¹ Nyaŋ 'xlɔ veviwo, ci yi Mawu 'gbeɖu hɔn hanwo li ɖɛ nɔ mí ɔ, mí na nɔ mí a klɔ enu ciwo yi& xonɔ edyi lankpu kodo gbɔngbɔnso miwo ɖekiwo nu yi a to Mawu vɔnvɔn mɛ keŋ yi nɔ anyinɔnɔ do kɔkɔɛnyinyi mɛ vɛ. ² Mì na texwe mí do mìwo 'jiwo mɛ. Mì de sɔ amɛde ɖu agban o yi mí de tafu amɛɖe do go. ³ Ŋ de nunuɔ ahan yi a sɔ do ehwɛ nɔ mi go. Ɖo ɔ, ŋ nui vayi vɔ be, mí le ejimɛ nɔ mì sɔyi ekugbe agbegbe. ⁴ Ŋ kando mì jí sugbɔ, ŋ vo fɛɛ koŋ do mì nu, ŋsɛndolanmɛnɔamɛ va nɔ ŋ kaka kpɛtɛ cɔin; jijɔ ɖo ŋ mɛ kaka gban ago le miwo vevesese pleŋ mɛ. ⁵ Nyao ɔ, so hwecinu yi mi va ɖo Maseduwanu 'kan lɔ mɛ ɔ, mi de va kpɔ vovo eɖeeɖe go. Vɔ ɔ, wo do aya nɔ mi to alɔkpawo pleŋ ji: ahwawawayiyiɛ eji kodo mi le agogbe yi xome age ɔ, vɔnvɔnwo le mi mɛ. ⁶ Vɔ ɔ, Mawu ci yi donɔ ŋsɛn lanmɛ nɔ amɛ ciwo yi amɛɖekihwehwe le lanmɛ nɔ do ŋsɛn lanmɛ nɔ mi to vava ci yi Titu va mì gbɔ ji. ⁷ D'é nyi kpɔ be yi vava lɔ ɖekɛ yi wa edɔ hɔn le mì mɛ go. Vɔ ɔ, ŋsɛndolanmɛnɔamɛ ci yi e xɔ so mi gbɔ nɔ mi can yi gbe wa nɛnɛ 'dɔ le lanmɛ nɔ mì. E nu lehanci é drodro mi xaxaxa be yewo gbe trɔkpɔ ŋ do, avi ciwo fan yi mi le kodo kpakpa ci yi sɔsɔ mì do nyaŋ 'ta hwlɛnhwlen nu nú. ci yi ŋ se enyɔ hɔnwo ɔ, nyaŋ jijɔ gbe va wu egan do ji. ⁸ Nɔ enyi kpɔ be wema ci yi& ŋ wa ɖaɖa mi vayi na be mi ci ŋshishi mɛ can ɔ, d'é vé nɔ ŋ go. Nɔ enyi kpɔ be é vé nɔ ŋ vayi nɔ ci yi ŋ kpɔ bé wema lɔ na yi mi ci ŋshishi me sɔnanɔ hwenu kleŋ ɖe can ɔ, ⁹ ecɛyɛ ŋ va le jijɔ kpɔɔ. D'é nyi ci mi ci ŋshishi mɛ vayi ŋci yɔ go. Vɔ ɔ, ŋ le jijɔ kpɔɔ be ŋshishi ci mɛ mí nɔ na yi mi trɔ miwodekiwo yi ji teŋ. Ɖó ɔ, mi nɔ ŋshishi mɛ shigbe lehanci yi e dro Mawu do nɛnɛ kaka e le be d'é nyi míwo yi wa enuɖe kodo mi go. ¹⁰ Nyao ɔ, ŋshishimɛ nɔnɔ to Mawu 'dro mɛ hɛnnɔ ameɖeki trɔtrɔaji teŋ ci yi na yi wo kpɔnɔ hwlengan va . Wo de wa nunɔ be ŋ nya sasa nɔ eyɛ go. Vɔ ɔ, ŋshishimɛ nɔnɔ to xexe lɔ 'dro mɛ yɛ hennɔ eku va. ¹¹ Mí kpɔ eku ciwo yi ŋshishima nɔnɔ to Mawu 'dro hɔn lɔ ge sen le mi mɛ ɖa! Ejulɔlɔ do enu nu ge a! Eta hwlenhwlɛn nɔ amɛɖekige a! Enuveamɛ ge a! Vɔnvɔn ɖoɖo nɔ Mawu ge a! Nɔvi lɔnlɔn ge a ! Ŋhwan kpakpa ge a! Etodɔnnɔamɛ do ese ji ge a! Midoasɛ to alɔkpawo pleŋ mɛ be xomɛvunɔwo yi mi nyi le enyɔ hɔn lɔ mɛ. ¹² Ci yi é le ahan nɔ ŋ ŋwlɛ wema hɔn ɖaɖa mi vayi ɔ d'é nyi euwakodoamɛtɔ ŋci alo do gbazavisetɔ ŋci yɔ go. Vɔ ŋ ŋwlii daɖa mì yi a sɔ dansi lehanci yi mi yonɔ eŋ do mi nu sa le Mawu ŋmɛ do nɔ mi. ¹³ E yi na tado yi e do ŋsɛn lanmɛ nɔ mi. Gbe sɔkpenɔ ŋsɛndolanmɛ nɔamɛ hɔn ɔ eji gbe jɔ mi sugbɔ do jijɔmɛ ci yi Titu le yi susu mɛ vo nii do mi nu ŋci. ¹⁴ Nɔ ci yi ŋ kpɔɛ ŋ dansi be ŋ vo fɛɛ do mi nu ɔ, d'é nyi ŋkpɛn 'nyɔ ɖe nɔ ŋ go. Shigbe lehanci yi mi tonɔ nyɔnɔnui nɔ mi tɛgbɛɛ do nɛnɛ ɔ, ahanke yi enu ci yi sɔ mi vo fɛɛ do mi nu hwecinu mi kpɔ Titu can gbe va ze petii shigbe lehanci yi nyɔnɔnui zenɔ do nɛnɛ ¹⁵ Ahan ɔ, nɔ é ɖo eŋui lehanci yi mi pleŋ se etonu le enushanu mɛ do ɔ, xomɛfafa gbe jejeɛ xomɛfafa ji nii do mi nu. Ɖo ɔ, mi xoɛ kodo vɔnvɔn kodo hunhunhun. ¹⁶ Eji jɔjɔ ŋ be na seŋ eŋ ɖe eji do mi nu le enushanu mɛ.