¹ Enyɔ vevi ɖeka ge: Nɔ amɛɖe jijiɛ be ye a nyi ehakplɔtɔ ɔ, edɔnyui jiɛ yi e le. ² E yi na taɖo ɔ, wo de ɖo a kpɔ ehwɛ ɖe a do ehakplɔtɔ lɔ go. Nyɔnu kuɖeka yí e ɖo a ɖe. D'á nyi sukanuɖutɔ go. E ɖo a wanɔ enu do dredre nu kodo lehanci yí e je do nu. E ɖo a xɔnɔ mɛdru yí a kplannɔ enu amɛ. ³ D'è ɖo a nyi ahanumutɔnɔ alo edanuwatɔ go. Vɔ ɔ e do a fa ecu yí a nyí evuɖatɔ. Eho de ɖo a bianɔ nu nii go. ⁴ E ɖo a hɛnnɔ yí 'xwé nyuɖe yí evi€wo a buini yí a ɖonɔ eto yi. ⁵ Ɖo nɔ amɛɖe de sun yí 'xwé ji yí a kplɔ ɖee, le a wɛɛ do yí alé ebu nɔ Mawu 'ha lɔ ɔ? ⁶ Ehakplɔtɔ de ɖo anyi amɛ ci yí xɔ Mawu ji se yoyu go. Nɔ d'é nyi nɛnɛ go ɔ, a va tɔ egoyiyi Mawu a dɔ eto nii shigbe lehanci yí e dɔin nɔ Legba do nɛnɛ. ⁷ E le be amɛmanyi Klisotɔwo can a ɖenɔ kunu nyuiwo so ehakplɔtɔlɔ nu. Nɛnɛ ɔ d'a va jenkpɛn 'nyɔ ɖe kodo Legba feca ɖewo mɛ go. ⁸ Nɛnɛke yi e le be ehamɛviwo kpedonutɔwo can a nyí amɛ ciwo nú yí wo donɔ bubu yí a gbe nyi nyɔnɔnuitotɔwo nɛ. ⁹ Wo de ɖó a nyí ahanumutɔnɔwo alo ehovɔnjítɔwo go. Wo ɖo a le nyɔnɔnui ci yí Mawu ɖe dansin nɔ agbetɔwo so xɔse nu deashi sɛnsɛnɖe kodo ayexa nyui. ¹⁰ Gbɔxwe nɔ wo a sɔ amɛɖe ɖo ehakplɔtɔwo kpedonutɔ ɔ, wo ɖo a doi kpɔ. Le i godu mɛ nɔ wo de kpɔ́ ehwɛ ɖe yi a do nii go ɔ, amɛ lɔ a sɛn eŋ wa edɔ lɔ drú. ¹¹ Nyɔnu ciwo yí nyí ehamɛviwo kpedonutɔwo can ɖo a nyí amɛ ciwo nu yi wo a ɖonɔ bubu. Wo de ɖo a nyí amɛnyɔnutɔwo go. Wo ɖo a wanɔ enu do dredre nu yi a nyi gbejinɔtɔ le enushanu mɛ. ¹² Nyɔnu kuɖeka yí ehakplɔtɔ kpedonutɔ ɖe a ɖe. E ɖo a kpɔnɔ evi ewo nyuiɖe yí a waɖaŋ hɛnnɔ yí 'xwé. ¹³ Ɖo ɔ, amɛshamɛ a bu ehamɛviwo kpedonutɔ ci yi wadaŋ wawa yi 'dɔ́. Wo a sɛn ɛn xoxoɔ nuxu kodo kankandoji blebu so xɔse ci yí bɔ mì dó eju le Yesu Kliso mɛ nu. ¹⁴ Timɔte, ŋ ŋwlɛŋwlɛ enyɔ cɛwo ɖaɖa eo kodo susu be na va kpɔ eo le majijiɖe mɛ. ¹⁵ Vɔ nɔ ŋ de vá vava kaba go ɔ, wema cɛ mɛ 'nyɔwo a kpekpeɛ do eo nu nɔ na nya lehanci yí a ́ zannɔ eoɖeki do le Mawu xomu lɔ mɛ. Xomu lɔ yi nyí Mawu agbeagbe lɔ'há ci yí yí nyí exɔdomɛci nɔ nyɔnɔnui lɔ yí gbe donɔ alɔ i. ¹⁶ Le nyɔnɔnui mɛ ɔ, nyɔ wlawla ci yi Mawu ɖe dansin nɔ mì yí mì xɔɛ ji se nyi enyɔ kloklu: kliso lɔ sɔ́ egbetɔ jɔjɔmɛ yi vá. Gbɔngbɔn kɔkɔɛ ɖe dansin be amɛjɔjɔɛ yí yi nyi. Mawu 'dɔlawo kpɔɛ. Amɛwo do axwa yi nu yi "nyɔ le jukɔnwo domɛ yi amɛwo xɔɛ ji se le xexe lɔ mɛ. Eyi Mawu kɔɛ yí jeŋkushimɛ yi sɔɛ ɖó bubu ʒinkpin jí.