¹ Ci yi Pɔlu kodo Silasi yiyiɛ ɔ, wo tó Anfipoli kodo Apoloni jugauwo mɛ yi yi Tɛsaloniki jugan mɛ, fini ci Yudatɔwo Mawusɛnxu ɖeka le. ² Pɔlu yi Mawusɛnxu lɔ shigbe lehanci yi é wɛɛni do ɛnɛ. E dɔn enyɔ kodo wo so Mawu nyɔ wema lowo nu sɔnanɔ Gbɔngbɔngbe amɛtɔn. ³ É na yi wo mɔŋje wo nɛ be Kliso ɖo a kpe efun. Vɔ ɔ, Mawu a fɔin le amɛkukuwo domɛ. É nu nɔ wo be :«Yesu ci inyɔ nuɔ ŋ le nɔ mi ɔ è yi nyi Kliso lɔ.» ⁴ Enyɔ lɔwo wa edɔ le lanmɛ nɔ amɛɖewo le wo mɛ yi wowo kplɔ Pɔlu kodo Silasi do. Ahanke wo gbe wa edɔ le lanmɛ nɔ Glɛsitɔ ciwo yi sɛnnɔ Mawo kodo nyɔnu sugbɔtɔ le amɛ ŋkuvilejiwo dodomɛ nɛ. ⁵ Vɔ ɔ, é jé ŋhawan ji nɔ Yudatɔwo yi wowo vayi kplɔ gbevuviwo le emɔwo ji bɔdo wowoɖekiwo nu yi dó zigidi dó ahwankɔn lɔ me yi na yi ezin tɔn le jugan lɔ mɛ. Wo yi trɔdo ŋsu ɖeka ci yi wo yɔnɔ be zasɔn xwe yi sɔ jijiɛ Pɔlu kodo Silasi kpɔ yi a kplɔ wo yi jukɔn lɔ ŋmɛ. ⁶ Vɔ kpɔ wo ɖe kpɔ wo go. Eyi wo le zasɔn kodo nɔvi ɖekawo hɛnsɔyi kojoɖotɔwo gbɔ le jugan yi vayi tɔ axwa dodo le hɔntɔxu be:«Ŋsu cɛwo na yi ezin tɔntɔn le xexe lɔ pleŋ mɛ. Ecɛyɛ ɔ, wo va ɖo elɛ! ⁷ Zasɔn xɔ wo dó yi xwe mɛ! wo wawa enu yi dada le Hlɔmu fiɔgangan , Seza sewo ji nunuɔ be efiɔ bu gbe li yi yi nyikɔ yi nyi Yesu.» ⁸ Ci yi Ahwankɔn lɔ kodo jugan lɔ mɛ kojoɖotɔwo se enyɔ cewo ɔ , wo caka le wowoɖekiwo mɛ. ⁹ Eyi wo xɔ eho gangan ɖeka le zasɔn kodo nɔvi lɔwo shi gbɔxwe yi tashi wo. ¹⁰ Eyi zedeka le ezan lɔ mɛ ɔ, nɔvi lɔwo vayi ɖo Pɔlu kodo Silasi yi wo yi be le jugan mɛ. Ci yi wo vayi ɖo hɔntɔxu ɔ, wo yi Yuɖatɔwo Mawusɛnxu. ¹¹ Yuɖatɔ hɔntɔ wowo se onu gɔnmɛ sɔwu ciwo yi le Tɛsaloniki. Wowo xɔ Mawu nyɔ lɔ ji se kodo ezo yi ŋkeŋke ɔ, wo kaŋkannɔ Mawu nyɔ wema lɔwo mɛ kpɔ, kpɔ be enyɔ ciwo yi wo nunuɔ nɔ wo nyi nyɔnɔnuimɛ. ¹² Amɛ sugbɔ trɔ xɔsetɔ le wo mɛ. Glɛkitɔ nyɔnu ŋkuvilejiwo kodo wowo ŋsu sugbɔ ɖekawo can trɔ xɔsetɔ. ¹³ Vɔ ci yi Yuɖatɔ ciwo yi le Tɛsaloniki se be Pɔlu nunuɔ Mawu nyɔ le Bele can ɔ, wo va hɔntɔxu yi gbe tɔ zigidi dodo dó ahwakɔn lɔwo mɛ nɔ ezin a tɔn. ¹⁴ E yi na taɖo yi nɔvi lɔwo kplɔ Pɔlu yi ɖoɖogbe ezɖeka yi jeŋkɔ axutu age kodoi. Vɔ ɔ, Silasi kodo Timɔte wowo Bele. ¹⁵ Amɛ ciwo yi kplɔɛ jeŋkɔ lɔwo kplɔɛ kak yi Atɛnu jugan mɛ. Gbɔxwe wo a trɔyi Bele ɔ, Pɔlu do eŋɛ nɔ wo be wo le do nɔ Silasi kodo Timɔte be wo le ɖe eblɛ a xotɔ eye le Atɛnu. ¹⁶ Ciyi Pɔlu le ete nɔɔ kpɔ Silasi kodo Timɔte le Atenu ɔ, é kpɔ be vojuwo ɖɔ jugan lɔ mɛ sugbɔ kak yi e gbe kpekpe nɔ yi gbɔngbɔn. ¹⁷ Le Mawusɛnxu ci yi le hɔntɔxu lɔ mɛ ɔ, Pɔlu dɔnnɔ enyɔ so Mawu nyɔ lɔ nu kodo Yuɖatɔwo kodo amɛ ciwo yi sennɔ Mawu. Nɛnɛke ŋkeŋke ɔ, é gbe wɛɛni kodo amɛ ciwo yi le godoxu. ¹⁸ Ŋununyatɔ Epikui 'gbɛvi ɖekawo kodo ŋununyatɔ shitowa 'gbɛvi ɖekawo va yi a va kan seŋ kodo Pɔlu. Wowo domɛtɔ ɖekawo biɔbiɔ wowoɖekiwo se be:«Enyɔ ci yi nuxusugbɔxotɔ hɔn nuɔ ɔ?» Amɛ buwo nunuɔ be:«É le shigbe be enusɛnsɛn ciwo yi de le miwo gbɔ le elɛ nu yi é xoxoɔ nuxu so ɛnɛ» ¹⁹ Eyi wo lé Pɔlu yi kplɔɛ yi ejunyɔxoxu, fini ci yi wo yɔnɔ be Alewopazi yi nu nii be:«Mi a sɛn eŋ nya enu ci yi nyi nukplanamɛnyɔ yoyu ci yi é nunuɔ a? ²⁰ Ɖó ɔ, è le enyɔ ciwo yi ni de se kpɔ go nuɔ do etɔmɛ nɔ mi. Mi ji be mi a se enyɔ lɔwo gɔnmɛ.» ²¹ Nyɔnɔnuitɔ ɔ, Atɛnutɔwo pleŋ kodo mɛdru ciwo yi le jugan lɔ mɛ zannɔ wowo gamɛwo a sɔ seseɛ enyɔjɔjɔyoyuwo yi gbe xonɔ nuxu so wo nu. ²² Pɔlu shite le dodomɛ nɔ ejunyɔxoxu lɔ yi nu nɔ wo be:«Atɛnutɔwo, ŋ do jeshii le miwo 'nuwawawo pleŋ mɛ be mi sennɔ enuwo sugbɔ. ²³ Ɖo hwecinu ŋ ɖyiɖyi esa le jugan lɔ mɛ yi kpɔkpɔ miwo nusɛnsɛnwo ɔ, ŋ kpɔ yi wo ŋwlɛ do avɔsakpe ɖeka nu be:"Avɔsakpe cɛ nyi enumajeshi ci yi wo sɛnsɛn tɔ". É yi na taɖo ɔ, enu majeshi ci yi mi sɛnsɛn nu yi enyɛ, ŋ le nuxu xoxo ɔ so nɔ mi. ²⁴ Mawu ci yi wa egbɛ lɔ kodo enushanu ci yi le mɛ, amɛ ci nyi Axwetɔ le jinkushi mɛ yi gbe nyi le nyigban ji de nɔnɔ axwe ci agbetɔwo sɔ alɔ cu nii mɛ go. ²⁵ Yi 'dɔ de zian agbetɔwo 'lɔ go. Ɖo enuɖe de hwedii go. E yi na agbe , gbɔngbɔn kodo enu kpɛtɛwo pleŋ amɛshamɛ. ²⁶ Amɛ kuɖeka yi é wa yi sɔ wa jukɔnwo pleŋ nɔ wowo a nɔ nyigban lɔ pleŋ ŋmɛ. E do lixowo nɔ wo yi gbe ɖo eshihwenuwo kodo efiɔtawo ɖɛ. ²⁷ Mawu wa enu lɔ ahan nɔ agbetɔwo a jii. Nɔ kpɔkpɔ gbe ɖeɖeɛ efun nɔ wo can, d'é jiji le amɛɖeka , amɛɖeka gbɔ go. ²⁸ Ɖo:" É yi mɛ yi mi nɔnɔ agbe le yi yiyiɛ yi gbɔgbɔ yi lehanci yi mi le do cɛ." Enyɔ hɔn cucucu yi miwo 'hajitɔwo domɛtɔ ɖekawo nu vayi be:"Mawu eviɛwo yi mi nyi hɛnnɛ." ²⁹ Ci yi mi nyi Mawu eviɛwo hɛnnɛ ɔ, mi de ɖe yi a sɔ Mawu dodoɔ acikpakpɛ ci yi agbetɔ ɖe susu yi sɔ shika , ekokɔ alo ekpe mɛ kodo adaŋ tɔxu go. ³⁰ Vɔ ɔ, Mawu va ŋwla ŋkuvi do enu ciwo agbetɔwo wa le manyamanya mɛ. Ecɛɖɛyɛ ɔ, é va yɔyɔ ɔ wo pleŋ le afishafi pleŋ be wo le trɔ wowoɖekiwo a ji. ³¹ Ɖó ɔ, é ɖo azan ɖeka ɖɛ yi a va ɖo kojo jɔjɔɛɖe kodo amɛshamɛ ci yi le xexe lɔ pleŋ mɛ tó amɛ ɖeka ci yi e can ji. Mawu ɖo asi nɔ amɛshamɛ be ye gbɔgbɔ kojo lɔ dogbe nyao sɔ to amɛ cancan lɔ ji hwecinu yi e fɔin so eku wodi !» ³² Ci yi wo se yi Pɔlu xo nuxu so fɔnfɔn so kuwodi nu ɔ, amɛ ɖekawo tɔ kokoi yi amɛ ɖowo nu nii be:«Gabumɛ, mi a gbe va se yi na nu enyɔ hɔn ke.» ³³ Eyi Pɔlu so le wo gbɔ. ³⁴ Gankegan ɔ, amɛ ɖowo gbe kplɔɛ do yi xɔ Yesu ji se. Amɛ lɔwo domɛtɔ ɖekpawo yi nyi ŋsu ci yi wo yɔnɔ be Denisi ejunyɔxoxu ' yawo ɖomɛtɔ ɖeka kodo nyɔnu ci yi wo yɔnɔ be Damalisi sɔkpenɔ ame buwo.