuɖatɔ ciwo yi le Damasi jugan mɛ. Ŋ ji vayi be na le xɔsetɔ ciwo yi le jugan hɔn mɛ yi a do ega a hɛngbɛva Zeluzalɛmu a va dɔn eto nɔ wo.» ⁶ Pɔlu yi ji nu be:«Ŋ le emɔ ji yi jijiɔ a do Damasi jugan mɛ do gawive mɛ hanci nu. Eyi zeɖeka tɔntɔn vɔ , klɛnklɛn gangan ɖeka so jiŋkushimɛ yi trɔdo ŋ. ⁷ Yi ŋ jvin yi se egbe ɖeka ɖyi yi nunuɔ nɔ ŋ be:"Sɔlu , Sɔlu, nyi yi jɔ yi è ci yumɛ nɔ ŋ ahan ɔ?" ⁸ Eyi ŋ ɖoŋci be:"Eo mi yɔ ɔ, mɛgan?" Egbeɖyiɖyi lɔ ɖoŋci nɔ ŋ be:" Enyɛ yi nyi Yesu Nazalɛtitɔ, amɛ ci yi eo ɔ, ɔ ci yumɛ nɔ". ⁹ Amɛ ciwo yi kplɔ ŋ do kpɔ hlɛnhlɛn lɔ nyuiɖe. Vɔ kpɔ wowo de se egbe ci le nuxu xoɔ nɔ ŋ go. ¹⁰ Gahɔnmɛ ɔ, ŋ va nu be: " Lé na wɛɛ do ɔ, Axwetɔ?" É nu nɔ ŋ be : " Fɔn, yi a yi Damasi. Wo a dré edɔ ciwo pleŋ yi Mawu ɖo nɔ eo, nɔ eo, le hɔntɔxu. ¹¹ Ŋ de gbe sɛn eŋ kpɔkpɔ enu go. Ɖo klɛnklɛn lɔ sɛn eŋ sugbɔ. Amɛ ciwo yi kplɔ n do le alɔnu nɔ ŋ yi kplɔ ŋ yi Damasi jugan lɔ mɛ. ¹² A kpɔ ɔ, ŋsu ɖeka le Damasi lɔ. Wo yɔɛ nii be Ananiyasi. É shinɔ Mawu yi gbe nɔnɔ egbeji nɔ yi 'sewo yi Yuɖatɔ ciwo pleŋ yi le jugan lɔ mɛ nunɔ yi 'nyɔ nyui. ¹³ E va ŋ gbɔ yi nu nɔ ŋ be:"Sɔlu , nɔvinyɛ, gbè tɔ enu kpɔkpɔ." Eyi zeɖekz vɔ, ŋ gbe tɔ enu kpɔkpɔ kaka kpɔ Ananiyasi lɔ. ¹⁴ Eyi é va nu nɔ ŋ be:" Miwo tɔgbiwo Mawu doŋkɔ yi can eo nɔ na nya enu ci yi yni dro yi a gbe jeshi Amɛjɔjɔɛ lɔ yi a gbe se yi ' gbe. ¹⁵ Ɖo ɔ, a ɖe kunu nii le amɛshamɛ ŋmɛ yi a nu enu ciwo yi è kpɔ kodo ciwo yi è se. ¹⁶ Ecɛyɛ ɖee, nyi yi è le ete kpɔ ɔ? Shite nɔ wo a doshita nɔ eo yi le Yesu nyikɔ mɛ ɔ , wo a klɔ enuvɔn ciwo e wa soi." ¹⁷ Pɔlu yi ji yi nu be: «Le i godu ɔ, ŋ trɔyi Zeluzalɛmu. Ci yi ŋ le egbedoɔdaɖa le Mawuxwe mɛ ɔ, ŋ kpɔ ŋtegan ɖeka. ¹⁸ Ŋ kpɔ Axwetɔ yi é nu nɔ ŋ be:" wa kaba yi a so le Zeluzalɛmu jugan lɔ mɛ. Ɖo ɔ, jugan lɔ mɛtɔwo d'a lɔn yi a xɔ kunu ci yi a ɖe soso ŋ nu go". ²⁰ Eyi enyɛ , ŋ nu be :" Axwetɔ, wo nya nyuiɖe be enyɛ, ŋ yinɔ Mawusɛnxu, Mawusɛnxuwo sa yi a lé ame ciwo yi xɔ eo ji se yii axo wo yi a sɔ wo dó gakpamɛ. ¹⁹ Kaka ci yi wo wu ao kunuɖetɔ Etiyɛnu can ɔ, ŋ le hɔntɔxu hɛnnɛ. Ŋ xɔ egbe do ji nɔ ame ciwo yi wuiwuiɛ yi xɔ awuwo ɖɛ nɔ wo." ²¹ Vɔ ɔ, Axwetɔ lɔ va nu nɔ ŋ be:"Seyi. Ɖo ɔ, na dɔ eo ɖaɖa jijitɔxu le amɛmanyi Yuɖatɔwo gbɔ".» ²² Ahwakɔn lɔ ɖo eto yi se enyɔ ciwo yi Pɔlu nunuɔ kaka va ɖo hɔntɔxu. Vɔ ecɛyɛ ɔ, wo pleŋ lɔ tɔ axwa dodo be:«Mi wu ŋsu hɔn ! D'é ɖo yi a nɔ agbe go!» ²³ Wo le bobo kpaa yi le wowo 'wuwo ɖeɛ dɔŋkpe yi lé ekɔ kuɔ ɖaɖa eji. ²⁴ Eyi Hlɔmutɔwo sɔjawo 'ga ɖe egbe be wo le kplɔ Pɔlu yi sɔjawo nɔxu lɔ yi a poi kaka nɔ a xo nuxu, nɔ wo a nya enu ci ŋci yi ahwakɔn lɔ le axwa doɔ do eta nii ahan dó. ²⁵ Vɔ ci yi wo blakɔ Pɔlu kodo lanŋba ɔ, é nu nɔ sɔjakavehowiga ci le hɔntɔxu lɔ be: «Ese ɖe emɔ nɔ mi be miwo lé tɔ alɔ Hlɔmujuvi ci yi wo de ɖo kojo kpetii go a ?» ²⁶ Ci yi sɔjakavehowiga lɔ se enyɔ ci yi Pɔlu nu ɔ, é yi wowo 'ga gbɔ yi nu be:«Nyi yi nyi hɔn yi è jijiɛ a wa sa ɔ? Hlɔmujuvi yi nyi ŋsu lɔ!» ²⁷ Sɔjawo 'ga lɔ va Pɔlu gbɔ yi nu nii be: «To nyɔnɔnui nɔ ŋ, eo, Hlɔmujuvi yi è nyi a ?» Pɔlu ɖoŋci be : «Ɛɛ, é yi ŋ nyi.» ²⁸ Eyi sɔjawo 'ga lɔ trɔ nu be :«Eho sugbɔ yi ŋ cu gbɔxwe yi wo na acɛ ŋ be enyɛ, ŋ nyi Hlɔmujuvi so jijimɛ.» ²⁹ Zeɖeka vɔ, amɛ eiwo,yi jijiɛ a na yi a xo nuxu sa shi le gbɔ. Ci yi sɔjawo 'ga lɔ va kpɔ be Hlɔmujuvi yi ye na yi wo do ega vayi ɔ , é tɔ vɔnvɔn. ³⁰ Hlɔmutɔwo sɔjawo 'ga lɔ ji be ye a nya enu ci ŋci kóŋ Yuɖatɔwo dodoɔ ehwɛ nɔ Pɔlu do. É yi na taɖo yi le i ŋkegbu ɔ, é dɔ yi wo ɖe agawo nii yi yɔ avɔsatɔwo 'gawo kodo sɛnsɛn 'hwɛxɔnutɔ bɔ. Le i godu ɔ é kplɔ Pɔlu yi ehwɛxɔnu le wo gbɔ.