¹ Ci yi ezin lɔ mi tɔntɔn ɔ, Pɔlu dɔ yi wo yɔ nukplanvi lɔ wo nii yi é do ŋsɛn lanmɛ nɔ wo. Le i godu ɔ é klan wo yi kpe Maseduwanu. ² É to Maseduwanu 'kan lɔ mɛ yi nɔvi xɔsetɔ lɔwo gbɔ' yi dó ŋsɛn lanmɛ nɔ wo sugbɔ gbɔxwe yi vayi Glɛsi 'kan mɛ. ³ É nɔ hɔntɔxu sɔnanɔ weci amɛtɔn. Hwecinu yi é jijie a ɖoi etɔjihungangan yi a yi Sili 'ju mɛ ɔ, é se be Yuɖatɔwo blabla enu do eye nu yi a wa enu kodo eye. Eyi é va sɔ gbeta be ye a trɔyi Maseduwanu. ⁴ Sopatrosi ci yi nyi Pilusu ci so Bele jugan mɛ eviɛ ŋsu kplɔ Pɔlu do. Nɛnɛke Alishitaki kodo Sekundusu ciwo yi só Tɛsaloniki jugan mɛ gbe sɔ kpenɔ Gayiyusi ci yi só Dɛbe jugan mɛ ji be ye wo a kplɔɛ do hɛnnɛ. Timɔte kodo Tɔshiki kodo Trɔfimu ciwo yi so Azi 'kan mɛ ji be yewo a kplɔɛ do hɛnnɛ. ⁵ Amɛ cɛwo doŋkɔ yi vayi nɔ ete kpɔ mi le Trɔwasi. ⁶ Ci yi wo ɖu kpɔnnɔ ci ke mado 'xwe vayi ɔ, mi va ɖo etɔjihungangan le Filipi jugan mɛ yi vayi xotɔ wo yi ŋkeke amatɔn lɔ mɛ . Mi nɔ ⁷ Le kuɛshila ŋkeke ŋkɔtɔ mɛ ɔ, mi bɔ yi a ɖu ɖekawawa ' nuɖuɖu yi Pɔlu xɔ nuxu le Klisotɔ lɔwo ŋkɔ. E le nuxu xo ɔ kak ezangawive xo. Ɖó, é ɖó yi a só iŋke gbu. ⁸ Wo tɔ kaɖi gban sugbɔ do exɔ ci mɛ yi mi bɔ do lɔ tamɛ le exɔlixɔji lɔ mɛ. ⁹ Ɖajɛvi ɖeka ci wo yɔ nɔ be Etiki nɔ anyinɔnɔ do flɛsɛ 'tu. Ciyi Pɔlu nuxu va tɔ jijiji ɔ, ɖajɛvi lɔ va dɔn alɔn kaka é yi eku nii yi é fli je anyi so exɔlixɔji amɛtɔntɔ lɔ ji. Ci yi wo jijiɛ a kɔɛ ɔ wo kpɔ be yi ku vɔ, ¹⁰ Eyi Pɔlu ɖyi yi shi eju yi vayi kɔɛ do alɔmɛ yi nu nɔ amɛwo be:«Mi ŋgbe caka le susu mɛ o.É le agbé.» ¹¹ Le i godu ɔ, Pɔlu gbe trɔ yi la exɔlexɔji lɔ ji yi fɛn kpɔnnɔ mɛ yi ɖu yi gbe tɔ nuxu xoxo kaka eŋke gbɔxwe yi é va so. ¹² Ɖajɛvi lɔ fɔn yi wo kplɔɛ yi axwemɛ. É dó ŋsɛn lanmɛ nɔ amɛ sugbɔ. ¹³ Pɔlu yɛ sɔ gbeta be ye a to nyigban 'mɔ yi a va so mi le Asɔsi. Mi wo yɛ ɔ, mi wo ŋkɔ yi ɖó étɔjihungangan yi yi nɔ ete kpɔɛ le hɔntɔxu. ¹⁴ Ci yi é xotɔ mi le Asɔsi ɔ , é ɖɔ etɔjihun gangan lɔ mɛ le mi gbɔ yi mi yi Mitilɛnu jugan mɛ. ¹⁵ I ŋkegbu ɔ, mi sɔ etɔjihungangan lɔ so hɔntɔxu yi vayi shiwo etɔdomɛju mɛ ŋkɔ. Ci yi eŋ gbe ke ɔ, mi yi Samɔsu 'tɔdomɛju mɛ. Ŋkeke ci yi a kplɔ eyɛ dó ɔ, mi vayi ɖo Milɛ jugan mɛ. ¹⁶ Pɔlu de ji be ye gu gamɛ le Azi kan mɛ go. É yi na taɖo yi hwecinu yi wo jijiɛ ɔ, é sɔ gbeta be ye a to Efɛzi ŋkɔ. É le eblɛ dee be nɔ yi a nyɔ ɔ, ye a ɖo Zeluzalɛmu le panŋtekoti zan lɔ gbe. ¹⁷ Vɔ ɔ, Pɔlu va dɔ amɛ so Milɛ nɔ a vayi kplɔ Mawu 'ha lɔ 'hamɛmɛ ganwo vɛ nii le Efɛzi. ¹⁸ Ci yi wo va ɖo ɔ, é nu nɔ wo be:« Miwoŋtɔwo nya lehanci ŋ nɔ agbe kodo mi do, so ŋkeke ŋkɔtɔ lɔ ji, hwecinu nyan 'fɔ ŋkɔtɔ je Azi 'kan lɔ mɛ. ¹⁹ Ŋ sɔ enyɛɖeki hwe yi wa edɔ nɔ yehowa lɔ, shigbe hwashi nɛnɛ kodo vevesese kodo avi. Ɖo'ɔ Yuɖatɔwo do nɔ ŋ kpɔ. ²⁰ Le amɛwo ŋmɛ kodo axwewo mɛ enuɖe mawla dó mi ɔ, ŋ xo nuxu nɔ mi yi kplan mi enu ciwo pleŋ yi a dó alɔ mi. ²¹ Ŋ kplan enu Yuɖatɔwo kodo Glɛkitɔwo be wo le trɔ ɖaɖa Mawu gbɔ yi a sɔ trɔ wowo ɖekiwo a ji teŋ yi a xɔ mi wo 'xwetɔ Yesu ji se. ²² Ecɛ yɛ ɔ, ŋ ɖo a yi Zeluzalɛmu shigbe lehanci yi gbɔngbɔn kɔkɔɛ lɔ dró do nɛnɛ. Ŋ de nya enu ci yi a vayi jɔ do ŋ ji le hɔntɔxu o. ²³ Ci ɖekɛ yi ŋ nya yi nyi be nɔ ŋ yi gɔ jugan ɖekpokpoi mɛ ɔ, Gbɔngbɔn kɔkɔɛ ɖonɔ afɔ afɔta nɔ ŋ be gakpamɛ nɔnɔ kodo vevesesewo nɔnɔ ete kpɔ ŋ. ²⁴ Vɔ ɔ, nyaŋ 'gbe de ɖyinɔ enuɖe do ŋmɛ nɔ ŋ o. Enu ci yi le veviɖe nɔ ŋ, é yi nyi kpɔ be na wa edɔ ci yi Axwetɔ Yesu ɖo nɔ ŋ yi do eŋɛnyui lɔ nɔ agbetɔwo kaka a sɔyi vɔvɔnu. Eŋɛnyui lɔ yi ɖenɔ xomɛvunu ciwo yi Mawu wa nɔ dansin. ²⁵ Ecɛyɛ ɔ, enyɛ, ŋ nya nyuiɖe be mi wo pleŋ ci ji yi ŋ ɖyi esa to yi xo nuxu kodo axwa so jiŋkushi fiɔ ɖuɖu lɔ nu, nɔ, dɔ mɛtɔ ɖe dia gbe va kpɔ ŋ o. ²⁶ E yi na taɖo n tɛtɛɛ egbe do ji nɔ mi egbɛ be nɔ mi wo dɔmɛtɔ ɖ'e va trɔn ɔ, ŋ de le mɛ kodoi. ²⁷ Ɖo ɔ, dansin totomɛ ci yi Mawu wa lɔ pleŋ nɔ mi enuɖe mamla. ²⁸ Eyi na taɖo, mi le ebu nɔ miwoɖekiwo kodo lɛngbɔ ciwo yi Gbɔngbɔn kɔkɔɛ sɔ do ashi nɔ mi be miwo le kplɔ. Mi le ebu nɔ Mawu 'ha ci yi Mawu sɔ eviɛ jiji 'hun xwle. ²⁹ Enyɛ ŋ nya nyuiɖe be nɔ ŋ so le mi gbɔ , amɛ ciwo yi le shigbe elan wadanwo nɛnɛ a zo do mi mɛ yi a wa enu kodo lɛngbɔ lɔwo. ³⁰ Ŋsu ɖewo a só miwoŋtɔwo domɛ hɛnnɛ yi a tɔ enyɔwo nunu do akpo Klisotɔwo kplɔ wowoɖekiwo do'. ³¹ É yi naɖo ɔ, mi nɔ ŋzɔn. Mi ɖó eŋui yi be exwe amɛtɔn yi ŋ sɔ nɔ gbɔ yi ɖoɖo afɔ afɔta nɔ miwo domɛtɔ ɖeka ɖeka ezan kodo kede kodo dashi le ŋmɛ. ³² Ecɛ yɛ ŋ sɔ mi dodɔ alɔmɛ nɔ Mawu kodo yi xomɛvu 'nyɔ. Xomɛvu 'nyɔ lɔ a sɛn eŋ na yi mi a shin do ji le Mawuji xɔse mɛ. A gbe sɛn eŋ na yi mia xɔ enu ciwo pleŋ yi Mawu gbeɖɛ nɔ amɛ ciwo pleŋ yi é na yi wo nyi yitɔ. ³³ Ŋ de sɔ ŋkuvi sɔ ɖo amɛɖe 'ho amɛɖe shika alo amɛɖe wuwo ji kpɔ o. ³⁴ Miwoŋtɔ wo mi nya be edɔ yi ŋ sɔ enyɛŋtɔ 'lɔwo wa yi kpɔnɔ enu ciwo yi hian enyɛ enu ciwo yi hian enyɛ kodo amɛ ciwo yi kplɔnɔ n do. ³⁵ Le enushanu mɛ ɔ ŋ dansin i nɔ mi. Nɔ wo wa edɔ ahan ɔ, é yi wo kpɔnɔ enu yi a kpedo wamɛhɔwo nu yi a sɔ ɖo eŋui enyɔ ci yi Axwetɔ Yesu nu ji be "Yayra le wo a na enu amɛ mɛ sɔwu wo a xɔ enu le amɛ shi mɛ"» ³⁶ Ci yí Pɔlu nu enyɔ hɔn ɖegbɔ ɔ, é je ekloji yí do egbeɖaɖa kodo amɛ lɔwo pleŋ. ³⁷ Eyi amɛ lɔwo pleŋ fan avi sugbɔ yi fan Pɔlu yi kpla ashi ekɔ nii. ³⁸ Vevitɔ ɔ, wo ci ŋshishi mɛ. Ɖo Pɔlu nu nɔ wo be wo d'a gbe va kpɔ eye o . Le i godu ɔ, wo kplɔɛ yi ɖo do kaka etɔjihungangan lɔ gbɔ.