¹ Epee! mí na emɔ ŋ nɔ́ ma xo ŋununyayna nuxu hwɛɖeka. Ɛɛ, mí xɔɛ nɔ ŋ nɛnɛ! ² Ŋhwan kpakpa ɖeka sɔsɔ ŋ do mí nu, Mawu ŋtɔ ŋhwan yí ŋ hwanhwan. Ɖó ɔ, ŋsu kuɖeka, Kliso lɔ yí ŋ dradraa mí do ɖɛ́ yí a sɔ́ naă yí a sɔ mí cu ete do Kliso lɔ ɔkɔ shigbe nyɔnuvi le alɔji ci yí le mɛmiɖe nɛnɛ. ³ Gankegan lehanci yí edan ble Ɛvu do mɛ nɛnɛ ɔ, ŋ vɔnvɔn be míwo susu a va baɖa yí mí a va te le jijɔfafa kodo mɛmijinɔnɔ Kliso lɔ tɔ nu. ⁴ Nyao ɔ, nɔ́ amɛ ŋkɔtɔ ci yí a vá mí gbɔ gbe va dó axwa yí xo nuxu nɔ mí so Yesu bu ɖé nu to akpo nɔ Yesu ci 'nyɔ yí mìwo va nu nɔ mí nuɔ, mí xɔɛni ji se kaka a? Alo mí xɔnɔ gbɔngbɔn bu tó akpo nɔ ci yí mí xɔ alo mí xɔnɔ Eŋɛnyui yoyu bú ci yí to akpo nɔ ci ji yí mí xɔse hɛnnɛ cán nyuiɖe kaka! ⁵ Keŋgan ɔ, ŋ de bu be ŋ hxe le enuɖe mɛ sɔwu amɛ ciwo yí kpɔkpɔɔ do amɛdɔdɔ gangan hɔnwo ɖé ji gà. ⁶ Nɔ́ le aɖemɛbibi ' kpaxwe ŋ de le eɖe can ɔ, le enuwonyanya 'kpaxwe yɛ ɔ, ŋ de le nɛnɛ go. Mì dansin hɔntɔdxu yɛ nɔ́ mí petii to alɔkpawo pleŋ jí le nɔnɔmɛwo pleŋ mɛ vayi ⁷ Alo, ci yí ŋ bɔbɔ enyɛɖeki nɔ wo a kɔ mí dó eji ɖee, enuvɔn yí ŋ wa a? Gacimɛ yí ŋ do Mawu 'ŋɛnyui lɔ nɔ mí vayi ehoɖemaxɔ ɖee, afɛn yí ŋ wa a? ⁸ Ŋ xɔ enuwo vɛ le eha buwo shi yí xɔxɔɔ efɛncu le wowo shí yí sɔ le edɔ waa nɔ míwo. ⁹ Gacimɛ yí enuwo pleŋ ʒián ŋ le mí gbɔ ɔ, ŋde sɔ enyɛɖeki wa agba nɔ amɛɖe go. Ɖó ɔ, nɔvi ciwo yí só Maseduanu 'kanmɛ hɛn enu ciwo yí ʒián ŋ vɛ nɔ ŋ. Le enuwo pleŋ mɛ ɔ, ŋ le enyɛɖeki be ŋ da nyi agban nɔ mí go yí na kpɔtɔ yí a leleɛ enyɛɖeki. ¹⁰ To Kliso lɔ nyɔnɔnui lɔ yí le ŋ mɛ ji ɔ, amɛɖe a sɛn eŋ gbé nɔ́ ŋ be enyɛ ŋgbegegezeɛ do amɛwo nu le Akayi 'kan 'nutuiwo mɛ go. ¹¹ Nyi yí ná taɖo yí ŋ nu nɛnɛhan ɔ? É nyi kpɔ be lɔn yí ŋ de lɔnnɔn mí taɖo yɔ a? Oo, Mawu nya be ŋ lɔn mí aŋ! ¹² Enu ci yí ŋ wawa ɔ, na kpɔtɔ yí a wɛɛwɛɛ yí nɔ nɛnɛ ɔ, ma sɔ ɖe enyɔ gbali ɖè ci jiɛ yí amɛwo a le a tó ji a be yewo sɔ kodo mìwo le enu ci mɛ yí wo gegezeɛ le lɔ mɛ. ¹³ Amɛ hɔnwo ɔ, ŋsukankan 'mɛdɔdɔwo yí wo nyi. Edɔwatɔ amɛbletɔwo yí wo yí nyi yí sɔ́ wowoɖekiwo wa Kliso lɔ 'mɛdɔdɔwo. ¹⁴ Enuɖe de jí eŋ le hɔn go. Ɖo Legba ŋtɔ cán sɔ́ yiɖeki wanɔ klɛnklɛn Mawu dɔla. ¹⁵ Ci yí é le nɛnɛ ɔ, d'a vá nyi enu kpaca amɛ ɖe be yí 'dɔwaviwo sɔ́ wowoɖekiwo wawa jɔjɔɛnyinyi 'dɔwatɔwo go. Wowo 'gbenu vɔvɔ a vá le shigbe lehanci yí wowo 'dɔwawawo le do nɛnɛ. ¹⁶ Na gbe trɔ a nyui ké be: amɛɖekpokpoi ŋgbe kpɔkpɔɔ be ŋuŋumanyamanya nuxu xoɔ yí ŋ le go. Alo ɖe, mí kpɔ ŋ do amɛ ci yí le lɛlu nuxuwo xoɔ ji nɔ nɛnɛ ɔ, enƴɛ can ma wa amɛ ci yí vo eŋ fɛɛ do yiɖekinú hweɖeka. ¹⁷ Enyɔ cɛ ci yí nunuɔ ɔ, ŋ de nunui shigbe Axwetɔ lɔ yí núi nɔ ŋ nɛnɛ go. Vɔ ɔ, ŋ nunui shigbe amɛ ci yí tagbɔ de sɔ egbe nɔ go nɛnɛ nɔ́ ci yí é nyi be gezegeze 'nyɔ yí é nyi taɖo. ¹⁸ Nɔ́ ci yí amɛ sugbɔ gezenɔ do lehanci yí gbaza lɔ dro do& mɛ ŋci ɔ, enyɛ can ɔ, na geze hɛnnɛ. ¹⁹ Míwo ciwo yí tagbɔ kɔ nɔ koŋ, mí lɔnnɔ fɛɛ yí xɔnɔ amɛ ciwo yí tagbɔ de sɔ egbe nɔ go nyɔwo! ²⁰ Mí lɔnnɔ fɛɛ be wo le sɔ mí wa hwashi, wo le vunvun mí, wo le xo mí ɖu, wo le gbali mí, wo le xo tomɛ nɔ mí. ²¹ Ŋ nunui be ŋkpɛn gangan é nyi. É le shigbe mí ɖe míwo gbɔjɔgbɔjɔ dansin le akpa hɔn 'xwé nɛnɛ.

Gankegan ɔ, a sɔ́ xo nuxu shigbe amɛ ci tagbɔ de sɔ egbe nɔ go nɛnɛ ɔ, na sɛ́n eŋ nu drú be ci yí amɛɖe a glá be eye nyi ɔ, enyɛ cán na gla ́ a nu be enyɛ can ŋ nyi enu lɔ hɛnnɛ.

²² Eblenuwo wo nyi a ? Enyɛ can ŋ nyi Eblenu! Israyɛliviwo yí wo nyi a? Enyɛ can, ŋ nyi Israyɛlivi! Ablahamu jijimɛviwo yí wo nyí a? Enyɛ can ŋ nyi Ablahamu jijimɛvi. ²³ Kliso lɔ 'dɔwatɔ yí wo nyí a? Naxo nuxu shigbe amɛ ci yí tagbɔ de sɔ egbe go nɛnɛ be ŋ gbe nyi Kliso lɔ 'dɔwatɔ sugbɔ sɔwu wo. Le edɔsɛnŋsɛnŋwawawo mɛ ɔ, ŋ gbe nyi sɔwu wo. Le egasɛnsɛn mɛ yɔ a, ŋ gbe nyii sɔwu wo. Le xoxo le lanba nu 'nyɔwo yɔ a? Ŋ gbe nyi Klso lɔ 'dɔwatɔ sɔwu wo. Le eku 'fɔku sugbɔ mɛ toto yɔ a? Ŋgbe nyii sɔwu wo. ²⁴ Zeatɔn yí Yuɖatɔwo dó ebayɛ nɔ ŋ ze ɖeka to le eka mɛ. ²⁵ Zetɔn yí Hlɔmutɔwo xo ŋ le ekpo nu. Zeɖeka yí wo xoxoɔ ekpe ŋ kaka yí a wu ŋ. Zetɔn yí etɔjihun trɔ́n kodo ŋ kpɔ yí ŋ nɔ axu 'shiwo mɛ kaka wa ŋkeke ɖeka kodo ezan ɖeka. ²⁶ Ŋ zɔnnɔ emɔ jiji kodo afɔ zenɛniɖe; ŋ do ego afɔku sugbo le etɔwosasa jí, afɔku le flanfinɔ ganganwo 'nyɔ mɛ, afɔku le nyaŋ 'jumɛtɔwo kodo amɛmanyi Yuɖatɔwo gbɔ́. Ŋ nɔ afukuwo mɛ le jugan mɛ, le zogbewo mɛ, Axuwo ji yí nɔ afɔkuwo mɛ le amɛciwo yí ká n ŋsu be yewo nyi nɔvinyɛwo mɛ. ²⁷ Ŋ nɔ afɔku mɛ le edɔ gbɔnugbɔnu wawa mɛ kodo le xaxawo mɛ; kabakaba ɔ, ŋ nɔnɔ afɔku mɛ le alɔnmadɔn mɛ, le shive kodo shikɔ mɛ; le enublablawo mɛ. ²⁸ Nɔ́ ŋ d'a gbe hlɛn enu kpɛtɛwo go can ɔ, lehanci yí na wɛɛ do nɔ́ eha lɔwo nyinɔ agban nɔ ŋ gbeɖeka dúu. ²⁹ Amɛɖe kle le eha lɔwo mɛ yí d'é nyi enyɛ yí kle go a?Mi yí jeje anyi le mí mɛ yí d'é nyinɔ vevisese nɔ enyɛŋtɔ go ɔ? ³⁰ Nɔ́ é ʒian be wo a geze do enuɖe nú ɔ, nyaŋ klekle nu yí na gezenɔ dó. ³¹ Mawu, Axwetɔ Yesu 'dalɔ, ci tɔ yí nyi kafukafu sɔyi Tɛgbɛɛ, nya be ŋ de kankan ŋsu go. ³² Gacimɛ yí n le Damasi jugan mɛ ɔ, ekanjikpɔtɔ ci yí le edɔ waa nɔ efiɔ Aletasu ɖo agbonuglawo dó jugan lɔ 'gbonu nɔ wo a lé ŋ. ³³ Vɔ ɔ, amɛwo sɔ ŋ do kishi gangan ɖeka mɛ yí dó eka nii keŋ yí nyi ŋ do nyigban to flɛsɛ ɖeka nú nɔ́ gbogbo gangan ci yí cu trɔdo jugan lɔ nú mɛ. Nɛnɛhan yí é gli ŋ do dó nɛ.