¹ Ci yí Pɔlu kodo Banabasi vayi ɖo Ikoniwɔmu jugan mɛ ɔ, wo yi Yuɖatɔwo Mawusɛnxu hɛnnɛ. wo xo nuxu le ehɔntɔxu kaka Yuɖatɔ cán amɛmanyi Yuɖatɔ cán, amɛ sugbɔtɔ trɔ́ xɔsetɔ. ² Vɔ ɔ, Yuɖatɔ ɖekawo gbe be yewo d'a xɔ enyɔ ci yí Pɔlu kodo Banabasi nu ji se go. Wo vayi trɔ susu nɔ amɛmanyi Yuɖatɔwo be wo le trɔ susu vɔnwo bubu do nɔvi xɔsetɔ lɔwo nú ³ É le nɛnɛ gankegan ɔ, Pɔlu kodo Banabasi nɔ Ikoniwɔmu jugan mɛ nyuiɖe. Wo ɖenɔ kunu so lehanci yí axwetɔ lɔ nyi xɔnamɛtɔ do nú nɔ́ agbetɔwo kodo edɔngbegbe. Axwetɔ lɔ ná ŋsɛn Pɔlu kodo Banabasi yí wo le jeshidu kodo enudanŋdowo ɖeɛ dansin. ɛ́ wee nɛnɛhan yí a sɔɛ dansin be nyɔnɔnui nuɔ wo le. ⁴ Eyi jugan lɔ mɛ tɔwo má do akpa amɛve. akpa ɖeka le Yuɖatɔ lɔwo jí yí evetɔ lɔ le amɛdɔdɔwo jí. ⁵ Amɛmanyi Yuɖatɔwo kodo wowo 'gawo sɔ gbeta be yewo a ɖe efun nɔ Pɔlu kodo Banabasi yí a xoxoɔ ekpe wo kaka wo a kú. ⁶ Vɔ ɔ, ci yí amɛdɔdɔ lɔwo sii ɔ, wo shiyi Likawoni 'kan mɛ yí vayi Lisitɔ kodo dɛbe juganwo mɛ kodo kɔxwi ciwo yí trɔdo wo mɛ ⁷ yí vayi tɔ eŋɛnyui lɔ dodo ehɔntɔxu. ⁸ Ŋsusuxokplɛ ɖeka le Lisitɔ jugan lɔmɛ. ci yí wo jii ɔ, d'é zɔn zɔnlin kpɔ go. ⁹ Gbeɖeka ɔ, é ɖó eto yí se Pɔlu le nuxu xoɔ. Pɔlu yɛ lé ŋkuvi do nu yí kpɔ be yí xɔ Mawu ji se. Xɔse lɔ a hwliin gan drú. ¹⁰ Eyi Pɔlu do axwa yí nú be: «Shi ete a nɔ ete do ao fɔwo jí!» Ŋsu lɔ té le yi 'fɔwo jí yí tɔ́ zɔnlin zɔnzɔn. ¹¹ Ci yí ahwakɔn lɔ kpɔ enu ci yí Pɔlu wa ɔ, wo do axwa yi nu le Likaoni 'kan lɔ gbe mɛ be: «Vojuwo sɔ́ agbetɔ nɔ nomɛ yí ɖyiva mí gbɔ́!» ¹² Eyi wo sɔ voju ci yí wo yɔnɔ be Zesu nyikɔ ná Banasi yí sɔ ci yí tɔ nɔ be Mɛmɛsi nyikɔ ná Pɔlu. Ɖó, é yí xonɔ nuxu dó enu nɔ wo. ¹³ Zesu 'xɔ le ŋkɔnɔ eju lɔ 'gbonu. Amɛ ci yí sanɔ avɔ nii vayi le xwenyi asutɔ ɖekawo vá voju 'xɔ́ lɔ 'hɔn nu. Wo sɔ́ flawawo ɖó acɔ nɔ́ xwenyi lɔwo. Yi kodo ahwakɔn lɔ jijiɛ a sa avɔ nɔ Banabasi kodo Pɔlu. ¹⁴ Vɔ ci yí Mawu 'mɛdɔdɔ, Banabasi kodo Pɔlu sii ɔ, wo drɛn awuwo le ekɔ yí shi eju yí ɖo ahwakɔn lɔ mɛ yí do axwa be: ¹⁵ «Nyaŋ 'xlɔwo, nyi yí nyi enu hɔnwo yí mí wawa ɔ? Agbetɔwo yí mì nyí shigbe míwo han nɛnɛ. Nɔnɔmɛ ɖeka yí bɔ le mì shí. Mì vá yí a vá do Eŋɛnyui lɔ nɔ́ mí be míwo le tashi voju, enumaɖota ɖe hɔnwo keŋ yí a va Mawu Agbeagbe lɔ gbɔ́. É yí wa jiŋkushi kodo nyigban, axu kodo enu ciwo pleŋ yí le wo mɛ. ¹⁶ Le blema mɛ ɔ, Mawu tashi jukɔnwo pleŋ yí wo nɔ agbe shigbe lehanci yí é dro wo do nɛnɛ. ¹⁷ Vɔ ɔ, Mawu wanɔ enyui hweshahwenu. Enyuiwawa lɔ dannɔ asin be yi li. É nanɔ yí eshi janɔ so jiŋkushimɛ nɔ mí do gamɛ ji yí míwo bomɛ nukuwo nyɔno. É nanɔ enuɖuɖu kodo nyɔna sugbɔwo mí.» ¹⁸ D'é fa gbɔxwe yí Pɔlu kodo Banabasi va nu enyɔ cɛwo nɔ yí sɔ́ xé emɔ nɔ́ amɛ lɔwo be wo ŋgbe sa avɔ nɔ yewo go. ¹⁹ Yuɖatɔ ɖekawo so Antiwɔshi le Pisidi 'kan mɛ yí ɖekawo cán so Ikoniwɔmu'kan mɛ va ehɔntɔxu lɔ. Wo ná yí ahwakɔn lɔ xɔ egbe do wowo 'nyɔ ji yí xo ekpe Pɔlu kaka dɔin toi le eju lɔ mɛ. Ɖó ɔ, wo bubuɔ be yi kú. ²⁰ Vɔ ci yí nukplanviwo va trɔdoi ɔ, é fɔn yí gbe trɔva eju lɔ mɛ yí i ŋkegbu ɔ, yi kodo Banabasi soyi Dɛbe jugan mɛ. ²¹ Ci yí Pɔlu kodo Banabasi va ɖó Dɛbe jugan lɔ mɛ ɔ, wo do eŋɛnyui lɔ nɔ́ amɛwo yí amɛ sugbɔtɔ trɔ́ nukplanvi. le i godu ɔ, wo trɔyi Lisitɔ jugan kodo Ikoniwɔmu 'kan kodo Antiwɔshi jugan mɛ le Pisidi 'kan mɛ. ²² Wo do ŋsɛn lanmɛ nɔ nukplanvi lɔwo nɔ wo a nɔ xɔse lɔ mɛ yí a do eke le mɛ. Wo nú nɔ́ wo be: «Mì ɖó a to vevisese sugbɔ mɛ gbɔxwe yí a yí Mawu 'fiɔɖuxu lɔ mɛ.» ²³ Wo ɖó ehamɛmɛganwo do enu nɔ Mawu 'hawo ɖeka ɖeka. Ci yí wo blá enu yí dogbeɖaɖa ɖegbɔ ɔ, wo sɔ ehamɛmɛgan lɔwo dó alɔmɛ nɔ axwetɔ, amɛ ci yí wo xɔ se. ²⁴ Le i godu ɔ, wo tó Pisidi 'kan mɛ yí vá Panfili 'kan mɛ. ²⁵ Ci yí wo nú Mawu 'nyɔ le Pɛze jugan mɛ ɖegbɔ ɔ, wo yí Ataliya jugan mɛ. ²⁶ Ci yí wo só le ehɔntɔxu ɔ, wo ɖo etɔjihungangan yí trɔva Antiwɔshi, jugan ci mɛ yi wo sɔ́ wo do alɔmɛ nɔ Mawu xomɛvu, le edɔ ci yí wo ɖeɖeɛ egbɔ viɛ wawa. ²⁷ Gacimɛ yí wo vá ɖó Antiwɔshi ɔ, wo bo amɛ ciwo yí le Mawu 'ha lɔ me yí nú enu ciwo yí Mawu wa to wo ji nɔ́ wo. wo gbe nu lehanci yí Mawu hun emɔ yí amɛmanyi Yuɖatɔwo can xɔ Mawu jí se dó nɔ́ wo hɛnnɛ. ²⁸ Pɔlu kodo Banabasi nɔ nukplanvi lɔwo gbɔ́ le Antiwɔshi jijiɖe.