¹ Timɔte, ŋgbe gbenɔ enɔ nɔ mɛganxoxuwo kodo adan go. Vɔ ɔ, xónɔ nuxu nɔ́ wo blɛwu shigbe lehanci yí á xo nuxu nɔ edao do nɛnɛ. Nɔ́nɔ kodo ɖajɛviwo shigbe lehanci yí á nɔ kodo nɔviwo dó nɛnɛ. ² Nɔ́no kodo nyɔnuxoxuwo shigbe lehanci yí á nɔ kodo enɔo do nɛnɛ yí a nɔnɔ kodo nyɔnuvi ciwo yí ɖe asu shigbe lehanci yí á nɔ kodo nɔvio nyɔnuviwo dó nɛnɛ.Wá nɛnɛ 'nuwo le kɔkɔɛ nyi,yi mɛ. ³ Lè ebu nɔ kposhi ciwo shi yí amɛɖe de le nyao o. ⁴ Vɔ nɔ́eviwo alo viviwo le kposhi ɖ̀ shí ɔ, wowo yí a doŋkɔ a kplan lehanci yí wo a lé ebu nɔ wowo xomuwo dó sɔ́ to lehanci yí wo anɔ ekacac adodui mɛ kodo Mawu dó mɛ. Nɛnɛ yí wo a wa yí a cú enu ciwo yí wowo xomuwo wa nɔ wo vayi 'fɛn nɔ wo dó nɛ. Enu ci yí jɔnɔ eji nɔ Mawu nɛ. ⁵ kposhi ci yí nyi yiɖekɛ nyao yí amɛɖe de li nii yí a leleɛ ebu nii go ɔ, yɛ ɖoŋdo Mawu nú yi biɔnɔ enu yí wanɔ gbedoɖa nii tɛgbɛɛ ezan kodo kede. ⁶ Vɔ kposhi ci yí agbeɖuɖu jɔnɔ eji nɔ yɛ ɔ, yɛ kú dó ete. ⁷ Enu ci yí à gbe ɖo enui nɔ kposhi lɔwo nɛ nɔ́ wo ŋgbe va kpɔ́ ehwɛ ɖe a ́ do nɔ́ wo go. ⁸ Nɔ amɛɖe de lenɔ ebu nɔ yí 'mɛwo go, vevitɔ nɔ amɛɖe de lenɔ ebu nɔ yí 'xwemɛtɔwo go ɔ, é kan ŋsu be ye xɔ Kliso ji se. É gbe nyi amɛ baɖa sɔwu maxɔsetɔ. ⁹ Timɔte nɔ́ à xɔ nyikɔ nɔ nyɔnu ɖe be yi nyí kposhi le eha lɔ mɛ yí eha lɔ a kpenɔ dó nu ɔ, é gló kaka ɔ, kposhi lɔ a ɖo exwe eka howi. Gbe sɔwu nɛnɛ ɔ, asu kuɖeka yí é ɖo a e kpɔ vayi. ¹⁰ Wo ɖo a ɖenɔ kunu nyui so nu be yi wanɔ enunyui yí hɛnnɔ eviɛwo nyuiɖe yí xɔnɔ mɛdru yí klɔnɔ afɔ nɔ xɔsetɔwo yí dó amɛ ciwo yí le xaxa mɛ nu yí gbe wanɔ edɔ nyuiwo le ago ɖekpokpoi mɛ. ¹¹ Vɔ ɔ, ŋgbè xɔ kposhi ciwo yí de shin go. Ɖo nɔ asuɖeɖe tɔ wo drodro ɔ, wo de gbe kplɔnɔ Kliso do go. ¹² Nɛnɛ ɔ, wo jenɔ ehwɛmɛ. Ɖo ɔ, wo de wa do egbe ŋkɔtɔ ci yí wo ɖe nɔ́ Kliso ji go. ¹³ Gbe sɔwu nɛnɛ ɔ, wo a vá gbé edɔmawa yí a dandan to axwewo mɛ axwewo mɛ wo gbe trɔnɔ ebyɔdɔwatɔwo kodo amɛnyɔnutɔwo. Enyɔ ci yí nyɔ́ be wo a a nú go can ɔ, wo a nuinuiɛ. ¹⁴ É yí ná taɖo ɔ, ŋ ji be kposhi ciwo yí de shin go lé gbe trɔ a ɖe asu yí a ji eviwo yí a lé ebu nɔ wowo 'xwewo. Gahɔnmɛ ɔ, wo a xé emɔ nɔ́ mìwo ketɔwo yí wo d'a kpɔ enyɔ vɔn ɖé a nú so mì nu go. ¹⁵ Can hɛnnɛ cán kposhi ɖekawo trɔkplɔ Legba dó vɔ. ¹⁶ Vɔ nɔ́ nyɔnu Klisotɔ ɖé wa kposhiwo ɖɛ́ le yi xomu mɛ ɔ, e ɖó a kpenɔ dó wo nú. Ŋgbè gbii dó ekɔ nɔ eha lɔ go. Gahɔnmɛ ɔ, eha lɔ a kpɔ́ emɔ a kpe ŋkuvi dó kposhi ciwo yí de wa amɛɖe ɖɛ́ nyao go nu yí a dodoɔ alɔ wo. ¹⁷ Ehamɛmɛgan ciwo waaŋ kplɔkplɔ eha lɔ nyuiɖe ɔ wo ɖó yí ɖó a do bubu wo nu dó zeve ji. Veviɖe ehamɛmɛgan ciwo yí jenɔ agbla sɛnŋsɛnŋɖe yí nunɔ Mawu 'nyɔ yí a gbe kplankplan enyɔ lɔ amɛwo. ¹⁸ Ɖó , wo ŋwlɛ do mawu 'nyɔ wema mɛ be : «D'à blá enu nɔ xwenyi ci yí è zan yí sɔ́ totɔ jinuku go.» wo gbe ŋwlɛ ke be: «Edɔwatɔ ɖó axɔ yí 'fɛncu.» ¹⁹ Timɔte, nɔ́ amɛɖe vá je ehwɛ nɔ eo so ehamɛmɛgan ɖe nú ɔ, bɔ́ enu yí a se enyɔ lɔ le kunuɖetɔ amɛve alo amɛtɔn 'nu mɛ gbɔxwe yí a sɔ enyɔ lɔ. ²⁰ Nɔ́ amɛɖe le enuvɔn waa le eha lɔ mɛ ɔ, nà gbe enyɔ nii le amɛshamɛ ŋmɛ. Gahɔnmɛ ɔ, amɛ kpɛtɛwo a tɔ́ vɔnvɔn nɔ Mawu. ²¹ Enu ci yí ŋ jijiɛ so eo. gbɔ sɛnŋsɛnŋɖe le Mawu kodo Yesu Kliso kodo alɛnkplɔtɔ cancanwo ŋmɛ yí nyí kpɔ́ be eo lé tekpɔ a wa do enyɔ cɛwo jí amɛŋmɛmashi kodo amɛjimanɔ. ²² Ŋgbè lɔnɔ eju yí a sɔ alɔ danɔ do amɛɖe ji yí a ciin nɔ́ edɔ ɖe wawa le eha lɔ mɛ go. Ŋgbè se eɖe le enuvɔn ci tí amɛɖe a wa mɛ go. Hɛ́n eoɖeki kɔkɔɛɖe. ²³ Timɔte, cí yí dɔmɛ wanɔ enu kodo eo yí è lenɔ edɔ kabakaba ɔ ŋgbeè gbe nunuɔ eshi ɖekɛ go. Tɔ́ vɛn hwɛɖeka nunu kpii. ²⁴ Enuvɔn ci yí amɛɖewo wanɔ zenɔ goɖuu nɛnɛ gbɔxwe yí wo a vá tɔ́ kojo ɖoɖo nɔ wo. Vɔ ɔ, azan gboyinɔ gbɔxwe yí amɛɖowotɔ va zenɔ. ²⁵ Nɛnɛke yí edɔ nyí ciwo yí amɛwo wanɔ can gbe zenɔ goɖuu zeɖeka nɛ. Kaka je edɔ nyui ciwo yí de zé yí wo kpɔkpɔ trolo nɛnɛ ji cán go ɔ, wo de nyí enu yí vá cinɔ wlawlamɛ bu ɖe go.