¹ Gacimɛ yi Apolosu le Kɔlɛnti ɔ, Pɔlu yɛ tó ekpowo 'kan mɛ yi yi Efɛzi. É kpɔ nukplanvi ɖekawo le hɔntɔxu. ² Yi nu nɔ wo be :«Mi xɔ Gbɔngbɔn kɔkɔɛ gacimɛ yi mi xɔse a ?» wo ɖoŋci nii be:« Mi de se yi wo xo nuxu so Gbɔngbɔn kɔkɔɛ ɖe nu kpetigo.» ³ Eyi Pɔlu nu be:«Mawu shi hinde yi wo le nɔ mi ɔ ? » Wo ɖoŋci nii be :«Mawushi lele zantɔ.» ⁴ Eyi Pɔlu nu be:«Amɛ ciwo yi lɔn be ye wo a trɔ yewoɖekiwo a ji yi zan wa zinzindotɔmɛ Mawutɔ nɔ. Zan nu nɔ Izrayɛli jukɔn be yi le xɔ amɛ ci yi le godu nɔ ye jise. Amɛ lɔ yi nyi Yesu.» ⁵ Ci yi amɛ lɔwo se enyɔn hɔnwo wo na yi wo wa zinzindotɔmɛ Mawutɔ nɔ wo le Axwetɔ Yesu nyikɔ mɛ. ⁶ Pɔlu sɔ alɔ dado eta nɔ wo yi Gbɔngbɔn kɔkɔɛ ɖyiva wo ji yi wo tɔ egbe ebu ebuwo dodo yi tɔ eŋɛnyui lɔ dodo, eŋɛnyui dotɔwotɔ han. ⁷ Amɛ lɔwo pleŋ nyi wive han. ⁸ Eyi Pɔlu yi yi tɔ nuxu xoxo nɔ amɛwo le Mawusɛnxu kodo kankandoji sɔ na wleci amɛtɔn. É xonɔ nuxu so Mawu 'fiɔɖuxu lɔ nu yi tenɔ kpɔ nɔ wo a nya be ye 'nyɔ nyi nyɔnɔ nui. ⁹ Vɔ ɔ, amɛ sugbɔ wo shinnɔ ŋta yi gbenɔ be yewo d'a to emɔ ci yi Axwetɔ lɔ be wo lé tó go yi a le enyɔ flufluwo nuɔ so lehanci Axwetɔ ji be wo le nɔ agbe do lɔ nu le amɛshamɛ ŋmɛ. Eyi Pɔlu kplɔ nukplanvi lɔwo yi so le wo gbɔ yi yi Tilanɔsu sukulu 'kpamɛ kodo wo. Gbeɖeka duu ɔ, Pɔlu to nɔ Mawu 'nyɔ mɛ kodo nukplanvi lɔwo le hɔntɔxu. ¹⁰ Ahan yi é weɛwɛɛ kaka sɔ na exwe amɛve nɛ . Eyi amɛshamɛ ci yi le Azi 'kan hɔn lɔ mɛ, Yuɖatɔwo kodo Glɛkitɔ wo se Mawu 'nyɔ lɔ. ¹¹ Gahɔnmɛ ɔ, Mawu le enujiŋ ganganwo wagɔ to Pɔlu ji. Kaka amɛwo sɔn jukuviwo kodo avɔviwo tɔ nɔ gotu nii yi sɔyi tɔnɔ adɔnɔwo yi edɔ minɔ nɔ wo. ¹² Nɛnɛke wo gbe sɔ wo yi tɔnɔ amɛ ciwo yi gbɔgbɔnvɔnwo ɖeɖeɛ efun nɔ yi wo tonɔ le amɛ lɔwo mɛ nɛ. ¹³ Yuɖatɔ ɖeka ciwo yi ɖyi esa to afi, afiwo yi a le gbɔngbɔnvɔnwo nya gɔ le amɛwo mɛ can tenɔ kpɔ be yewo a sɔ Axwetɔ Yesu nyikɔ nya gbɔngbɔnvɔnwo. Wo nunɔ nɔ gbɔngbɔnvɔnwo be:«ŋ ɖeɖeɛ egbe do mi ji be miwo lé tó le Yesu ci yi 'nyɔ Pɔlu dona axwe yi nunɔ nyikɔ mɛ.» ¹⁴ Amɛ amadrɛ ɖekawo yi wanɔ nɛnɛ. Wowo yi nyi Yuɖatɔwo 'vɔsatɔ gangantɔ ci yi wo yɔnɔ be seva eviɛwo. ¹⁵ Vɔ gbeɖekɔ ɔ, gbɔngbɔnvɔn va nu nɔ wo be:«ŋ jeshi Yesu ɖɛ yi nya amɛ ci yi nyi Pɔlu. Vɔ miwo ɖee, mi ŋmɛ miwo nyi ɔ ?» ¹⁶ Eyi amɛ ci gbɔngbɔnvɔn ɖeɖeɛ efunɔ lɔ teje wo ji yi do agbla kodo wo pleŋ ŋsɛntɔ kaka ɖu wo ji. É do akpa wo nu yi ɖe wo do ama yi wo shi tó le axwe lɔ mɛ. ¹⁷ Amɛ ciwo pleŋ yi le Efɛzi jugan mɛ, Yuɖatɔwo kodo Glɛkitɔwo se enu ci yi jɔ do Seva eviɛ lɔwo ji. Enu lɔ nyi vɔnvɔn nɔ wo pleŋ yi wo kafu Axwetɔ Yesu nyikɔ. ¹⁸ Amɛ ciwo yi va trɔ xɔsetɔ domɛtɔ sugbɔtɔ va hunhuɔn enuvɔn ciwo yi wo wa vayi sasa mɛ agbaŋgba. ¹⁹ Amɛ sugbɔtɔ ci yi wanɔ maziki sasa lɔ wowo wema mazikitɔwo vɛ yi wo tɔtɔ ezo wo le ŋmɛ nɔ amɛshamɛ. Wo drɔ wema lɔ wo 'hó kpɔ yi kpɔ be yi sun gajɔnho kotokun kahowo (50000). ²⁰ Nɛnɛ Mawu ŋsen na yiyi 'nyɔ kekekeɛ eta yi gbe ɖoɖo ŋsɛn do ji dó nɛ. ²¹ Le enu ciwo yi jɔ hɔn godu ɔ, Pɔlu wa tótó le yiɖekimɛ be ye a to Masedowanu kodo Akayi 'kan mɛ keŋ yi a yi Zeluzalɛmu jugan mɛ. É nu be:« Nɔ ŋ va sé le Zeluzalɛmu ɔ, ŋ ɖo a gbe yi kpɔ Hlɔmu jugan mɛ.» ²² Eyi é dɔ yi kpedonutɔ amɛve, Timote kodo Elasi ɖaɖa Masedowanu yi yiŋtɔ gbe ci Azi 'kan lɔ mɛ hwɛɖeka. ²³ Gahɔnmɛ ɔ, ezin ɖeka tɔn le Efɛzi jugan mɛ so emɔ ci yi Axwetɔ ji be wo le tó nu. ²⁴ Gajenuwatɔ ɖeka li. Wo yɔɛni be Demetriwusu. É sɔnɔ ehokɔ' mɛnɔ voju ci yi wo yɔ nɔ be Atemisi ' xɔvi hanwo. É sanɔ wo yi cu nɔ efɛn sugbɔ nɔ yi 'dɔwaviwo. ²⁵ Gbeɖeka ɔ, Demɛtriwusu va bɔ amɛ lɔwo kodo amɛ ciwo yi wanɔ edɔ hɔn hanwo yi nu be: Nyaŋ 'xlɔwo, mi nya be edɔ nɔn yi na yi mi kpɔ yi ɖunɔ. ²⁶ Vɔ mi trɔ kpɔkpɔ yi gbe seseɛ be Pɔlu hɔn va nunuɔ be voju ciwo yi agbetɔ 'lɔwo mɛ daɖɛ de nyi enu yi wo a sɛn go. É wɛɛ kak amɛ sugbɔ xɔ egbe do yi 'nyɔ ji le Efɛzi jugan mɛ elɛ kaka yi Azi 'kan lɔ pleŋ mɛ. ²⁷ Enu hɔn d'a va gble edɔ nɔ mi ba? D'a na yi amɛɖe can d'a gbe va kpɔkpɔ Atemisi 'xɔ do enuɖe ji go ba? D'a na yi amɛɖe can d'a gbe dodo ɔ bubu voju gangan hɔn ci yi wo sɛnnɔ le Azi 'kan lɔ mɛ kodo xexe lɔ plen mɛ nu shigbe sasa nɛnɛ go ba? Nɔ é le nɛnɛ ɔ, a nyi à bu yi gangangan!» ²⁸ Ci yi amɛ lɔwo se nyɔ hɔnwo ɔ, wo do dɔmɛzi yi tɔ axwa dodo be:«Voju gangan yi nyi Atemisi, Efɛzitɔwo voju!» ²⁹ Eyi Ezin tɔn le jugan lɔ pleŋ mɛ. Amɛwo teje ezin lɔ mɛ vayi le Gayiyusi kodo Alishitaki Maseduwanutɔ ciwo yi kplɔnɔ Pɔlu do. Nɛnɛ ɔ, wo pleŋ lɔ wo lɔ axwa yi dɔn wo yi jugan lɔ bɔbɔ waxu. ³⁰ Pɔlu yɛ ji be ye a kplɔ wo do le ahwakɔn lɔ mɛ. Vɔ ɔ, nukplanviwo de lɔn nii go. ³¹ Azi 'kan lɔ mɛ 'fiɔhadɔwatɔ gangan ɖeka ciwo yi nyi exlɔ kodo Pɔlu dɔ amɛwo ɖaɖɛɛ be yewo ɖe kuku yi ŋgbe yi jugan bɔbɔwaxu lɔ go. ³² Nɔ amɛɖewo dodo ɔ axwa yi le eɖe nuɔ ɔ, eɖewo a dodo axwa yi a le ebu nu ɔ. Ezin tɔntɔn le agun lɔ mɛ kaka amɛ sugbɔwo ŋlɔbe enu ci gbe yi é to. ³³ Yuɖatɔwo sɔ ŋsu ɖeka ci yi wo yɔnɔ be Alɛsandri ɖaɖa doŋkɔ nɔ wowo ɖekiwo yi amɛ ɖekawo ɖeɖeɛ enu ci yi jɔjɔɔ gɔnmɛ nii le ahwakɔn lɔ mɛ. Eyi Alɛsandri kɔ alɔ yi eji yi a xo nuxu a sɔ hwlɛn ata nɔ yiɖeki le jukɔ lɔ ŋkɔ. ³⁴ Vɔ ɔ, ahwakɔn do jeshi yi be Yuɖatɔ yi yni. Eyi amɛshamɛ bɔ tɔ axwa dodo sɔ na agaxoxo amɛve han be:«Voju gangan yi nyi Atemisi, Efɛzitɔwo voju!» ³⁵ Le vɔvɔnu ɔ, jugan le wemajikpɔtɔ do egbla kaka yi ahwakɔn lɔ bɔ enu yi é nu be:« Efɛzitɔwo, mi yi de nya miwo jugan yi nyi voju gangan Atemisi 'xɔ kodo voju lɔ 'cikpakpɛ ci yi jɔn so jiŋkushi mɛ cɔtɔ go» ³⁶ Amɛɖe d'a gbé hɔn yɛ go. É yi na taɖo ɔ, mi xɔ gbɔngbɔn nɔ mi ŋgbe va wa enuɖe tamɛ mabukpɔ go. ³⁷ Ɖó amɛ ciwo yi mi kplɔ va elɛ de gblé enude le voju lɔ 'xɔmɛ go. Nɛnɛke yi wo de zu voju lɔ go nɛ. ³⁸ É yi na teɖo nɔ Demetriwusu kodo yi kpenawo ɖó ehwɛ ɖe ɖe yi a do nɔ amɛɖe ɔ, kojoɖoɖo ŋkekewo li yi kojoɖotɔwo li. Wo le yi do ehwɛ nɔ amɛ lɔwo le hɔntɔxu! ³⁹ Nɔ enyɔ bu ɖe gbe le mi shi ɔ, agun lɔ a gbe va bɔ yi a nu dó nu shigbe lehanci yi miwo 'sé nui do nɛnɛ. ⁴⁰ Nɔ mi de kpɔ nyuiɖe go ɔ, wo a va dó ehwɛ nɔ mi be miwo fɔn egu do efiɔha nu yi a nyi ezin ci yi tɔn egbɛ ŋci. Ɖo enyɔ ɖe de li nɔ wo biɔ mi se, mi a nu be é yi jɔ yi mi bɔ ahan go.» ⁴¹ Ci yi wemajikpɔtɔ lɔ nu enyɔ cɛwo ɖegbɔ ɔ, é nu nɔ agun lɔ be wo lé kan.