¹ Nɔvinyɛwo, kpɛtɛkpɛtɛ lɔ ɔ, mí kplan enu mí so lehanci yí Mawu jí be wo lé nɔ agbe do nú. Mì nyà be mí nɔnɔ agbe do nɛnɛ jí nyao. Vɔ ɔ, mì ɖeɖeɛ kuku nɔ́ mí sugbɔ le Axwetɔ Yesu nyikɔ mɛ be míwo le wɛɛ sɔwu nɛnɛ. ² Nyɔnɔnuitɔ ɔ, mí jeshi enu ciwo yí mì xɔ so Axwetɔ Yesu gbɔ yí kplan mí. ³ Enu ci yí Mawu jí yí nyi kpɔ́ be mí a nyi yitɔ blebu yí mí d'à wanɔ heteli 'nuwo go. ⁴ Mí nɔ eju kodo míwo 'shiwo kodo míwo 'suwo ɖeka ɖeka shigbe lehanci yí Mawu dró dó nɛnɛ. ⁵ Mí ŋgbe tashi míwoɖekiwo ɖɛ nɔ́ gbaza lɔ 'drowo a ɖu mí ji le ŋsu kodo nyɔnu 'junɔnɔ mɛ go shigbe lehanci yí é nɔnɔ nɔ́ maxɔsetɔ ciwo yi de jeshi Mawu ɖɛ́ o do nɛnɛ. ⁶ Le nyɔnu kodo ŋsu 'nyɔ cɛwo mɛ ɔ, amɛɖe ŋgbe wa evɔn ɖe kodo nɔviɛ alo a ba nɔviɛ o. Mì nú yí gbe tɛ egbe do jí nɔ mí vayi be míwo 'xwetɔ dɔnnɔ eto nɔ́ amɛ nɔ nɛnɛ 'nuwo. ⁷ Mawu de yɔ́ mì be mìwo lé vá nɔ agbe yakayaka le nyɔnu kodo ŋsu 'junɔnɔn mɛ go. Vɔ ɔ, é yɔ́ mì nɔ́ mì a nyi yitɔ blebu. ⁸ Ci yí é le nɛnɛ ɔ amɛ ci yí gbé enyɔ hɔnwo ɔ, d'é nyi agbetɔwo yí é gbe go. Vɔ ɔ, Mawu ci yí nanɔ yí gbɔngbɔn kɔkɔɛ mí yí é gbe ⁹ Nɔvinyɛwo, enyɔ ɖe de gbe kpɔtɔ yí na ŋwlɛ ɖaɖa mí so nɔvilɔnlɔnnu go. Ɖo ɔ, Mawu kplan nɔvilɔnlɔn hɔn míwoŋtɔwo vɔ. ¹⁰ Ɛɛ lɔnlɔn ' fɔn hɔn yí mí ɖenɔ ɖeka Klisotɔ ciwo pleŋ yí le Maseduwanu 'kan lɔ pleŋ mɛ gbɔ nɛ. Vɔ ɔ, mì gbe dodoɔ ŋsɛn lanmɛ nɔ mí be míwo lé gbe wɛɛ sɔwu nɛnɛ. ¹¹ Mí tekpɔ a nɔ agbe fafɛɛɖe yí a lé ebe nɔ míwo 'nyɔwo ɖeka ɖeka. Amɛɖeka amɛɖeka lé sɔ́ yi 'lɔwo wa edɔ shigbe lehanci yí mì nui nɔ́ mí vayi do nɛnɛ. ¹² Nɔ́ mì wawa nɛnɛ ɔ amɛ ciwo yí de klisotɔwo ɔ, a bunɔ mí yí mí d'a biɔ́ enu amɛɖe gbɔxwe yí a ɖu go. ¹³ Nɔvinyɛwo, mì ji be mí a mɔŋje enu ɖeka mɛ so amɛ ciwo yi kú nú nɔ́ mí ŋgbe ci ŋshishi mɛ shigbe amɛ ciwo yí de kpɔkpɔ emɔ bé agbe gbe le eku godu o nɛnɛ go. ¹⁴ Mí kandoji be Yesu ku yí gbe fɔ́n so amɛkukuwo domɛ. Ci yí é le nɛnɛ ɔ, mì nyá be amɛ ciwo xɔ Yesu ji se gbɔxwe yí kú ɔ, Mawu a fɔ́n wo so amɛkukuwo domɛ nɔ́ wo a nɔ́ Yesu agbɔ. ¹⁵ Enyɔ ci yí Axwetɔ ŋtɔ nú yí mì nunuɔ nɔ mí be mìwo ciwo yí a kpɔtɔ le agbe hwecinu yí Axwetɔ lɔ a trɔgbɔ ɔ, mì d'a doŋkɔ nɔ amɛkukuwo eɖeeɖe go. ¹⁶ Mawudɔla 'gá a ɖe egbe sɛnsinɖe yí Mawu 'kpɛn a ɖyi. Eyi Axwetɔ ŋtɔ a ɖyi so jiŋkushi. Amɛ ciwo yí kú le Kliso mɛ a doŋkɔ a fɔ́n so ekuwodi. ¹⁷ Le i godu mɛ ɔ, mawu a bɔ mìwo ciwo yí kpɔtɔ le agbe kodo wo le jiŋkushizɔwo mɛ. Gahɔnmɛ ɔ, mì a bɔ a vayi do ego Axwetɔ le hahamɛ. Le nɛnɛ ɔ, mì pleŋ mì a vayi ci fini ci yí Axwetɔ le tɛgbɛɛ. ¹⁸ Ci yí é le nɛnɛ ɔ, mí nú enyɔ cɛwo le míwoɖeɖewo mɛ yí a sɔ́ dó ŋsɛn lanmɛ nɔ míwonɔnɔwo.