¹ Ci yi mi klan amɛ lɔwo ɔ, mi do etɔji-hunhungan lɔ yi transɔyi kɔ si tɔdomɛju mɛ. I ŋkegbu ɔ, mi yi Hlosɛsi tɔdomɛju mɛ yi so le ehɔntxu yi yi Patala jugan mɛ. ² Mi kpɔ etɔjihunhungan ɖeka le hɔntexu ci yi jijiɛ ayi fenisi kan mɛ. Mi dui yi jeŋkɔ. ³ Ci yi mi to fɔde agé nü yi jeŋkɔ Sili ju mɛ agé etemaci. Mi vayi dyido Tii jugan mɛ fini ci yi etɔjihun-gangan lɔ jijiɛ a de agban do. ⁴ Eyi mi kpɔ nukplavi ɖekawo le ehɔntexu yi ci wo gbɔ sɔ nanɔ ŋkeke amadrɛ. Gbɔngbɔn kɔkɔɛ kanxle nukplavi lɔwo yi wo nu nɔ Pɔlu be yi ŋgbe yi Ʒeluzalɛmu o. ⁵ Vɔ ci yi ŋkeke ciyi mi a wa le ehɔntexu sun ɔ, mi so. Nukplavi lɔwo pleŋ kodo wowo shiwo kodo wowo viwo kplɔ mido yi sɔ ɖeɖe afɔnu tü nɔ mi je kaka mi fla jugan lɔ mɛ. Eyi mi je ekloji do axutu yi do egbeɖoɖa. ⁶ Ci yi mi klan miwonɔnɔwo ɖegbɔ ɔ, mi ɖo etɔjihungangan mɛ yi jeŋkɔ yi wowo trɔyi axwe mɛ. ⁷ Miwo yɛ ɔ, mi so le tii jugan hɔn lɔ mɛ kaka va do Puto lemayisi jugan mɛ yi sɔ vɔ etɔji mɔzɔnzɔn lɔ. Mi do egbe nɔ nɔvi xɔsetɔ ciwo yi le ehɔntexu yi nɔ wo gbɔ ŋkeke ɖeka. ⁸ I ŋkegbuɔ, nù so le wogbɔ yi yi sezale jugan mɛ yi vayi ze Filipu, Mawuŋɛnyuidratɔ gbɔ-Filipu yi nyi amɛ amadrɛ ciwo wo can le Ʒeluzalɛmu nɔ woa kpɔ enuɖuɖu mama nyɔwo gbɔ domɛtɔ ɖeka. ⁹ Filipu wa evi nyɔnuvi lealɔji amɛnɛ dɛ. Wo xɔnɔ nuxu eŋɛnyu dotɔɖɛ. Wo xonɔ nuxu eŋɛnyuidotɔwotɔ. ¹⁰ Mi nɔ hɔntexu sɔnanɔ ŋkeke ɖewo gbɔxwe yi Mawu ŋɛdotɔ ɖeka so Ʒude kanmɛ yi va kɔɖɛ. Wo yɔɛni be Agabusu. ¹¹ E va migbɔ yi sɔ Pɔlu kpablanu bla afɔwo kodo alɔwo nɔ yideki yi nu be:« Enyɔ ci yi Gbɔngbɔn kɔkɔɛ nu ge: e nu be ahan yi Yudatɔwo bla amɛ ci yi tɔ nyi kpablanu cɛ le Ʒeluzalɛmu yi a sɔ amɛ lɔ sa nɔ amɛ manyi Yuɖatɔwo nɛ.» ¹² Le enyɔ hɔn godu ɔ, miwo ŋtɔwo kodo nɔvi xɔsetɔ ciwo yi le sezale hɔntɔxu ɖe kuku nɔ Pɔlu be yiŋgbe yi Ʒeluzalɛmu o. ¹³ Vɔ ɔ, Pɔlu biɔ mi se be: « Nyi vin mi fanfan yi a gbɔjɔ lenmɛ nɔ ŋ ɔ? Enyɛ yɛ ɔ, d'é nyi awlɛwo mɛ nɔnɔ ɖekɛ yi ŋ le egbesɔsɔ nɔ le Ʒeluzalɛmu o. Vɔ, ɔ ŋ gbe le egbesɔsɔ a kule Ʒeluzalɛmu do etanɔ awetɔ Yesu.» ¹⁴ Ci yi nu de sɛn eŋxo nuxu nii yi e xɔ egbe do miwo nyɔ ji o ɔ, mi tashii yi nu be:« Mawu dro le nyi wawa!» ¹⁵ Le ŋkeke hɔnwomɛ godu ɔ, mi drado yi jeŋkɔ Ʒeluzalɛmu. ¹⁶ Sezale nukplavi dekawo can kplɔ mi do. Wo kplɔ mi yi nukplavi ɖeka ci wo yɔnɔ be Munasɔn yi e so shiplo tɔdomɛju mɛ gbɔ, nɔ mi a vayi ze gbɔ. Munasɔn trɔ nukplavi yɛ ɔ, e jinjin. ¹⁷ Ci yi mi vayi ɖo Ʒeluzalɛmu ɔ, nɔvi xɔsetɔwo xɔ mi kodo jijɔ. ¹⁸ I ŋkegbu ɔ, Pɔlu kplɔ mi i Ʒaki xwemɛ. Ehamɛmɛganwo pleŋ can va hɔntexu lɔ. ¹⁹ Eyi Pɔlu do egbe nɔ wo yi je enu ciwo pleŋyi Mawu wa to sɛnsɛn dɔ ci yi e wa mɛ nunu nɔ amɛmanyi Yudatɔwo. ²⁰ Ci yi wo se enyɔ lɔwo ɖegbɔ ɔ, wo canfu Mawu yi nu nɔ Pɔlu be: « Nɔvi, é kpɔ a ? miwo nɔvi Yuɖatɔ kotokun nɛni ɖe vɔ Yesu ji se. Wo pleŋ gbe bio ŋkuvi do ese wo nu yi wakɔ do woji. ²¹ Vɔ ɔ, wo nunu so eo nu nɔ wo be eo kplakpla enu Yuɖatɔ ciwo yi le akɔta buwo mɛ be wo le ɖe ekɔ le Mɔyizi nu; wo ŋgbegbe so evo nɔ wowo viwo alo a nyi wowo xwe kɔwo o. ²² Le mi a wɛɛ doyɛ ɔ? wo a va se kokoko be eo vadɛ. ²³ E yi na tado ɔ, nɔ mi nu enyɔ ɖe nɔ eo ɔ, na sü Amɛ amɛnɛ le mi mɛ le elɛ yɛ ciwo yi ɖo egbe nɔ Mawu. ²⁴ Kplɔ wo yi a yi wa edyi klɔ kɔnu eoŋtɔ yi agbe wa nɔ wowo can. Eho ci pleŋ yi wo a zan le ehɔntexu lɔ yi a sɔ lun eta ɔ, na cui. Gahɔnmɛ ɔ, amɛshiamɛ akpɔ be enyɔ ɖe ɖe nyi nyɔ nɔnui le enyɔ ciwo yi wo nu nɔ yewo so eo nu mɛ o. Vɔ ɔ, eo wawa do ese lɔwo ji. ²⁵ Miwo yɛ ɔ miwo ŋwlɛ enu ɖaɖa amɛmanyi yuɖatɔ ciwo yi va trɔ xɔsetɔwo be miwo kpɔ be wo de ɖo yi a ɖu elan ci yi wo sɔ sa avɔ nɔ vojuwo o; gbe wo de ɖo yi atɔ enu ehun o. Wo de ɖo yi a ɖu elan ci yi ehun de kɔdo nyigban nɔ o; gbe wo de a nyi hételilɔnɔwo o.» ²⁶ Eyi i ŋkegbu ɔ, Pɔlu kplɔ ŋsu amɛnɛ lɔwo yiyi vayi wa edyuklɔklɔ kɔnu lɔ yiŋtɔ yi gbe wa nɔ wowo can. Le i godu ɔ, e yi Mawuxwe yi vayi nu azan ci gbe akɔnu lɔwo a vɔ do yi wo a sa avɔ nɔ nɔ wowo domɛtɔ ɖeka ɖeka do nɔ amɛwo. ²⁷ Ci yi ŋkeke amadrɛ yi gɔ vɔvɔnu ɔ, yuɖatɔ ciwo yi le Azi kan mɛ va kpɔ Pɔlu le Mawuxwe lɔ mɛ yi fɔn ahwakɔn lɔ do ji keŋ yi lii. ²⁸ Wo tɔ axwa dodo be:« Israyɛtɔwo, mi va xɔ nɔ mi! ŋsu ci yi le enu kplaa amɛshamɛ to afishafi ge. E kpankɔ jukɔn lɔ, ese ciwo yi Mawu do to Mɔyizi ji kodo Mawuxwe cɛ ! Ecɛ yɛ ɔ, egbe edɔn kplɔ amɛ ma nyi Yudatɔ ɖekawo va Nawuxwe lɔ mɛ yi so edyi texwe kɔkɔɛ cɛ !» ²⁹ Do ɔ, Yuɖatɔwo kpɔ Pɔlu kodo Trofimu ci yi so Efɛzi yi wo le eso dyiɛ ɔ le Ʒeluzalɛmu jugan lɔ mɛ vayi. Eyi wo bubu be Pɔlu kpɔɛ yi Mawuxwe lɔ. ³⁰ Ezin tɔntɔn le jugan le jugan lɔ pleŋ mɛ huu yi jukɔn lɔ lɔ́ ahwa so afi afiwo yi va le Pɔlu yi dɔin tii le Mawuxwe lɔ me yi cu ehɔn lowo zeɖeka ³¹ wo jijiɛ be yewo a wu Pɔlu. Vɔ ɔ, Hlɔmutɔwo sɔjawo ga va se be ezin tɔntɔn le Ʒeluzalɛmu lɔ pleŋ. ³² Zeɖeka ɔ, yɛ kplɔ Hlɔmutɔwo sɔjawo kodo sɔjakavehowigawo yi shi eju jeŋkɔ. Kaka ahwakɔn lɔ a kpɔ Hlɔmutɔwo sɔjawo ga lɔ kodo sɔja kpɛtɛwo ahan vɔ, wo mi Pɔlu xoxo. ³³ Eyi Hlɔmutɔwo sɔ jawo ga lɔ tegogo ehɔntexu yi le Pɔlu yi ɖe egbe be wo le blɛɛ kodo awlɛga amɛve. Le i godu ɔ, e biɔ ahwakɔn l se be mi yi e nyi mɛ yi nyi yi ewa mɛ. ³⁴ Vɔ le ahwakɔn lɔ mɛ, nɔ amɛɖewo dodo ɔ axwa yi le eɖe nuɔ ɔ, ebuwo a dodo ɔ axwa yi ale ebu nuɔ ɔ. Ci yi sɔjawo ga lɔ de se etɔ nɔ enyɔ ɖe le amɛɖe nu o le ezin ci yi tɔntɔn mɛ ɔ, é de egbe be wo le kplɔ pɔlu yi sɔjawo nɔxu. ³⁵ Ci yi Pɔlu toto ɔ exɔmɔnukpewo ji yi yigɔ hɔntɔxu lɔɔ, é va Ʒian yi sɔjawo kɔ Pɔlu do eji. Ɖo ahwakɔn lɔ le adan ji. ³⁶ Amɛ sugbɔtɔ le jukɔn lɔ mɛ yi kplɔ Pɔlu do yi le axwa do ɔ be: « Mi wui !» ³⁷ Ci yi wo kplɔ Pɔlu yigɔ kaka jijiɛ a ɖo sɔja wo nɔxu lɔ ɔ, énu nɔ sɔjawo ga lɔ be: « Enyɔ ɖeka le ŋ shi. A ɖe emɔ nɔŋ nɔ ma nui a ?» Eyi yɛ biɔɛ se be: « A nyi é se gblɛkigbe? ³⁸ D'e nyi eo yi nyi Ezipututɔ ɖeka ci yi na yi ezin tɔn le ŋkeke cɛwo mɛ yi kplɔ etogbantɔ kotokun amɛnɛ yi zaxu saklisakli mɛ ba? » ³⁹ Eyi Pɔlu ɖoŋci nü be:« Enyɛ ɔ, Yedatɔ ŋ nyi yi so Tasi jugan mɛ Silisi kan mɛ. Jugan ci yi nyikɔ yi eto nɔ mɛ yi ŋso. Ŋ ɖe kuku nɔ eo be eo le na egbe ŋ nɔ mzvo nuxu nɔ jukɔn lɔ.» ⁴⁰ Sɔjawo ga lɔ na egbe Pɔlu yi é de exɔmɔnukpe lɔ wo ji wa alɔ nɔ jukɔn lɔ yi amɛshamɛ bɔ enu. Eyi e xo nuxu nɔ wo le Eble, Yuɖatɔtɔwo gbe mɛ.