¹ Amɛɖekawo só Ʒude 'kan mɛ yí vá Antiwoshi jugan mɛ yí va tɔ enu kplankplan nɔvi xɔsetɔwo be: « Nɔ́ amɛɖe de so evo shigbe lehanci yí ese ciwo yí Mawu sɔ tó Mɔyizi ji lɔwo nui do nɛnɛ go ɔ, d'a kpɔ́ hlɛngan go.» ² Pɔlu kodo Banabasi de xɔ egbe do amɛ lɔwo 'nyɔ jí go yí dɔn enyɔ lɔ kodo wo sɔgbɔ. Eyi wo sɔ gbeta be Pɔlu kodo Banabassi Antiwɔshi jugan mɛtɔ ɖewo lé yi Ʒeluzalɛmu a yi le enyɔ lɔ kpɔ kodo amɛdɔdɔwo kodo ehamɛmɛganwo. ³ Mawu 'ha lɔ sɔ́ enu ciwo yí hìan nɔ́ emɔ zɔnzɔn lɔ ná wo. Wo tó Finis kodo samali 'kanwo mɛ yí le lehanci yí amɛmanyi yuɖatɔwo trɔva Mawu gbɔ́ dó nuɔ hlɛnhlɛnhlɛn nɔ nɔvi xɔsetɔ lɔwo pleŋ . ⁴ Ci yí wo vayi ɖo Ʒeluzalɛmu jugan mɛ ɔ, Mawu 'ha kodo amɛdɔdɔ ehamɛɛganwo lɔwo xɔ wo. Pɔlu kodo Banabasi nu enu ciwo yí Mawu tó wo ji yí wa nɔ wo. ⁵ Ci yí wo xo nuxu ɖegbɔ ɔ, Falisitɔ dɔmɛtɔ ɖeka ciwo yí va trɔ xɔsetɔ le hɔntɔxu lɔ nu be: «Wo ɖó a so evo nɔ xɔsetɔ amɛ manyi yuɖatɔ lɔwo yí a gbe ɖe egbe nɔ wo be wo ɖo a wa do ese ciwo yí Mawu sɔ́ tó Mɔyizi ji jí» ⁶ Eyí amɛdɔdɔwo kodo ehamɛmɛgan bɔ yí a le enyɔ lɔ kpɔ́ ⁷ Wo dɔn enyɔ lɔ nyuiɖe gbɔxwe yí Piyɛ va xɔ nuxu yí nu nɔ wo be «Nɔvinyɛ wo, mí nya be vayi ɖe, Mawu can ŋ le míwo dɔmɛ be enyɛ le vayi do eŋɛnyui lɔ nɔ́ amɛmanyi yuɖatɔwo nɔ wo a se enyɔ lɔ yí a xɔ eye ji se. ⁸ Eyi Mawu ci yí kpɔnɔ ejimɛnɛ nɔ amɛ na Gbɔngbɔn kɔkɔɛ wo shigbe lehanci yí é ná míwo do nɛnɛ yí sɔ ɖe kunu nɔ wo. ⁹ Mawu de do emɔ to mìwo kodo wowo mɛ go. E klɔ wowo jimɛ ɖo wo xɔɛ jise. ¹⁰ Ecɛ viɛ ɖe nyi yí ná taɖo yí mí dodoɔ Mawu kpɔ yí dodoɔ agban ci yí míwo kodo mìwo tɔgbi de sɛn eŋ yí dro go nɔ nukplanvi lɔwo ɔ? ¹¹ Vɔ ɔ, mì bu be Mawu hwlɛn mí gán to Axwetɔ Yesu xomɛvu nuwawa nɔ mì ji shigbe lehanci yí é hwlɛn wowo can gán dó nɛnɛ.» ¹² Eyi agun lɔ bɔ enu kplii yí ɖo eto jeshidu kodo enudanŋdo ciwo pleŋ yí Mawu wa to Banabasi kodo Pɔlu ji le amɛmanyi Yuɖatɔwo gbɔ ¹³ Ci yí Pɔlu Kodo Banabasi xo nuxu ɖegbɔ ɔ, Ʒaki nu be: «Nɔvinyɛwo mí ɖo eto a se! ¹⁴ Simɛyɔn dre lehanci yí Mawu le ebu nɔ amɛmanyi Yuɖatɔwo do yí can jukɔn ɖeka le wowo domɛ nɔ yiɖeki dó nɔ́ mì viɛ. ¹⁵ Enyɔ lɔwo sɔ egbe kodo Mawu 'ŋɛdotɔwotɔ. Nyɔnɔnuitɔ ɔ, wo ŋwlɛ daɖɛ do Mawu 'nyɔ wemawo mɛ be: ¹⁶ Le i godu ɔ, na trɔgbɔ yí a va trɔcu Davidi 'xwe ci yí gban sasa lɔ na trɔ cu yi 'xwe ci yí cuku lɔ yí a fɔin do ete. ¹⁷ Gahɔnmɛ ɔ, amɛ kpɛtɛwo a tɔ enyɛ Yehowa jiji kpɔ́, akɔta ciwo pleŋ yí ŋ yɔ nɔ́ wo a va trɔ kinyɛwo. Enyɔ ci yí enyɛ, Yehowa nu yi gbe wa nɛ. ¹⁸ Enyɛ ci yi dannɔ asin nyaŋ 'mɔwo nɔ amɛwo so tɛgbɛɛ yi nui. ¹⁹ É yí ná taɖo ɔ enyɛ Ʒaki ŋ xɔ egbe be wo d'a do aya nɔ amɛmanyi Yuɖatɔwo go. ²⁰ Vɔ ɔ, mì a ŋwlɛ wema nɔ́ wo be wo de ɖo a nyi hetelitɔnɔwo . Wo de ɖó a ɖu elan ci wo sɔ́ sa avɔ nɔ vojuwo go. Wo de ɖó a ɖu elan ci 'hun de Kɔdo nyigban go. Nɛnɛke yí wo de ɖó a tɔ enu ehun go nɛ. ²¹ Ɖo amɛwo tɔ axwa dodo yí xoxo nuxu so ese ciwo yí Mawu sɔ tó Mɔyizi ji le juganwo mɛ viɛ ɔ, i tɔxu de sɔ. Nɛnɛke wo gbe hlɛnnɔ wo le Mawusɛnxuwo le Gbɔngbɔngbe ɖekpokpoi nɛ. ²² Susu ci yí wo ɖe lɔ je eŋ nɔ amɛdɔdɔwo, ehamɛmɛganwo kodo amɛwo le Mawu 'ha lɔ mɛ yí sɔ bɔdo Pɔlu kodo Banabasi nu nɔ́ wo a yi Antiwɔshi jugan mɛ keŋ yí a sɔ wema ci yí wo ŋwlɛ lɔ yí na Klisotɔ lɔwo amɛ ciwo yí wo cán lɔwo yí nyí Yuɖa ci yí wo gbe yɔnɔ be Banabasi kodo Silasi. Amɛŋkuvilejiwo yí wo nyi le Mawu 'ha lɔ mɛ. ²³ Wo ŋwlɛ do wema lɔ ci yí wo sɔ doashi nɔ wo mɛ be: «Mìwo, míwo nɔviwo, amɛdɔdɔwo kodo ehamɛmɛganwo do egbe ɖaɖa míwo Klisotɔ amɛmanyi Yuɖatɔwo ciwo yí le Antiwɔshi jugan kodo Silisi 'kanwo mɛ mɛ. ²⁴ Mì se be mìwotɔ ɖekawo vá mí gbɔ yí vá dó vɔnvɔn nɔ mí yí gbe caka susu nɔ mí kodo enyɔ ɖekawo. Vɔ kpɔ́ mì de dɔ edɔ ɖe wo go. ²⁵ É yí ná taɖo mì sɔ egbe ɖo eju yí é je eŋ nɔ mì yí mì can amɛwo bɔdo mìwo nɔvi vevi Banabasi kodo Pɔlu nu yí dɔ wo ɖaɖa mí. ²⁶ Banabasi kodo Pɔlu nyi amɛ ciwo yí sɔ wowo 'gbe ke eku do eta nɔ Axwetɔ Yesu Kliso 'dɔ lɔ. ²⁷ Yuɖa kodo Silasi yí mì dɔ ɖaɖa mí nɔ wo a gbe ɖe enyɔ ciwo mi yí mì ŋwlɛ do wema cɛ mɛ nɔ mí ŋmɛ ŋmɛ. ²⁸ Nyɔnuitɔ ɔ, é je eŋ nɔ Gbɔngbɔn kɔkɔɛ kodo mìwoŋtɔwo cán be mì d'a do agban nɔ mí to akpo nɔ enu ciwo yí le veviɖe go. ²⁹ Mí de ɖo a ɖu elan ciwo yí wo sɔ sa avɔ nɔ vojuwo go. Nɛnɛke mí de ɖo a tɔ enu ehun go nɛ. Kpɔ mí de ɖo a ɖu elan ci yí ehun de kɔ nyigban nɔ go. Nɔ mí wa do ese cɛwo ji ɔ, a nyɔ nɔ mi. É yi sabaa!» ³⁰ Amɛ ciwo yí wo dɔ ɖaɖa edɔ gbe lɔwo so le Ʒeluzalɛmu yí kpekpeɛ Antiwɔshi jugan lɔ mɛ. Ci yí wo vayi ɖo ɔ, wo bɔ Klisotɔ lɔwo pleŋ yí sɔ wema lɔ jo nɔ wo. ³¹ Wo hliin, ci yí wo sii ɔ, eji jɔ wo. Ɖo enyɔ lɔwo dó ŋsɛn lanmɛ nɔ wo. ³² Mawu 'ŋɛdotɔwo yí nyi Yuɖa kodo Silasi hɛnnɛ. Wo kplan enu sugbɔ Klisotɔ lɔwo a sɔ do ŋsɛn lanmɛ nɔ wo yí a gbe sɔ dó ŋsɛn wo le Mawujixɔse mɛ. ³³ Wo nɔ ehɔntɔxu lɔ hwɛɖeka gbɔxwe yí vá so. Klisotɔ lɔwo klan wo be wo a zɔn emɔ le fafa mɛ yí a gbe yi kpɔ amɛ ciwo yí dɔ wo ɖaɖa. ³⁴ [Vɔ ɔ, Silasi yɛ sɔ gbeta be ye a ci wo gbɔ.] ³⁵ Pɔlu kodo Banabasi wowo ci Antiwɔshi jugan mɛ yí wowo kodo amɛ sugbɔwo tɔ enu kplankplan amɛwo yí gbe le Yehowa 'nyɔ nuɔ nɔ wo. ³⁶ Le ŋkeke ɖewo godu ɔ, Pɔlu va nu nɔ Banabasi be: «Nà nɔ mì a gbe trɔyi jugan ciwo pleŋ mɛ mì nu Axwetɔ 'nyɔ to sasa keŋ a kpɔ lehanci yí mìwo nɔvi klisotɔ lɔwo le do.» ³⁷ Banabasi ji be nɔ yewo yigɔ ɔ,Ʒan ci yí wo gbe yɔnɔ be Maki a kplɔ yewo do hɛnnɛ. ³⁸ Vɔ ɔ, Pɔlu kpɔ be yewo de ɖo a wɛɛ nɛnɛha go. Ɖó ɔ, Maki lɔ trɔ gbe wo ɖɛ vayi le Panfili 'kan mɛ yí de gbe yi edɔ lɔ ji kodo wo go. ³⁹ Pɔlu kodo Banabasi do dyika do enyɔ hɔn ji sugbɔ kaka klan yí Banabasi kplɔ maki yí wo ɖo etɔjihungangan yi kpe Shiplo 'tɔdomɛju mɛ. ⁴⁰ Eyi Pɔlu can Silasi be yí le va kplɔ eye yi. Klisotɔ lɔwo sɔ wo do alɔmɛ nɔ Yehowa xomɛvu yí wo ɖedo. ⁴¹ Pɔlu ɖyi esa to Silisi kodo Silisi 'kanwo mɛ yí dodoɔ eji exo nɔ Mawu 'ha lɔwo.