¹ Amɛ dɔdɔwo kodo klisotɔ ciwo yi le ʒude 'kan mɛ se be amɛmanyi yuɖatɔwo can xɔ Mawu 'nyɔ jise ² Ci yí Piyɛ va gbɔva ʒeluzalɛmu ɔ, yuɖatɔ ciwo yi 'nyi klisotɔwo tɔ enyɔ dɔndɔn kodoibe : ³ « È yi tɔtɔnɔwo gbɔ́ ́yi ɖu enu kodo wo!» ⁴ Eyi Piyɛ teje enu ciwo yí vá jɔ xloŋ ji yi tó nɔ wo be: ⁵ « Ahan yí ŋ le ʒafa yi le gbedoaɖa wagɔ yi kpɔ́ edɔ gangan ɖeka ci yí wo le zogoi amɛnɛ nɔ yi é dyi so jiŋkushi gbɔgbɔ kaka va je ŋ gbɔ ŋtegantɔ nɛ ⁶ ŋ gloi mɛ kpɔ nyuiɖee yí kpɔ́ elan aƒɔ amɛnenɔ ciwo yí le nyigban ji, egbemɛ 'lanwo kodo xevi zozoiwo le mɛ. ⁷ ŋ se egbe ɖeka ɖyi yi nunuɔ nɔ ŋ be : "Piyɛ, so je ete yi a wu enu hɔnwo ɖu!" ⁸ Vɔ ɔ, ŋ ɖoŋci be : "Gbeɖe! Axwetɔ enu xoɖyixodyi alo enu ci yí nyi ekɔ nɔ ŋ de do ' agblanmɛ nɔ ŋ kpɔ o" ⁹ Eyi egbe lɔ gbe trɔ dyi so jíŋkushi ke be "ŋgbè yɔ enu ci yi Mzwu nú be yi kɔ be enumakomakɔ o". ¹⁰ Kaka egbe lɔ a dyi zetɔntɔ lɔ ɖegbɔ ahan vɔ, wo gbe trɔ enu lɔ opleŋ yi jinkushi. ¹¹ Zeɖeka vɔ, wo dɔ ŋsu amɛtɔn dekawo só seʒale jugan mɛ yi wo gbɔgbɔ ŋ gbɔ le axwe ci mɛ yi ŋ ze. ¹² Gbɔngbɔn kɔkɔɛ nu nɔ ŋ be enyɛ le kplɔ wo do a yi. Enyɛ ŋgbe dɛn afɔmɛ o. Miwo nɔvi amadɛn ciwo yi ŋ kplɔ va elɛ cɛ, yisezale lɔ kodo ŋ hɛnne. Mi pleŋ lɔ yí yi kɔnɛyi x́wzmɛ. ¹³ Kɔnɛyi lɔ nu lehanci yí Mawu dɔla ɖeka vá yi xweùɛ do nɔ mí. É nu be yi nú nɔ́ eye be : " Dɔ 'amɛwo ɖadzafa nɔ wo vayi kplɔ simɔ ciyi wo yɔ nyikɔ nɔ be Piyɛ vɛ nɔ́ eo ¹⁴ Piyɛ lɔ a vá nu enyɔ ciwo yi a xɔ eo kodo ao xomu lɔ pleŋ dó agbe nɔ eo" ¹⁵ Ci yí ŋ tɔ nuxu xoxo ɔ, gbɔngbɔn kɔkɔɛ dyiva wo ji shigbe lehanci yi é dyiva mí ji dó le gɔnmejeje lɔ mɛ nɛnɛ ¹⁶ Eyi ŋ ɖo eŋui enyɔ ci yi Axwetɔ nú be: "ʒan sɔ eshi yi do eta amɛwo. Vɔ miwo yɛ ɔ, gbɔngbɔn kɔkɔɛ yi wo asɔ dó eshi 'ta nɔ mi" ¹⁷ Mawu na enu wo xomɛvutɔ shigbe lehanci yi é na miwo dó vayi hwecinu yí mi xɔ Axwetɔ, yesu kliso j se nɛnɛ. Mi ŋ nyi yi a sɛ́n eŋ xe emɔ nɔ́ Mawu be yi d'a wa enu ci yí é ɖo o ɔ? » ¹⁸ Gacimɛ yí wo se enyɔ hɔnwo ɔ, adan ci nɔ́ wo yí wo tɔ́ Mawu kanfukanfu be : « Nyɔnɔnui yi é nyi be Mawu ɖe emɔ nɔ́ amɛmɛmanyi yuɖatɔwo hɛnnɛ nɔ́ wo a trɔ wowoɖekiwo aji a xɔ agbe adodui lɔ. » ¹⁹ Ci yí Etiyɛnu ku godu ɔ, wo ci yumɛ nɔ xɔsetɔwo kaka wo gban klɛn. Amɛɖewo shi yí Fenisi' kan mɛ kodo shiplo 'tɔdomɛju mɛ kodo Antiwɔshi jugan mɛ. Yaɖatɔwo ɖekɛ yi wo nunuɔ Mawu nyɔ lɔ nɔ́. ²⁰ Vɔ ɔ, xɔsetɔ ciwo yi le shiplo tɔdomɛju lɔ mɛ kodo ciwo yí le silɛnu jugan mɛ dɔmɛtɔ ɖekawo shiyi antiwshi jugan mɛ. Wowo ɔ, wowo le Axwetɔ yesu 'ŋɛnyui lɔ doɔ nɔ Glɛkigedotɔwo. ²¹ Axwetɔ lɔ ŋsɛn le kodo wo yí amɛ sugbɔ trɔ wowoɖekiwo yí ji xɔ Axwetɔ lɔ ji se. ²² Ʒeluzalɛmu Mawu 'ha mɛ tɔwo se enyɔ cɛ yi dɔ́ Banabasi ɖaɖa Antiwɔshi jugan lɔ mɛ. ²³ Ci yi é va ɖo yí kpɔ lehan ci yí Mawu yra xɔsetɔ lɔwo dóɔ, é jɔ eji nii yi é do ŋsɛŋ lanmɛ egbeji nɔ Axwetɔ lɔ ²⁴ banabasi nyi amɛɖeka ciyí wanɔ enunyui. Gbɔngbɔn kɔkɔɛ ɖoɛ yi é xɔse haan. Ahan yí sɔ' to Banabasi ji , amɛ sugbɔ xɔ Axwetɔ ji se do nɛ. ²⁵ le i godu ɔ, Banabasi yi Tasi yí a vayi kplɔ sɔlu ²⁶ Ci yí évayi kpɔɛ ɔ, é kplɔɛ va Antiwoshi jugan mɛ. Woamɛve lɔwo vá ci Mawu 'há ci yí le hɔntɔxu lɔ mɛ sɔnanɔ exwe ɖeka dlebu yi kplan enu amɛ sugbɔ. Antiwɔshi yí wo yɔ́ nukplanviwo le doŋkɔ be klisotɔ. ²⁷ Le ŋkeke hɔnwo ji ɔ, Mawu ŋɛdotɔ ɖekawo só ʒeluzalɛmu yí vá Antiwoshi ²⁸ Ɖeka le wo mɛ yi wo yɔɛni be Agabusu. Gbɔongbn kɔkɔɛ lɔ ná yi é nu enyɔ dadɛ be shive ɖeka jijiɛ a va tó le xexe lɔ pleŋ mɛ. Nyɔnɔnyuitɔ ɔ, shive lɔ vá tó hwecinu yí klodi le Hlɔ mu fiɔɖuxu lɔ kplɔgɔ. ²⁹ Nukplanviwo vá só gbeta be amɛ ɖeka ɖeka lé ná enu ci ji yí a kpe nɔ yewo a sɔ kpedo yewo nɔvi ciwo yi le ʒude 'kan mɛ nu. ³⁰ Eyi wo jɔ enu lɔwo nyao yi sɔ ná banabasi kodo sɔlu yí wo sɔ́ hɛnsɔyi nɔ ehamɛmɛgan ciwo yí le ʒude 'kan mɛ lɔ.