¹ Le esadyidyi lɔ mɛ ɔ, Pɔlu vayi ɖo Dɛbe jugan mɛ, so le hɔntexu, yiyi Lisitɔ jugan mɛ. Nukplavi ɖeka le ehɔntɔxu lɔ. Wo yɔɛni be Timote. Enɔlɔ nyi yuɖalɔ gbɔxwe va trɔ klisotɔ. Vo ɔ, edalɔ nyi Glɛkitɔ. ² Nɔvi Klisotɔ ciwo yi le Lisitɔ kodo Ikoniwɔnu ɖenɔ kunu nyuiwo so timote lɔ nu. ³ Pɔlu ji be Timote a kplɔ eye do a tɔ edɔ wawa kodo eye a jeŋkɔ. Eyi ci yi yuɖatɔ ciwo pleŋ yi le ekan hɔn mɛ nya be glɛkitɔ yi nyi Timote edalɔ ɔ, Pɔlu so evo nii. ⁴ Nɔ wo ɖo jugan ɖe mɛ ɔ, wo ɖenɔ gbeta ciwo ji amɛdɔdɔwo kodo Ʒeluzalɛmu hamɛmɛganwo ɖo ekpe nɔ amɛwo nɔ wo a wa do wo ji. ⁵ Eyi Mawu ha lɔwo liliɛ eke le xɔse mɛ yi gbe susuɔ gbɔ do ji ŋkeŋke. ⁶ Ci yi gbɔngbɔn kɔkɔɛ gbe nɔ Pɔlu kodo Silasimɔ wo ŋgbe nu Mawu nyɔ lɔ le Azi kan mɛ o ɔ, wo to Flizi kodo Galati kanwo mɛ tiin vayi. ⁷ Gacimɛ yi wo va gogo Misi kan lɔ mɛ ɔ, wo ji be yewo a yi Bitini kan mɛ. Vɔ kpɔ Yesu Gbɔngbɔn de de emɔ nɔ wo o. ⁸ Eyi wo soi to Missi kan mɛ yi yi Trowasi jugan mɛ. ⁹ Ezan mɛ ɔ, Pɔlu kpɔ Maseduwanutɔ ŋsu ɖeka ŋtegantɔ yi e le ete yi le kuku déɛ nii be:« Va Maseduwanu yi a do alɔ mi! » ¹⁰ Ci yi Pɔlu kpɔ ŋtegan hɔn ɔ, mi mɔŋjemɛ be Mawu yi yɔyɔ mi nɔ miwo le hɛn Eŋɛnyui lɔ sɔyinɔ amɛwo le Maseduwanu kan lɔ mɛ. Eyi mi drado yi a yi ehɔntexu . ¹¹ Nɛnɛ ɔ, mi do etɔjihungangan ɖeka le tro wasi jugan lɔ mɛ yi zɔn yi samɔtra si tɔdomɛju mɛ zedeka. I ŋkegbu ɔ, mi yi Nɛya polisi jugan mɛ. ¹² Eyi mi va so le ehɔntexu yi zɔn yi Filipu. Filipu nyi jugan ci yi gangan sɔwu le Maseduwanu kan lɔ mɛ yi gbe nyi jugan ci yi Hlɔmutɔwo kpa acɛ nɔ. Mi nɔ Hɔntexu ŋkeke ɖewo gbɔxwe va so. ¹³ Gbɔngbɔngbe ɔ, mi to le jugan lɔ mɛ le axa nɔ tɔhwin ɖeka finici mi bubu be mi a kpɔ yuɖatɔwo gbedodoɖaɖawaxu dé le. Mi nɔ anyinɔnɔ yi xo nunu nɔ nyɔnu ciwo yi bɔdo ehɔntexu. ¹⁴ Nyɔnu ɖeka le nyɔnu lɔwo domɛ yi so Tiyati jugan mɛ. Wo yɔɛni be Lidi yi e sanɔ avɔ adoduiwo yi sɛnnɔ Mawu. E seseɛ enyɔ ciwo yi Pɔlu nunu yi Mawu hun eji nii yi e xɔ wo. ¹⁵ Wo do eshi eta nɔ nyɔnu lɔ kodo yi xomu pleŋ yi e yɔ mi yi nu nɔ mi be : «Nɔ mikpɔ be ŋ xɔ Axwetɔ ji se nyao ɔ, mi a ze ŋ gbɔ.» E tɛ do mi ji nɔ mi a lɔn. ¹⁶ Gbeɖeka ci yi mi yiyiɛ gbedodoɖa-ɖawaxu ɔ, edɔ wavi nyɔnu ɖeka va do ego mi. Enukankan gbɔngbɔnle mɛ yi na nɔ yi e nunɔ enu ci yi gbɔngbɔn yi a va jɔ nɔ amɛwo. Yigawo kpɔnɔ eho sugbɔ le enu ci yi e kannɔ lɔ mɛ. ¹⁷ Nyɔnu hɔn kplɔ miwo kodo Pɔlu do yi le axwa do ɔ be: « Mawu ci yi le eji boo dɔwaviwo yi nyi ŋsu cɛwo! wo le emɔ ci yi a to yi a kpɔ hwlɛngan dreɛ nɔ ni!» ¹⁸ Ahan yi nyɔnu lɔ le enu lɔ waa kaka sɔnanɔ ŋkeke ɖewo nɛ. Kpɛtɛ kpɛte lɔ ɔ, enyɔ lɔ va do dɔnezi nɔ Pɔlu yi e trɔkpɔ godu yi nu nɔ gbɔngbɔn lɔ be: « Le Yesu Kliso nyiko mɛ, ŋ ɖeɖe egbe do eo ji be be eo le to le nyɔnu lɔ mɛ!» Eyi Zeɖeka vɔ gbɔngbɔn lɔ to le mɛ. ¹⁹ Nyɔnu lɔ gawo va kpɔ be emɔnu ɖe de gbe li yi yewo a kpɔ eho to nyɔnu lɔ ji o. Eyi wole Pɔlu kodo silasi yi dɔn wo hɛnyi godoxu le jumɛgawo ŋkɔ. ²⁰ Nɛnɛ ɔ, wo kplɔ wo yi Hlɔmutɔwo kojodotɔwo gbɔ yi nu be:« Yudatɔwo yi le hunnyahunnya do ɔ miwo jugan lɔ mɛ. ²¹ Wo le ekɔ ciwo yi wo de emɔ be iwo, Hlɔmutɔwo a xɔ alo anyi o, kplaa amɛwo.» ²² Ahwakɔn lɔ can gbe trɔkpe Pɔlu kodo silasi. Kojoɖotɔwo dɔ yi wo de awuwo nɔ wo yi ya wo. ²³ Ci yi wo ya wo vevieɖe ɖegbɔ ɔ, wo vayi cu do gakpamɛ yi nu nɔ gakpaji-kpɔtɔ lɔ be yi lé ŋkuvido wo nu. ²⁴ Zedeka ci yi wo ɖe egbe lɔ nii ahan. Vɔ, e sɔ wo do exɔ dodo mɛtɔ mɛ yi do eka cikpu afɔwo nɔ wo. ²⁵ Ezanmɛ do gawive han mɛ nu ɔ, Pɔlu kodo Silasi le egbedodoɖaɖa waa yi jijiɛ eha kanfu kanfu Mawu. Gakpamɛtɔ kpɛtɛwo do eto yi sisiɛ. ²⁶ Eyi zeɖeka vɔ nyigban hunhun sɛnsin yi gakpaxɔ lɔ nyiɖuwo hunhun. Ehɔnwo pleŋ hun zeɖeka yi ekawo cu le afɔwo nunɔ gakpamɛnɔtɔwo pleŋ. ²⁷ Gakpaji kpɔtɔ lɔ nyɔ yi kpɔ gakpaxɔ lɔ hɔnwo le hunhun. E bubu ɔ bé gakpamɛnɔtɔ lɔwo shi yi ɖe dekpui tü le aku mɛ yi a wu yideki. ²⁸ Eyi Pɔlu do axwa sɛnsin be: Ŋgbe wa enuvɔn ɖe kodo eoɖeki o! Mi pleŋ le elɛ» ²⁹ Gakpajikpɔtɔ lɔ vɔnvɔn kaka hunhun ɔ, gegege yi dɔ yi wo sɔ kaɖigban vɛ nii yi e d'eblɛ yi ɖo exɔ lɔ mɛ yi je eklo ji do akɔn mɛ nɔ Pɔlu ko do silasi. ³⁰ Edɔ yi wo kplɔ wo tii yi nu be: « Meganwo,nyi yi na wa yi a kpɔ hwlɛngan ɔ? » ³¹ Eyi wo ɖoŋcinii be:« Xɔ Axwetɔ Yesu ji se yi a kpɔ Hwlɛngan, eo kodo ao xomu pleŋ.» ³² Eyi wo nu Mawu nyɔ nɔ gakpajikpɔtɔ lɔ kodo amɛ ciwo pleŋ yi le yi xwe mɛ. ³³ Gakpajikpɔtɔ lɔ kplɔ wo ezan hɔn mɛ zeɖeka yi vayi klɔ akpawo nɔ wo. Eyi wo do eshi ta nɔ yi kodo yi imɛwo. ³⁴ Edɔ yi wo kplɔ Pɔlu kodo Silasi yi yi xwe yi éɖa enu yi woɖu. Eji jɔ yi kodo yi xomu lɔ pleŋ be yewo xɔ Mawu ji se. ³⁵ Ci yi eŋ ke ɔ, Hlɔmutɔwo kojoɖotɔwo dɔ kpovishiwo ɖaɖa gakpajikpɔtɔ lɔ be yi le tashi Pɔlu kodo Silasi nɔ wa a yi. ³⁶ Eyi gakpajikpɔtɔ lɔ vayi nu nɔ Pɔlu be:« kojodotɔwo do eŋɛ ɖaɖa be enyɛ le tashi mi. E yi na taɖo ɔ, mi yi le fafa mɛ » ³⁷ Vɔ ɔ, Pɔlu nu nɔ wo be: « kojoɖotɔ lɔwo dɔ yi wo xo mi le amɛshamɛ ŋmɛ yi sɔyi cu do gakpamɛ, kojomado. Gankegan é nyi Hlɔmu jumɛviwo yi mi nyi: Ecɛyɛ ɔ, lé é wɛɛ yi wo jijlɛ a va tashi mi le bebemɛ ɔ? A nyi ahan go! wowoŋtɔwo le va tashi mi. ³⁸ Kpovishi ciwo yi wo dɔ ɖaɖa lɔwo vayi ɖe enyɔ lɔ nɔ kojoɖotɔ Hlɔmutɔ lɔwo ahan. Eyi vɔnvɔndo kojoɖotɔ lɔwo gacimɛ yi wo va be Pɔlu kodo Silasi nyi Hlɔmutɔwo. ³⁹ Eyi wo va Pɔlu kodo Silasi gbɔ yi va ɖe kuku nɔ woyi tashi wo keŋ yi biɔ so wo gbɔ be wo le so le Filipu jugan lɔ mɛ. ⁴⁰ Ci yi Pɔlu kodo Silasi to le gakpamɛ ɔ, wo yi Lidi xwemɛ yi vayi kpɔ nɔvi klisotɔwo yi do ŋsɛn lanmɛ nɔ wo keŋ yi so le jugan lɔmɛ.