¹ Kudo kpekpedonu ' dɔ́ ci yí mí a wa ɖaɖa xɔsetɔ ciwo yí le Ʒeluzalɛmu mɛ nu ɔ, d'é ʒián dúu be na ŋwlɛ enu so nu nɔ mí go. ² Nyao ɔ, ŋ jeshi edronyui ci yí mí ɖo, ci yí na yí ŋ vonɔ eŋ fɛɛ do mí nu le Maseduwanu 'kanmɛtɔwo gbɔ́ yí nu be: « Nɔvi ciwo yí le Akayi 'kan mɛ le egbesɔsɔ so exwe ci yí vayi mɛ ɖii yí a wa enunanawo.» Nɛnɛ ɔ, míwo 'dronyuiwo do ezo lanmɛ nɔ amɛ sugbɔtɔ le Maseduwanu 'kan lɔ mɛ. ³ Ŋ ɖoɖoɔ nɔvi hɔn lɔwo ɖaɖa mí gbɔ́. Ŋ de ji be lehanci yí mì vo eŋ fɛɛ do mí nu dó a va nyi gbali gacimɛ yí wo a va ɖó mí gbɔ go. É yí ná taɖo ɔ, mí nɔ egbesɔsɔ nyɔnɔnuitɔ shigbe lehanci yí ŋ nui do nɛnɛ. ⁴ Alo, nɔ́ Masedowanu 'kanmɛtɔwo vá zɔn kodo ŋ yí vá mí gbɔ yí va kpɔ be míwo de le egbesɔsɔmɛ go ɔ, ŋkpɛn á nyi nɔ mì alo ŋkpɛn lɔ á nyi nɔ́ míwo can hɛnnɛ. ⁵ É yí na taɖo yí ŋ kpɔ be yí ʒián be na do ŋsɛn lanmɛ nɔ nɔvi lɔwo nɔ wo a jeŋkɔ nɔ ŋ yí a vá ɖo mí gbɔ. Nɛnɛ ɔ, wo a va kpedo mí nu nɔ mí le edrofaa 'nunana ci 'gbe yí mí ɖo be yewo a wa mɛ. Gahɔnmɛ ɔ, enu nana lɔwo a le egbesɔsɔ shigbe edrofaa ' nunana nɛnɛ yí d'a nyi eguitetewo 'nuwawa ɖe go. ⁶ Le mɛ ɔ, amɛ ci yí do jinuku kankin ɔ, kankin yí é gbe vayi ɖenɔyí amɛ ci yí do sugbɔ haan ɔ, sugbɔ haan lɔ ke yí é gbe vayi ɖenɔ. ⁷ Ci yí é le nɛnɛ ɔ, amɛɖeka amɛɖeka le na enu faa shigbe lehanci yí é drɔɛ do le yi 'ji mɛ nɛnɛ, vevimase, ejiʒinʒinmanɔmɛ. Ɖó ɔ, Mawu lɔnnɔ amɛ ci yí nanɔ enu kodo jijiɔ. ⁸ Ŋsɛn le Mawu shi yí a na yí enunyui hamɛhamɛwo a sun mí shi afenutɔ. Nɛnɛ nɔ́ enu le mí shi gaɖekpokpoi mɛ le nɔnɔmɛwo pleŋ mɛ taɖo ɔ, enu ciwo yí nyi eʒan a gbe sun mí shi gɔɖɔɔ do ji sɔɖɛ nɔ́ zanazn do edɔ 'nyui ɖekpokpoi mɛ. ⁹ É le nɛnɛ shigbe lehanci yí wo ŋwlii daɖɛ nɛnɛ be: « É ma yi 'nunyuiwo, é na enu wamɛnɔwo; yi jɔjɔɛnyinyi li sɔyi tɛgbeɛ.» ¹⁰ Le mɛ ɔ, amɛ ci yí nanɔkunado jinukuwutɔ kodo enuɖuɖu ci yí a ɖu yi a ná jinuku kunado mí. Á na yí a ji do jí yí a na yí míwo jɔjɔɛnyinyi 'kusɛnsɛn a shin. ¹¹ Nɛnɛ ɔ, a na yí mí a je dɔkun sugbɔ haan le enushanumɛ nɔ mí a kpɔtɔ a dandansin enunanamɛfaa jijɔ ci yí le mí shi. Nɛnɛ ɔ, amɛ sugbɔ a le akpe doɔ nɔ Mawu dó enunana lɔwo ciwo yí á hɛnva nɔ́ mí ŋci/ ¹² Ɖó ɔ, d'é nyi be enu maleamɛshiwo 'duwo ɖekɛ enunana a'dɔwawa cɛ vayi cucuɔ nɔ xɔsetɔ lɔwo go. Vɔ ɔ, é gbe na yí amɛ sugbɔ wawa akpedodo gbedoɖa nɔ́ Mawu. ¹³ Ci yí amɛwo kpɔ kpɛnkpɛnmɛ ci yí le edɔ hɔn ci yí mí wawa sghi ɔ, wo kanɔfu Mawu nɔ etonu ci yí mí seseɛ nɔ Kliso lɔ 'ŋɛnyui lɔ yí kankankinn. Wo gbe kanɔfu Mawu hɛnnɛ nɔ́ edrofaa ci yí mí sɔ wanɔ nɔvi kodo wowo kodo amɛ kpɛtɛwo pleŋ. ¹⁴ Nɔvilɔnlɔn ŋtɔ yí wo sɔ́ wanɔ gbedoɖa nɔ́ Mawu dó mìwo 'ta do xomɛvu manumanu ci yí mawu wa nɔ mí gɔɖɔɔ 'ta. ¹⁵ Kafukafu nɔ́ Mawu dó yi 'nunana manyaadre hɔn 'ta.