¹ Mawu 'ŋɛdotɔ kodo nukplanmɛtɔ ɖekawo nɔ Mawu 'ha ci yi le Antiwɔshi jugan mɛ mɛ wowo nyikɔ wo nyi Banabasi kodo Simɛyɔn ci yi wo gbe yɔ nɔ be Nizɛ kodo Luisiwusu ci yi so Silɛnu jugan mɛ. Gbe sɔkpenɔ wowo ɔ, wowo ɔ, wo a kpɔ Manayɛn ciyi Kodo Elodi Ancipasi, Galile nutuijikpɔtɔ bɔ nɔ vefinmɛ yi amɛ kpɛtɛkpɛtɛ lɔ yni Sɔlu. ² Ci yi wo le Mawu sɛɛn yi bla enu ɔ, gbɔngbɔn kɔkɔɛ nu be:«Mi sɔ Banabasi kodo sɔlu do akpo nɔ wo a yi wa dɔ ci yi ŋ yɔ wo nɔ. ³ Eyi ci wo bla enu yi do egbe ɖaɖa ɖegbɔ ɔ, wo sɔ alɔ dado wo ji yi vayi ɖo wo. ⁴ Ci yi gbɔngbɔn kɔkɔɛ ɖo Banabasi kodo sɔlu ɖaɖa edɔ gbe ahan ɔ, wo yi Selesi jugan mɛ yi ɖo etɔjihungangan ɖeka yi yi shiplo 'tɔdomɛju mɛ. ⁵ Ci yi wo va ɖo Salaminu jugan mɛ ɔ, wo tɔ Mawu 'nyɔ nunu le Yuɖatɔwo Mawusɛnxuxo. Zan kplɔ wo do yi dodo ɔ alɔ wo. ⁶ Wo tó etɔdoɛju lɔ mɛ yi yigɔ tiin kaka vayi kɔdo Pafɔsi jugan mɛ fini ci yi wo vayi do ego Yuɖatɔ mazikitɔ ɖeka le. Wo yɔɛni be Ba-Yesu yi é wanɔ enu shigbe yɛ nyi Mawu 'ŋɛdotɔ nɛnɛ. ⁷ É nɔ Sɛziwusu Polusu Shiplo 'tɔdomɛju lɔ jikpɔtɔ gbɔ. Sɛziwusu Polusu lɔ nyi amɛɖeka ci yi nya ŋunu ɖɛ sugbɔ. É dɔ yi wo yɔ Banabasi kodo Sɔlu nii. Ɖo é ji be ye a se Mawu 'nyɔ. ⁸ Vɔ ɔ, Mazikitɔ hɔn lɔ ci yi wo yɔ nɔ be Elimasi le Glɛkigbe mɛ gbe be wo d'a va ejujikpɔtɔ lɔ gbɔ go. Ɖó d'é ji be yi a se Mawu 'nyɔ yi a va trɔ xɔsetɔ go. ⁹ Eyi Sɔlu ci yi wo gbe yɔ nɔ be Pɔlu, amɛ ci yi gbɔngbɔn kɔkɔɛ ɖɔ gloikpɔ ju un. ¹⁰ Yi nu be:«Eo ayemɛnuwatɔ kodo enyɔnu doakpotɔ hɔn. Legba eviɛ gbali. Enujɔjɔɛ wawa ketɔ. Kaka va sɛn gahinmɛ yi a mi Axwetɔ 'drowo, enu jɔjɔɛ lɔ wo gblegble ɔ ? ¹¹ Kpɔ' ɖa. Axwetɔ a dɔn eto nɔ eo yi ŋkuvi a tɔn nɔ eo yi d'à,gbe kpɔ ewe viaka a sɔna ega ɖe mɛ go.» Eyi zeɖeka vɔ, Elimasi mi enu kpɔkpɔ. É ci vinvin mɛ yi dodo ɔ alɔ ɖaɖa kpɔ be a kpɔ amɛ ci yi a kplɔɛ mɛ. ¹² Ci yi ejujikpɔtɔ lɔ kpɔ enu ci yi jɔ ɔ, é trɔ xɔsetɔ. Ɖö nukplanmunyɔ ci yi wo nu nii so Axwetɔ nu ji eŋ nii. ¹³ Pɔlu kodo amɛ ciwo yi kplɔɛ do ɖo etɔjihungangan lɔ mɛ le Pafasi jugan mɛ yi yi Pɛze jugan mɛ le Panfili 'kan mɛ. Vɔ ɔ, zan yɛ klan wo yi gbɔva Zeluzalɛmu. ¹⁴ Wo va so le Pɛze jugan mɛ yi yi Antiwɔshi jugan mɛ le Pisidi 'kan mɛ. Le gbɔngbɔngbe ɔ, wo vayi nɔ anyinɔnɔ do Mawusɛnxu. ¹⁵ Ci yi wo hlɛ enu le ese ci wo yi Mawu só na to Moyizi ji wemawo kodo Maw 'ŋɛdotɔwo wemawo mɛ ɖegbɔ ɔ, Mawu sɛnxu lɔ 'gawo dɔ yi wo nu nɔ Pɔlu kodo Banabasi be:«Nɔvinyɛwo nɔ ŋsɛndoamɛnyɔ ɖe le mi shi ɔ, mi nui nɔ jukɔn lɔ fɛe.» ¹⁶ Eyi Pɔlu shi ete yi ɖe alɔ yi sɔ do agoo nɔ wo yi nu nɔ wo be:«Mi wo Izrayɛlitɔwo kodo amɛ ciwo yi vɔnnɔ nɔ Mawu, mi ɖo eto yi a se enyɔ ci yi na nu. ¹⁷ Mi wo jukɔn Izrayɛli Mawu can mi wo tɔgbiwo. É na yi jukɔn nɔn ji do ji gacimɛ yi é le mɛdru nyigban ji le Eziputu. Le i godu ɔ, é va kplɔɛ toi le eju lɔ mɛ kodo ŋɛɛn. ¹⁸ É hɛn Izrayɛli jukɔn lɔ sɔ na exwe eka han le zogbe lɔ mɛ. ¹⁹ Yi gu akɔta amadrɛ le kanaan kan mɛ yi sɔ wowo nyigban wo jo nii be wowo a trɔ yi tɔ. ²⁰ Enu jɔjɔ cɛ wo xɔ shigbe exwe sanydinɛ eta atɔn (450) han nɛnɛ. Le i godu ɔ, é ɖo ejunyɔxotowo dó enu nɔ mi wo tɔgbi lɔ wo kaka va sɔ kɔ do Mawu 'ŋɛdotɔ Samiyɛli gamɛ. ²¹ Mi wo tɔgbi lɔ wo va biɔ Mawu be yi le ɖo efiɔ do enu do enu nɔ ye wo yi Mawu sɔ Sawulu ci nyi Kishu eviɛ yi so Bɛnjamɛ 'kota mɛ ɖo enu nɔ wo. Sawulu kplɔ sɔ na exwe eka. ²² Ci yi Mawu gbé Sawulu ɔ, é va na yi wo sɔ Davidi oɖ efiɔ. É ɖe kunu so Davidi lɔ nu be" Ŋ kpɔ Davidi, Zese eviɛ. Yi nu kpenɔ ŋ. A wa enu ciwo pleŋ yi na dró. ²³ Davidi hɔn jijimɛvi ɖeka yi yni Yesu. Mawu sɔ ɖo xɔnamɛtɔ na Izrayɛli jukɔn lɔ a sɔ wa do egbe ci yi é ɖo ji. ²⁴ Gbɔxwe yi xɔnamɛtɔ lɔ a va ɔ, Mawu dɔ Zan ɖaɖa yi é va do axwa yi nu Mawu 'nyɔ nɔ Izrayɛli jukɔn lɔ pleŋ be yi lé le Mawushi a sɔ dansin ŋe jijiɛ a trɔ yeɖeki a ji. ²⁵ Ci yi zan jijiɛ a ɖe egbɔ yi 'dɔ ɔ, é nunuɔ be:«Mi yi mi bu nɔ be nyɛ ŋ nyi ɔ ? ŋ ɖe nyi ame ci yi mi nɔnɔɔ ete kpɔ go. Vɔ ɔ, amɛ lɔ le ŋgbe nɔ n yi gbɔgbɔ. Ŋ de je a ɖe fɔkpa le afɔwo nii kpetii go" ²⁶ Nɔnvinyewo, Ablahamu jijimɛviwo kodo aamɛ ciwo yi vɔnnɔ nɔ Mawu : mi wo yi Mawu dó hwlɛngan cɛ 'ŋɛ ɖaɖa. ²⁷ Ɖo ɔ, Zeluzalɛmu jugan mɛlɔwo kodo wowo 'gawo de do jeshi amɛ ci yi nyi Yesu go. Nɛnɛke wo do mɔnje Mawu 'ŋɛdotɔwo 'nyɔ ciwo yi wo hlɛnnɔ nɔ wo gbɔngbɔngbewo mɛ go nɛ. Gankegan wo wa do enyɔ ci yi wo nu ji yi yi ɖo kojo kodo Yesu. ²⁸ Ci yi wo de kpɔ enyɔ ɖe yi a sɔ so ekuhwɛ nii go can ɔ, wo biɔ so Pilati gbɔ be wo le wui. ²⁹ Gacimɛ yi wo enu lɔwo pleŋ yi enyɔ ciwo pleŋ wo ŋwlɛ so Yesu lɔ nu do Mawu 'nyɔ wemawo mɛ va jɔ ɖegbɔ ɔ, wo ɖe Yesu so acisoga nu ti sɔɛ yi ɖyi. ³⁰ Vɔ ɔ, Mawu fɔin le amɛ kukuwo domɛ. ³¹ É ɖe yiɖeki dansin le ŋkeke sugbɔ nɔ amɛ ci wo yi zɔn kodoi so Galile va Zeluzalɛmu. Amɛ hɔnwo yi va nyi yi kunuɖetɔwo ɖɛ viɛ le Israyɛli jukɔn lɔ mɛ nɛ. ³² Eyi mi wo viɛ ɔ, mi dodoɔ eŋɛnyui hɔn nɔ mi. Eŋɛnyui ci yi 'gbe Mawu ɖo nɔ miwo tɔgbiwo ɔ, ³³ é wa do ji nɔ miwo ciwo yi nyi wo jiji mɛviwo. Ɖo ɔ, é fɔn Yesu so amɛkukuwo domɛ shigbe lehanci yi wo ŋwlii ɖɛ dó. Acanha jijiwo wema eta ameve mɛ nɛnɛ so Yesu nu be:"É nyi evinyɛ, ŋ ji eo egbɛ." ³⁴ Mawu fɔin le amɛkukuwo domɛ yi yi 'cɔ de nyinyɔ do yɔdumɛ go. Lehanci yi Mawu va fɔin so ekuwodi do hɔn tɔxu nu yi Mawu lɔ xo nuxu só sasa bé:"Na na shicu kɔkɔɛ kodo shicu ci yi je nɔ xɔse ciwu 'gbe yi ŋ ɖo nɔ Davidi mi." ³⁵ É yi na taɖo yi é gbe nu le enu hlɛnhlɛn bu mɛ be:"D'à tashi ao 'mɛkɔkɔɛ a nyinyɔ do yɔdumɛ go." ³⁶ Le yi 'gbe ŋkekewo mɛ ɔ, Davidi wa Mawu 'dɔ. É wa enu ci yi Mawu 'dró. Ci yi é ku ɔ, wo ɖyii do yi xomu mɛ. Yi 'cɔ nyinyɔ le yɔdumɛ. ³⁷ Vɔ amɛ ci Mawu fɔn do agbe lɔ yɛ ɔ, yi 'cɔ yɛ de nyinyɔ le yɔdumɛ mɛ go. ³⁸ Nɔvi nyɛwo, mi ɖo a nya nyuiɖe be Yesu ji yi mi to yi xoxoɔ nuxu so enuvɔn wo sɔsɔke nu nɔ mi. ³⁹ Ese ciwo yi Mawu sɔ to Mɔyizi ji de sɛn eŋ na yi mi nyi amɛ jɔjɔɛ wo le Mawu ŋmɛ go. Vɔ nɔ amɛɖe xɔ Yesu ji se ɔ, Mawu a sɔ wa amɛjɔjɔɛ le yiɖeki ŋmɛ. ⁴⁰ Eyi na taɖo ɔ, mi kpɔ nyuiɖe le nɔ enyɔ ciwo yi Mawu 'ŋɛdotɔwo nu daɖɛ ŋgbe va jɔ do mi ji go. Wo nu daɖɛ be. ⁴¹ "Mi kpɔ ɖa, wo gbali mi sugbɔ, lé ji eŋ nɔ mi nɔ mi a bu le ŋmɛ nɔ ŋ! Ɖo le miwo hwenu cɛ ɔ , na wa enujiŋ ɖeka, Nɔ amɛɖe gbe nui nɔ mi can ɔ, mi d'a xɔɛ ji se go !"» ⁴² Gacimɛ yi Pɔlu kodo Banabasi totoɔ le Mawusɛnxu lɔ ɔ, amɛ lɔwo biɔbiɔ so wo gbɔ be wo le trɔgbɔ gbɔngbɔngbe ci yi gbɔgbɔ keŋ yi a trɔdo enyɔ lɔwo ji nɔ yewo. ⁴³ Ci yi bɔbɔ lɔ kankan ɔ, Yuɖatɔwo kodo amɛ ciwo yi va ɖo Yuɖatɔwo sɛnsɛn mɛ kplɔ Pɔlu kodo Banabasi do. Eyi wo xo nuxu nɔ wo nɔ wo a xɔ egbe do wowo 'nyɔ ji. Yi a kpé ŋkuvi dó xomɛvu Mawutɔ lɔ nu. ⁴⁴ Le gbɔngbɔngbe ci yi kplɔ hɔn dó ɔ, é kpɔtɔ hwɛɖeka yi a nyi jugan lɔ pleŋ yi va bɔdo hɔntɔxu lɔ yi a se Mawu 'nyɔ. ⁴⁵ Ci yi Yuɖatɔwo kpɔ ahwakɔn lɔ ɔ, wo tɔ eŋ hwanhwan Pɔlu yi zuzuiʒ yi gbe fɔnfɔn do enyɔ ciwo yi é nunu ɔ nu. ⁴⁶ Eyi Pɔlu kodo Banabasi va nu nɔ wo kodo edɔngbegbe be:«Mi wo Yuɖatɔwo yi mi ɖo a nu Mawu 'nyɔ nɔ doŋkɔ. Vɔ ci mi wo gbe Mawu nyɔ lɔ yi kpɔ be ye wo de je nɔ agbemavɔ lɔ go ɔ, mi wo a trɔ kpe amɛ manyi Yuɖatɔwo gbɔ. ⁴⁷ Ɖo egbe ci yi Mawu lɔ ɖe nɔ mi ge:" ŋ sɔ eo klɛnklɛn nɔ akɔtawo nɔ na to xexe blebu lɔ mɛ yi a yi nu hwlɛngan 'nyɔ nɔ wo!» ⁴⁸ Ci yi amɛ manyi Yuɖatɔwo se enyɔ cɛ ɔ, eji jɔ wo yi tɔ enyɔ lɔ ci yi Mau nu kafu kafu. ⁴⁹ Eyi amɛ ciwo yi Mawu doŋkɔ yi can daɖɛ nɔ agbemavɔ trɔ xɔsetɔwo. E yi vii vii vii vɔ, Mawu 'nyɔ lɔ kankan do ekan lɔ plen mɛ. ⁵⁰ Vɔ ɔ , Yuɖatɔwo vayi kpɔ nyɔnu kpɛnkpɛn ciwo yi sɛnnɔ Mawu kodo jugan lɔ mɛ mɛganwo yi wo dɔ yi amɛwo ci yumɛ nɔ Pɔlu kodo Banabasi yi nya wo le wowo 'kan lɔ mɛ. ⁵¹ Eyi Pɔlu kodo Banabasi xuxu wowo 'fɔkɔwo do hɔntɔxu yi só le o gbɔ yi yi Ikoniwɔmu jugan mɛ. ⁵² Vɔ nukplanvi wowo ɔ, Mawu na yi jijɔ kodo Gbɔngbɔn kɔkɔɛ ɖɔ wo.