MENSAH-ajg-x-dogbogbe_2co_text

ETA 10

¹ Enyɛ Pɔlu ɔ, ŋ dodoɔ ŋsɛn lanmɛ nɔ mí to ecufafa kodo xomɛvuwawa Kliso lɔ tɔ mɛ. Mí nunɔ so ŋ nu be nɔ́ enyɛ, ŋ le yewo gbɔ́ ɔ, enyɛ a fanɔ ecu, vɔ nɔ enyɛ ŋ azɔge ɔ, enyɛ ŋ xonɔ nuxu kodo adan ɖaɖa yewo. Enyɛŋtɔ lɔ yí biɔbiɔ mí to domɛnyɔnyɔ kodo xomɛwawa Klisotɔ mɛ be: ² Ŋ ɖe kuku nɔ mí be: mí ŋgbe va ná nɔ́ gacimɛ yí na va le míwo domɛ ɔ, ma va xo nuxu nɔ mí kodo adan go shigbe lehanci yí ŋ bubuiɛ kpɔ be na xoi ɖaɖa amɛ ciwo yí bunɔ be enu ci yí gbaza dɔ mìwo yí mìwo wanɔ gbɔ nɛnɛ. ³ Nyao ɔ, nɔ́ é nyi be nyɔnɔnui yí enu ci yí gbaza dɔ mì yí mì wanɔ can ɔ, mí de wanɔ ahwa yɛ shigbe lehanci yí gbaza lɔ dró dó nɛnɛ go. ⁴ Ɖó ɔ, ahwawanu ciwo yí mì sɔ ́ le ahwa waa de nyi gbazamɛ 'hwawanuwo go . Vɔ ɔ, mìwo 'hwawanu lɔwo só Mawu gbɔ yí ɖó acɛ kaka yí kankannɔ jugan ciwo yí wo cu gbogbo gangan trɔdo. Mí kankannɔ ŋsukankan 'nyɔmɛɖeɖe ⁵ kodo ŋsɛn ɖekpokpoi ci yí shinɔ ete do Mawu jejeshi nu. Mì xɔnɔ susu ɖekpokpoi yí a dɔin hwashi yí a sɔ́ va nɔ a se etonu nɔ́ Kliso lɔ. ⁶ Hwecinu yí míwo 'tonusese nɔ Kliso lɔ a va le blebu ɔ, mí le egbesɔsɔ yí a dɔn eto nɔ́ amɛɖekpokpoi ci yí a wa etosɛnsɛn 'nú ɖé. ⁷ Mí kpɔ lehanci yí enu lɔwo le do ɖá! Nɔ́ é nyi be amɛɖe kando yiɖeki jí be ye nyi Kliso lɔ tɔ ɔ, le gbe sɔ ecɛ yɛ do susu mɛ be: nɔ́ eyɛ nyi Kliso lɔ tɔ ɔ, mìwo can mì nyi Kliso lɔ tɔ hɛnnɛ. ⁸ Nɔ́ é nyi be ŋ gbe va gezegezeɛ sɔwu lehanci yí é je do so acɛ ci yí Axwetɔ ná mì nɔ́ mì a sɔ cu míwo 'há lɔ yí d'é nyi be nɔ́ mì be mì a kankiin go nu cán ɔ, d'á vá wa ŋkpɛn nɔ ŋ buɖe go. ⁹ Vɔ ɔ, ŋ de ji be le ɖyiɖyiɛ shigbe vɔnvɔn ŋ dodoɔ nɔ mí kodo nyaŋ wema ciwo yí ŋ ŋwhlɛnɔ ɖaɖa mí nɛnɛ go. ¹⁰ Ɖó ɔ, amɛɖewo nunɔ be: « Yi wemawo ciwo yí é ŋwlɛnɔ ɖaɖa mì mɛ 'nyɔwo venɔ ete yí gbe sɛnnɔ eŋ. Vɔ nɔ́ yiŋtɔ va mì gbɔ́ ɔ, amɛ kleki ɖeka yí é nyi yí yi nuxu de ɖonɔ eta ɖe go.» ¹¹ Amɛ ci yí nunuɔ nɛnɛ 'nyɔwo le ecɛ do susu mɛ be: enu ci yí mì nyi yí ŋwlɛ mìwo wemawo ɖaɖa mí gacimɛ mì lé azɔge nɔ́ mí ɔ, enu lɔ ke mì a gbe nyi le mìwo 'dɔwawawo mɛ gacimɛ yí mì a vá le míwo domɛ. ¹² Mì d'a gbe edɔn a sɔ́ mìwoɖekiwo a ɖó alo a sɔ́ sɔ kodo amɛ ciwo yí ŋwlɛnɔ kafukafuwema so wowoɖekiwo nú domɛtɔ ɖewo go! Hɛnnɛ can ɔ, ci yí wo sɔnɔ wowoɖekiwo sɔ kpɔ dó wonɔnɔwo nú ɔ, ŋuɖɛnyanya hwedo amɛ hɔnwo. ¹³ Vɔ mìwo ɔ, mìwo de jí be mì a wa amɛ ciwo yí vo eŋ fɛɛ ɖoɖu zeto dredre nu go. Vɔ enudreci ci mìwo zanzan yí nyí bonu ci yí Mawu so nɔ mì yí ná yí mì vá kaka mí gbɔ. ¹⁴ Mì de zenɔto mìwo lixowo nú go. Nɔ́ mì de va mí gbɔ sa go ɔ, á nyi ké mì zeto mìwo lixowo nú. Ɖo ɔ, kaka míwo gbɔ ɖaa yí mì so vá taŋ kodo Kliso lɔ 'ŋɛnyui lɔ. ¹⁵ Mì de vayi gezenɔ ɖé dó edɔ ciwo yí amɛ buwo wa nu go. Vɔ ɔ, emɔkpɔkpɔ le mì shí be nɔ míwo xɔse shin do ji ɔ, mì a gbe nyi mɛgan sɔwu nɛnɛhan le míwo domɛ le mìwoŋtɔ bonu ci yí Mawu so nɔ mì mɛ ¹⁶ yí a donɔ Mawu 'ŋɛnyui lɔ nɔ amɛwo le ekan ciwo yí le ŋkɔ agé nɔ́ míwo 'xwé mɛ. Yɛ a nyɔ nɔ mì sɔwu ci yí mì vá vovoɔ eŋ fɛɛ so edɔ ci yí amɛ buwo wa le wowoŋtɔwo ci yí Mawu kán nɔ́ wo mɛ. ¹⁷ Wo ŋwlɛ da ɖɛ: « Nɔ́ amɛɖe a geze ɔ, lé geze le Mawu mɛ.» ¹⁸ Ɖó ɔ, d'é nyi amɛ ci yí ŋwlɛnɔ kafukafuwema so yiɖeki nú yí kpenɔ nɔ Mawu go. Vɔ ɔ, amɛ ci 'nu yí Mawu ŋwlɛ kafukafuwema só yɔ́!