¹ Ŋsu ɖeka le Sezale jugan mɛ. Wo yɔ nii be Kɔnɛyi. É yi nyi sɔjakavehoviga ci yi kplɔ nɔ sɔjawo 'gbɛ ɖeka ci yi wo yɔ nɔ be:«Itali sɔjawo gbɛ.» ² Ŋsu hɔn kodo yi xomu lɔ pleŋ nɔ nɔ egbe ji nɔ Mawu yi gbe vɔnnɔ nii. É kpenɔ dó jukɔn lɔ nu nyuiɖe yi gbe wanɔ gbedoɖa gashagamɛ. ³ Gbeɖeka fiɛshi, shigbe datɔn han mɛ nɛnɛ ɔ, é kpɔ ŋtegan ɖeka. Mawudɔla ɖeka va yi 'xwe yi yɔɛ be:«Kɔnɛyi!» ⁴ É vɔn yi cu ŋkuvi dó Mawudɔla lɔ ji yi biɔɛ se be:«Axwetɔ, nyi yi jɔ ɔ?» Yi Mawudɔla lɔ nu nii be:«Lé è donɔ egbe ɖaɖa dó kodo lé è kpenɔ dó wamɛnɔwo nu dó je eŋ nɔ Mawu yi d'a ŋlɔbe eo go. ⁵ Ecɛviɛ ɔ, dɔ ŋsu ɖeka ɖaɖa zafa jugan mɛ nɔ wo a yi yɔ amɛɖeka vɛ nɔ ŋ. Amɛ lɔ tɔnɔ be Simɔ. Wo gbe sɔ nyikɔ nii hɛnnɛ be Piyɛ. ⁶ É ze Simɔ, gbazadɔ watɔ ɖeka ci 'xwe yi le axutu gbɔ.» ⁷ Ci Mawudɔla lɔ só ɔ, Kɔnɛyi yɔ yi 'dɔwavi amɛve kodo yi sɔjawo domɛtɔ ɖeka. Sɔja lɔ le gbɔ xoxoxo yi é dɔmɔ edɔ yi. Sɔja lɔ nɔnɔ egbe ji nɔ Mawu. ⁸ Kɔnɛyi to enu ci jɔ pleŋ nɔ wo yi dɔ wo ɖaɖa Zafa jugan mɛ. ⁹ I ŋkegbu ɔ, wo je emɔ ji kaka jijiɛ a ɖó Zafa lɔ. Gahɔnmɛ cucucu ɔ, Piyɛ yɛ la exɔlixɔji lɔ tamɛ yi a do egbe ɖaɖa dó ga wive han mɛ nu. ¹⁰ Shive ci Piyɛ yi é ji be ye a ɖu enu. Gacimɛ yi wo le enu lɔ ɖa a nii ɔ, é kpɔ ŋtegan ɖeka. ¹¹ É kpɔ yi jiŋkushi hun yi enu ɖeka ɖyi so mɛ yi gbɔgbɔ. Enu lɔ le shigbe eɖɔ gangan ɖeka nɛnɛ yi wo le azogoi amɛnɛ lɔ wo ni yi é ɖyiɖyiɛ kaka va je nyigban. ¹² Elan afɔ amɛnɛnɔwo kodo elan ciwo yi sanɔ le nyigban lɔ ji kodo xevi zozoiwo le mɛ hamɛhamɛ. ¹³ Eyi egbe ɖeka ɖyi yi nu nii be :«Piyɛ shi ete yi a wu enu hɔnwo ɖu!» ¹⁴ Vɔ ɔ, Piyɛ ɖoŋci be:«Gbeɖe!, Axwetɔ! ŋ de ɖu enu xoɖyixoɖyi ɖe go alo ci yi nyi ekɔ nɔ ŋ ɖe kpɔ go.» ¹⁵ Egbe lɔ gbe ɖyi yi nu nii be:«Ŋgbè yɔ enu ci Mawu be yikɔ be enu makɔmakɔ go.» ¹⁶ Wo wa enu lɔ ahan zetɔn. Le i godu zeɖeka ɔ, wo gbe trɔ enu lɔ yi jiŋkushimɛ. ¹⁷ Piyɛ caka le mɛ yi biɔbiɔ yiɖeki se be nyi yi enu lɔ yi ye kpɔ le ŋtegan mɛ cucucu mɛ. Gahɔnmɛ téŋ ɔ, amɛ ciwo yi Kɔnɛyi dɔ ɖaɖa biɔ simɔ 'xwe tamɛ se kaka va ɖo agbomɔnu lɔ. ¹⁸ Wo do agoo yi biɔ se be:«Elɛ yi Simɔ ci yi wo sɔ nyikɔ be Piye ze ge a? ¹⁹ Piyɛ gbe kpɔtɔ le tamɛ bu ɔ kpɔ so ŋtegan lɔ nu. Vɔ ɔ, gbɔngbɔn kɔkɔɛ nu nii be:«Kpɔ ɖa ŋsu amɛtɔn ɖekawo le lɛ yi jijiɛ eo kpɔ. ²⁰ Ɖyi yi a kplɔ wo do. Ŋgbè dɛn afɔmɛ go. Enyɛ yi do wo ɖaɖa eo gbɔ.» ²¹ Eyi Piyɛ ɖyi yi va ŋsu lɔwo gbɔ yi nu nɔ wo be:« Enyɛ yi nyi amɛ ci yi mi jijiɛ. Gbali yɔ a ?» ²² Wo ɖoŋci nii be:«sɔja kavehowiga kɔnɛyi yi dɔ mi ɖaɖa eo gbɔ. É nyi amɛ jɔjɔɛ yi gbe vɔnnɔ nɔ Mawu yi Yuɖatɔwo 'kɔta lɔ pleŋ nunu yi ' nyɔ nyui. Mawudɔla kɔkɔɛ ɖeka ɖe egbe nii be yi lé dɔ nɔ wo a yi kplɔ eo vɛ nii. Nɔ eo va va yi va nu enyɔɖe nii ɔ, yi le sii.» ²³ Eyi Piyɛ xɔ wo dó exwemɛ yi wo ci gbɔ kaka eŋ ke. I ŋkegbu ɔ. Piyɛ só yi je emɔ kodo wo, nɔvi Zafatɔ ɖekawo kplɔɛ do. ²⁴ Wo va ɖo Sezale jugan mɛ le ŋkegbu mɛ. Ci yi Kɔnɛyi le etɔ kpɔ wo vava ɔ, é yɔ yi xomuwo kodo yi 'xlɔ veviwo bɔ. ²⁵ Ci yi Piyɛ jijiɛ a ɖo axwe lɔ mɛ ɔ, Kɔnɛyi va do ego yi yi doŋdo nii. ²⁶ Vɔ ɔ, Piyɛ fɔin yi nu nii be:«Shi ete. Ɖo agbetɔ enyɛ can ŋ nyi shigbe eo nɛnɛ. ²⁷ Piyɛ kpɔtɔ xoxoɔ nuxu kodo Kɔnɛyi yi wo ɖó axwe lɔ mɛ. Eyi é kpɔ be amɛwo sugbɔ yi bɔ ɖɛ do exɔ lɔ mɛ. ²⁸ Piyɛ nu wo be:« Mi nya be sɛnsɛn do ekɔ nɔ Yuɖatɔ be yi ŋgbe do eha ko amɛn a Yuɖatɔ go alo a ɖó yi 'xwemɛ go. Vɔ ɔ, Mawu dansin nɔ enyɛ be, enyɛ ŋgbe yɔ amɛɖe be amɛ makɔmakɔ alo amɛ ci wo de ɖo eha kodo go. ²⁹ É yi na taɖo, ci mi dɔ amɛ ɖaɖa ŋ ɔ, ŋ de gbe be ŋ da na. Ecɛviɛ ɔ, na biɔ mi se be gbali yɔ mɛ.» ³⁰ Eyi Kɔnɛyi nu nii be:«Ŋkeke amɛnɛ go gacɛmɛ han, shigbe fiɛshi gatɔn mɛ nɛnɛ ɔ, ŋ le egbe do ɖaɖa le axwemɛ. Zeɖeka vɔ, ŋ va kpɔ ŋsu ɖeka le ŋmɛ nɔ enyɛɖeki yi é le awu dazodazo ɖekawo mɛ. ³¹ É nu nɔ ŋ be:"Kɔnɛyi, Mawu se ao gbedoɖawo yi gbe ɖo eŋui lehanci è kpenɔ do wamenɔ wo nu dó. ³² Enyɛ lé dɔ amɛ ɖaɖa ɖeka ɖaɖa Zafa nɔ wo a yi kplɔ Simɔ ci yi wo sɔ nyikɔ nɔ be Piyɛ vɛ. É le Simɔ gbazadɔwatɔ 'xwemɛ le axutu." ³³ Eyi ŋ gbo dɔ amɛ ɖaɖa eo zeɖeka yi è lɔn yi va. Ecɛviɛ ɔ, mi pleŋ mi bɔ do elɛ le Mawu ŋmɛ yi a se eŋɛ ci yi Mawu dó nɔ eo be eo lé dó nɔ mi.» ³⁴ Eyi Piyɛ xɔ nuxu yi nu be:«Nyao ɔ, ŋ kpɔ be Mawu de cannɔ amɛ mɛ go. ³⁵ Amɛ ci yi vɔnnɔ nɔ Mawu yi gbe wanɔ enujɔjɔɛ 'nu jɔnɔ eji nii. D'é kan jukɔn ci mɛ yi amme lɔ a so go. ³⁶ Mawu sɔ yi 'nyɔ , Eŋɛnyui ci yi na nɔ fafa amɛ ɖaɖa Izrayɛli jukɔn lɔ, fafa hɔn lɔ ɔ, Yesu Kliso ci yi nyi Axwetɔ nɔ agbetɔwo pleŋ ji é to yi va. ³⁷ Miwo ɔ, mi wo nya be ci yi zando axwa yi nu Mawu 'nyɔ nɔ amɛwo yi wa zinzin do tɔmɛ Mawu tɔ nɔ wo ɖegbɔ ɔ, enuwo tɔ jɔjɔ le Galile 'kan mɛ kaka va gban do zude 'kan lɔ pleŋ mɛ. ³⁸ Mawu shi gbɔngbɔn kɔkɔɛ kodo ŋsɛn 'mi nɔ Yesu Nazalɛtitɔ lɔ. Yesu lɔ ɖyi esa yi yi texwe texwewo yi wa enyui nɔ amɛwo yi gbe da edɔ nɔ amɛ ciwo plen yi le Santana Legba 'cɛkpakpa gɔnmɛ. Ɖo Mawu le kodoi. ³⁹ Miwo ɔ, mi kpɔ enu ciwo pleŋ yi é wa le Yuɖatɔwo 'ju mɛ kodo Zeluzalɛmu tɔxu. Wo kiin do acisoga nu yi wui. ⁴⁰ Vɔ ɔ, Mawu fɔin so ekuwodi yi ŋkeke amɛtɔn mɛ yi na yi é dansin yiɖeki nɔ amɛwo. ⁴¹ D'é nyi jukɔn lɔ pleŋ yi kpɔɛ go. Vɔ ɔ, mi wo ciwo yi Mawu can xoxoxo shigbe kunuɖetɔwo nɛnɛ yi kpɔɛ. Ci yi é fɔn so ekuwodi ɔ, mi wo yi ɖu enu yi nu enu kodoi. ⁴² É dɔ mi be miwo le yi do axwa yi a nu Mawu 'nyɔ nɔ jukɔn lɔ yi agbe tɛ egbe do ji nɔ wo be eye yi nyi ame ci yi Mawu can be ye le ɖo kojo nɔ amɛleagbewo kodo amɛkukuwo. ⁴³ Mawu ' ŋɛdotɔwo pleŋ ɖe kunu cɛ so Yesu lɔ nu vayi be amɛ ci yi a xɔɛ ji se ɔ, amɛ lɔ a xɔ enuvɔnwo sɔsɔke to Yesu lɔ ŋtɔ nyikɔ mɛ.» ⁴⁴ Piyɛ de ɖegbɔ enyɔ lɔ gbɔxwe yi gbɔngbɔn kɔkɔɛ ɖyiva amɛ ciwo pleŋ yi le enyɔ lɔ seɛ ji go. ⁴⁵ É kpaca Yuɖatɔ ci wo pleŋ yi nyi xɔsetɔwo yi kplɔ Piyɛ do yi va hɔntɔxu lɔ be Mawu na gbɔngbɔn kɔkɔɛ amɛ manyi Yuɖatɔwo can hɛnnɛ. ⁴⁶ Ɖo ɔ, wo se yi ame lɔwo le egbe, ebuwo do gɔ yi kakafu lehanci yi Mawu gangan dó. Gahɔnmɛ ɔ, Piyɛ nu nɔ wo be: ⁴⁷ «Wo a sɛn eŋ be wo d'a le Mawushi nɔ amɛ ciwo yixɔ gbɔngbɔn kɔkɔɛ shigbe mi wo nɛnɛ ecɛviɛ a ? ⁴⁸ Eyi é dɔ be wo lé wa zinzindotɔmɛ Mawutɔ nɔ wo le Yesu Kliso nyikɔ mɛ. Wo pleŋ lɔ biɔ so gbɔ be yi lé nɔ ye wo gbɔ ŋkeke ɖewo gbɔxwe yi a só.