MENSAH-ajg-x-dogbogbe_2co_text

ETA 8

¹ Nɔvinyɛwo, mì ji be mí a nya be Mawu wa xo mɛvunu nɔ eha ciwo yí le Maseduwanu 'kan mɛ. ² Ci yí eha tɔwo to vevesese sɔgbɔ mɛ can ɔ, eji gbe jɔnɔ wo ɖoɖu. kpoxi téŋ ci mɛ yí wo le kodo wowo jijɔkpɔkpɔ lɔ ná yí enunanamɛjijɔ ɖo wo mɛ. ³ Nyɛŋtɔ ŋ ɖoɖo ekpe i ji dó enu nɔ wo be wo nanɔ enu ci ji wo kpe. Hɛnnɛ can ɔ, wo enu zeto ci ji wo kpe nu kodo eji faa ⁴ wo biɔ so mì gbɔ́ yí tɛ egbe do ji sugbɔ be mìwo lé ɖe emɔ nɔ yewo a nyɔ efu do ɛude 'kan mɛ xɔsetɔwo kpekpe donu 'dó ci yí wo sɔ́ ɖó ete mɛ. ⁵ Wo wɛɛ sɔwu ci nu yí míwo ɖó eŋu do le wo gbɔ. Dó ŋkɔ ɔ, wo sɔ́ wowo ɖekiwo jó nɔ́ Axwetɔ yí evetɔ lɔ ɔ, wo gbe sɔ wowoɖekiwo jó ń mìwo hɛnnɛ sɔ́ to Mawu 'dro mɛ. ⁶ Eyi ná taɖo yí mì do ŋsɛn lanmɛ nɔ Titu be ci yí yi je enunana fa cɛ 'dɔ gɔnmɛ le mí gbɔ ɔ, yi le ji yí a ɖe egbɔ i. ⁷ Ecɛviɛ ci yí je dɔku le enuwo pleŋ mɛ: xɔseɖoɖo, nuxuxoxo, ŋununyanya ezosɔsɔdonunu hamɛhamɛwo sɔkpenɔ lɔnlɔnɖoɖo nɔ́ mì ɔ, a gbe yi ŋkɔ do ji le kpekpedonu 'nunana mɛ hɛnnɛ. ⁸ D'é nyi egbe yí é nyi yí ŋ ɖeɖeɛ nɔ mí go. ŋ xoxoɔ nuxu nɔ́ mí so ezu ci yí amɛ eɖetɔwo sɔnɔ dó enu nú nɔ́ mí ɔ́ míwo can mí dansin lehanci yí míwo lɔnlɔn nɔ mì nyí akuaku dó. ⁹ Ɖó ɔ, mí jeshi xomɛvunu ci yí míwo xwetɔ Yesu Kliso wa nɔ́ mí: etɛ ci yí nyí dɔkunɔ ɔ, é sɔ́ yiɖeki wa adɔnɔ do míwo 'ta keŋ yí a do dɔku axwe nɔ́ míwo to yi 'bɔjeje mɛ. ¹⁰ Lehanci yí ŋ kpɛ dó yí ŋ nunuɔ nɔ mí le kpekpedonu 'nunana 'nyɔ cɛ mɛ be: é do mí ji, míwo ciwo yí nyí amɛ ŋkɔtɔwo xwemɛ ge vayi yí jí be yewo a wa enunana hɔn lɔ yí gbe sɔ gbeta kaka tɔɛ ji. ¹¹ Ecɛviɛ ci yí é le nɛnɛ ɔ, mí do vevi i yí a wɛɛ vɛ. Nɔ lehanci yí mí wa enu lɔ dó a sɔ kodo edonyui cihan yí mí ɖo kodo enu ciwo yí mí zan yí sɔ wɛɛ. ¹² Nyao ɔ nɔ é nyí kpɔ be edronyui li ɔ, d'é ny enu ci yí de le amɛ shi go nu yí Mawu kpɔnɔ yí é jenɔ ji nii go. Vɔ ɔ, yi 'nu kpenɔ nɔ Mawu dó enu ci yí le amɛ shi ŋci. ¹³ Ɖó ɔ, d'é nyi kpɔ be mí a sɔ míwoɖekiwo do vevesese mɛ yí a sɔ́ dó jijɔ nɔ amɛ buwo yɔ́ go. vɔ ɔ mí tekpɔ yi a wɛɛ vevemase nɔ enu ci yí tó le mɛ nɔ wo. ¹⁴ Le nɔnɔmɛ cɛ mɛ viɛ ɔ, énu ciwo su egbɔ le míwo shi a xe ehiantɔxu nɔ́ amɛ ciwo yí le ehian mɛ. Nɛnɛke yí enu ciwo yí su egbɔ le wowo cán shi a xé gbangbantɔxu nɔ́ mí hɛnnɛ nɛ. Nɛnɛ ɔ, mí a nɔ alɔ ɖeka ji yi a le sɔsɔ misɔɛ. ¹⁵ É le nɛnɛ shigbe lehanci yí wo ŋwlii daɖɛ dó mawu 'nyɔ wema ɖeka mɛ do nɛnɛ be: «Amɛ ci yí wa enu sugbɔ ɖɛ ɔ, d'é sa egbɔ nii ɖoɖu bu ɖe go. yí amɛ ci yí wa enu hwɛɖeka ɖɛɔ, d'é va hian enuɖe go». ¹⁶ Kanfukanfu nɔ́ mawu nɔ́ ci é sɔ ezo sɔsɔdonunu hɔn do lanmɛ nɔ́ Titu alo mí nu. ¹⁷ Ɖó ɔ é xɔ mìwo ŋsɛndolanmɛnɔamɛ lɔ kodo ezo sɔwu enuɖe. Yiŋtɔ 'dro faa mɛ yi é je emɔ yí gbɔgbɔ mí gbɔ le. ¹⁸ Titu kodo nɔ vi ci yí Mawu 'hawo pleŋ kanfunɔ nɔ́ edɔ cí yí é wanɔ le eŋɛnyui lɔ nunu mɛ ŋci yí mì dɔdɔ ɖaɖa mí ¹⁹ Sɔwu nɛnɛ ɔ, Mawu 'ha lɔwo sɔ nɔvi hɔn lɔ nɔ́ a zɔnnɔ emɔ kodo mì le kpekpedonu 'dɔ cɛ mɛ. Wo sɔ edɔ hɔn lɔ doashi nɔ mì nɔ a byi kanfukanfu nɔ Axwetɔ ŋtɔ yí gbe ɖeɖeɛ kpaka ci yí sɔsɔ miò dó edɔ lɔ nu dansin. ²⁰ Mì de je be amɛɖe a vá kpɔ afɛn ɖé nɔ́ mì le eho nɔnui jɔjɔ 'dɔ ci yí mɛ go. ²¹ Ɖó ɔ, d'é nyi kpɔ be Mawu ŋmɛ ɖekɛ yí mì jijiɛ veviɖe be mì a wa enu ci yí ny&ɔ le go. Vɔ ɔ, mì gbe jijiɛ be mì a wa enu ci yí nyɔ& lɔ le agbetɔwo ŋmɛ hɛnnɛ. ²² Mì sɔ mìwo nɔvi bu bɔdo amɛ ciwo yí mì dɔdɔ ɖaɖa mí nu. Mì dó yi 'zosɔsɔdonunu kpɔ́ sugbɔ me nɔnɔmɛ sugbɔ mɛ kpɔ yí é gbe da dansin ezo lɔ yi dó kankandoji blebu ci yí é ɖo ɖó mì nu ŋci . ²³ Titu yɛ ɔ, nyaŋ bɔdonutɔ ci yí enyɛ kodo yɛ nyi edɔɖekɛwatɔwo yɔ É le edɔ ji nɔ Kliso le míwo domɛ. Mìwo nɔvi kpɛtɛwo ɔ, wowo nyi Mawu 'ha lɔwo 'mɛdɔdɔwo yí wo le edɔ wa nɔ Kliso kanfukanfu! ²⁴ Ci yí é le nɛnɛ nɔ wo vá ɖo mí gbɔ ɔ, mí dansin lehanci yí mí ɖo lɔnlɔn nɔ mì do nɔ wo. Nɛnɛ ɔ Mawu 'ha lɔwo a kpɔ́ yí a kandoji be d'é nyi gbali yí mì vo eŋ fɛɛ do mì nu go.