¹ Amɛ ciwo ji yí hwashinyinyí 'gban le ɖo a mɔŋje mɛ be yewo ɖó a do bubu gangan yeso 'xwetɔwo nú. Nɔ amɛwo ŋgbe va kpɔ enyɔvɔn ɖé yí a nunuɔ so Mawu nyikɔ kodo enu ci yí mì kplankplan mí nu go. ² Hwashi ciwo 'xwetɔwo nyi xɔsetɔwo d'e ɖó a gbe bubu maɖo nɔ́ wo nɔ́ ci yí wo nyi nɔvi le xɔse mɛ ŋci go. vɔ nɔ́ a nyɔ́ ɔ, wo ɖó a gbe wawa edɔ nɔ wo nyuiɖe sɔwu. Ɖó amɛ hɔnwo ciwo yí ɖuɖuɔ de ele nɔ wowo 'dɔwawa nyí xɔṣetɔwo yi Mawu lɔn wo. enu ci yí é ɖo a kplan amɛwo yí a dɔ́ mɔ́ wo lé wa do ji nɛ. ³ Nɔ́ amɛɖe gbe va le enu bú ɖewo kplan amɛwo le eha lɔ mɛ yí totoɔ akpa akpa nɔ enyɔ adodui ciwo yí míwo 'xwetɔ Yesu Kliso nɔ kodo enu ci jí yí mì xɔse yí kplankplan mí ɔ, ⁴ egoyitɔ yí nyi amɛ lɔ yí d'é jeshi enuɖekpokpoigo. Fini yí wo a tó yí a dɔndɔn enyɔ kodo amɛwo yí nɛnɛ 'mɛwo jinɔ yí ale evu waa do enyɔciwo ji. Ŋhwanwo, evuwawawo, amɛ zuzuwo hdo enyɔkpa donunɔamɛwo yí nɛnɛ 'nuwo dɔnnɔ va va. ⁵ Eyi wo vá tɔnɔ enyɔwo dɔndɔn kpɔ le wowonɔnɔwo mɛ mamimami. Ɖo ɔ, tagbɔ de gbe sɔ egbe nɔ wo nyuiɖe go yí ɖekpokpoi de gbe le wo mɛ go. Wo bubuɔ be nɔ́ wo xɔ Yesu jí se ɔ, mɔnu e nyi yí woa tó keŋ yí a je dɔku. ⁶ Nyɔnɔnuui yí é nyí be nɔ́ wo xɔ Yesu jí se ɔ, dɔkujeje gangan le mɛ nɔ́ é nyí kpɔ́ be enu ci yí le amɛ shi vɔ jejeɛ eŋ nɔ amɛ. ⁷ Ɖó, mì de hɛn enue hɛnyi go. ⁸ Ci yí é le nɛnɛ han ɔ, nɔ́ nyí kɔ́ be mì wa enu ci yí mí a ɖu kodo enu ci yí mì a dó ɖɛ́ vɔ, hɔnwo ɖó a sun mì. ⁹ Vɔ ɔ, amɛ ciwo yí jijiɛ be yewo a je dɔku jenɔ tetekpɔwo mɛ. Enu baɖawo kodo enuvɔn enuvɔwno tɔwo wo drodro yí wo jenɔ enu lɔwo fecawo mɛ. Le vɔvɔnu ɔ, wo yí gbannɔ ŋgo yí a trɔn. ¹⁰ Ɖó ɔ, eho lɔnlɔn yí nyí eke nɔ evɔnwo pleŋ. Ehokpɔkpɔ bia ŋkuvi nɔ́ nɔ́ amɛɖewo sɔgbɔ yí wole axu nyagɔ nii nɛnɛ han kak yí bú kánŋkpanŋ le xɔse 'mɔ ji. Nɛnɛ ɔ, wo ku gbazavisese sugbɔ do ekɔ nɔ wowoɖekiwo. ¹¹ Nɔ eo ɖe Timɔte, Mawu 'mɛ yi è nyi. Shì nɔ enubaɖa hɔnwo. Tèkpɔ a wawa enujɔjɔɛ yí a nɔekacaca adodui mɛ kodo mawu kpɔ́ tɔ a xɔɛxɔɛ ji se yí kɔnkɔn amɛwo. Dó vevi enu jí a fá enu. ¹² Wa ahwa nyui ci yí xɔse be mìwo le wa nɔ́ ná kpɔ agbewavɔ. mawu yɔ́ eo nɔ́ ná jeshi agbemavɔ lɔ hwecinu. yí e hun enyɔ ci ji yí è xɔse mɛ nyuiɖe le kunuɖetɔ sugbɔ ŋmɛ. ¹³ Ecɛyɛ ɔ, Timɔte, Mawu ci yí nanɔ agbe enushanu kodo Yesu kliso, amɛ ci yí hun enyɔ ci ji yí é xɔse gɔnmɛ nyuiɖe le Ekanjikpɔtɔ, Pilati ŋmɛ nyí anyi kunuɖetɔwo. Wowo ŋmɛ yí ŋ dɔdɔ eo le be ¹⁴ eo lé wawa do anyi 'gbeɖeɖewo jí afɛn alo agin ɖe manɔ nu nɛnɛ kaka a sɔdonɔ hwecinu yí mìwo 'xwetɔ Yesu kliso a ɖe yiɖeki dansin ¹⁵ A ɖe yiɖeki dansin le egaxoxo ci mɛ yí Mawu ɖó mɛ. Mawu ci ɖekɛ yí nyí efiɔ. É yí yayrwo jɔxu; efiɔ ci yí kpa acɛ nɔ efiɔwo yí nyí Axwetɔ ci yí kpa acɛ nɔ axwetɔwo. ¹⁶ Yiɖekɛ yí ɖe kunɔ gbeɖe go. É nɔnɔ anyinɔnɔ do klɛnklɛn gangan ɖeka ci yí amɛɖe da sɛ́n eŋ gogo go mɛ. Amɛɖe de kpɔ́ɛ kpɔ́ go yí amɛɖe d'a sɛn eŋ kpɔ́ɛ hɛnnɛ go. Amɛshamɛ lé dodoɔ bubu yi nu yí ŋsɛn a nyinyi yitɔ sɔyi tɛgbɛɛ. Xoeɖyi! ¹⁷ Timɔte, gbè nɔ́ amɛ ciwo yí wa xexe cɛ mɛ dɔkunuwo ɖɛ́ be wo ŋgbe yínɔ ego go. Gbè nɔ́ wo be wo ŋgbe ɖoɖo eŋ do dɔkunu ciwo yí de ɖó kandojí nu go. Vɔ ɔ, wo le ɖoɖo eŋ do Mawu ci yi nanɔ enushanu mì sunsuinɖe yí mì a ɖu wowo 'gbe nu. ¹⁸ Nú nɔ́ wo be wo le wa enyui. Edɔ nyuiwo wawa le nyí dɔku ci yí wo a je. Wo lé nanɔ enu amɛ kodo eji faa yí a le egbesɔsɔ a manɔ wowo dɔkunuwo kodo amɛ kpɛtɛwo. ¹⁹ Nɔ́ wo wɛwɛ nɛnɛ han ɔ, a nyi wo xoxoɔtɛ dɔkunu adoduiwo ɖɛ́ nɔ wowo ɖekiwo nɔ́ esɔ ci yí gbɔgbɔ keŋ yí a sɛ́n eŋ kpɔ́ agbe adodui lɔ. ²⁰ Timɔte, lé enyɔ ci yi ŋ nu doashi nɔ́ eo sɛnsinɖe. Zé nɔxu ciwo yí de sɔ egbe kodo xɔse 'nyɔ go yí a gbe ze nɔ amɛ ciwo yí kannɔ ŋsu be yewo nyá ŋunu ɖɛ́ yí a le enyɔwo gɔnmɛ kuɔ kpɔ kpoŋ. ²¹ Le nyɔnɔnui mɛ ɔ, amɛɖekawo bubuɔ be yewo nyá ŋunu ɖɛ́ yí é dɔ be wowo klán so xɔse 'mɔ jí. Mawu lé wa xomɛvunu nɔ́ mí.