¹ ci yí míwo bɔ nyi edɔ watɔwo kodo Mawu ɔ, mí dodoɔ ŋsɛn lanmɛ nɔ mí mɔ míwo ŋgbe xɔ Mawu xɔ Mawu xomɛvunu lɔ do gbalimɛ go. ² DÓ ɔ, é nú bé:«Dó gamɛ enyui lɔ mɛ ɔ, ŋ tɔ nɔ eo. ci yí hwlɛngan 'ga xo ɔ, ŋ hwlɛn eo gan.» I ke, eviɛtrolo yí nyí hwenu enyui lɔ ke; eviɛtrolo yí nyí hwlɛngan ŋkeke lɔ ke! ³ Mí de sɔ́ enyɔ ɖe dada do atɛ ji nɔ́ a nyi afɔklɛnnu nɔ́ amɛɖe go. Nɔ́ nɛnɛ ɔ, amɛɖe ŋgbe kpɔ enyɔ ɖe yí a nú so míwo 'dɔwawa nu go. ⁴ vɔ le enushanu mɛ ɔ, mì sɔ́ mìwoɖekiwo wanɔ amɛxodowo yí donɔ asɛ mìwoɖekiwo shigbe Mawu 'dɔwatɔwo ɛnɛ: mì donɔ vevi enu sugbɔ le vevesesewo, cakacakawo, kodo le jikasoifunkpekpewo hwenu. ⁵ Mi donɔ vevi enu le amɛxoxowo, egakpamɛwo, hunnyahunnyawo, edɔ sɛnŋsɛnŋwawawo, alɔnmadɔnwo kodo enumaɖuwo hwenu. ⁶ Mì donɔ vevi enu le mɛmiji nɔnɔ, enunyanya, jigbɔnɖɛ, dɔmɛnyɔnyɔ, gbɔngbɔn kɔkɔɛ, lɔnlɔnɖoɖo ayemɛnumanɔmɛ mɛ. ⁷ Mì donɔ vevi enu le nyɔnɔnui nuxuxoxo, Mawu ŋsɛn, jɔjɔɛnyinyi 'hwafɔnfɔn 'hwawawanuwo kodo yi 'hwawawanuwo zanzan mɛ; ⁸ Le amɛkanfukanfu kodo le amɛgbaligbalimɛ, le ehɛndoamɛ kodo nyikɔnyuixɔxɔ mɛ. Amɛwo kpɔnɔ mí dó ŋsukantɔwo jí keŋgan yí mí nyí nyɔnɔnuitotɔwo. ⁹ Wo kpɔ nɔ mí dó amɛmajeshiwo jí gankegan yí amɛshamɛ jeshi mí ɖɛ. Wo kpɔnɔ mí do amɛ ciwo yí le ekudinu jí gankegan yí mí le agbe cekeceke. Wo kpɔnɔ mi do amɛ ciwo yí wo dɔndɔn eto nɔ jí gankegan kpɔ wo de wu mí go. ¹⁰ Wo kpɔnɔ mì dó ŋshishi 'mɛwo jí gankegan yi mi le jijɔ mɛ tɛgbɛɛ. Wo kpɔnɔ mì dó wamɛnɔwo jí gankegan yí mí do dɔku amɛ sugbɔtɔ. Wo kpɔnɔ mí do enuɖe mawaɖɛtɔwo jí gankegan yí enuwo pleŋ sun mí shí. ¹¹ Nɔvi kolɛntitɔwo, mi xo nuxu nɔ mi vofaamɛtɔ. Mí hun miwo xomɛ nɔ mì vɛ gbajaa. ¹² Mí de wa xomɛkucui do mì go. Vɔ ɔ miwoŋtɔwo yí wa xomɛkucui. ¹³ Ecɛyɛ ɔ, ŋ xoxoɔ nuxu nɔ mi shigbe evinyɛwo yí mì nyi ɛnɛ be nɔ mì a sɔ́ ɖó xomɛ ci yi mi hunnɔ nɔ mi ŋci ɔ, miwo can, mí hun xomɛ nɔ mì vɛ gbajaa. ¹⁴ Mí ŋgbe vayi dodoɔ eha kodo maxɔsetɔwo go. Mi d'a sɛn eŋ nɔ eju go. Nyao ɖee akacaca ci yi a sɛn eŋ le jɔjɔɛnyinyi kodo enuvɔn domɛ ɔ? ¹⁵ Dekawawa ci yi le Kliso lɔ kodo Beliya, ci yi nyi Legba domɛ ɔ? Ekacaca ci yi xɔsetɔ a sɛn eŋ ɖó kodo maxɔsetɔ ɔ? ¹⁶ Ekacaca ci yi le gbedoɖatɔxu kodo vojuwo domɛ ɔ? Nyao ɔ, miwo ɖe, miwo yi nyi Mawu agbeagbe lɔ gbedoɖatɔxu shigbe lehanci yi Mawu ŋtɔ núi dó daɖɛ ɛnɛ be:«Na nɔnɔ wowo domɛ yi a zɔnnɔ kodo wo. Na nyi wowo Mawu yi wowo ɔ, wo a nyi anyi jukɔ.» ¹⁷ E yi na taɖo yi Axwetɔ gbe nu ke be:«Mi to so wowo domɛ yi a klan le wo nu. Mi ŋgbe klɛn enumakɔmakɔ ɖe go. Nɔ mi wɛɛ ahan ɔ, enyɛ ɔ, na xɔ mi. ¹⁸ Na nyi Eda nɔ mi yi miwo ɔ, mi a nyi evi ŋsuviwo kodo evi nyɔnuviwo nɔ ŋ. Enyɛ Axwetɔ, ŋsɛnwopleŋtɔ yi nu ahan.»