MENSAH-ajg-x-dogbogbe_1th_text

ETA 5

¹ Nɔvinyɛwo enyɔ ɖe de gbe li yí mì a ŋwlɛ ɖaɖa mí so ŋkɛkɛ kodo hwenu ci ji yí enu honwo a vá jɔ le nu go. ² Ɖo ɔ, míwoŋtɔwo mí nya nyuiɖe be hwecinu yí Axwetɔ lɔ a trɔgbɔ le shigbe lehanci yí flanfinɔ vanɔ amɛ gbɔ le ezanmɛ do nɛnɛ. ³ Hwecinu yí amɛwo a nunuɔ be yewo le fafa mɛ le nɔxuwo, be enuɖe d'a jɔ o ɔ, gahɔnmɛ yí jɔgbevɔin ɖeka a ɖó wo mɛ yí d'à gli amɛɖe dò o nɛ. Á le shigbe lehanci yí dɔmɛ tɔnɔ nyɔnu efunɔ ɖuɖu kpataa do nɛ. ⁴ Nɔvinŷwo, vɔ mìwo ɔ, de le vivicimɛ yí ŋkeke hɔnwo a va cu mí le avɔmɛ shigbe le flanfinɔ vanɔ amɛ gbɔ do nɛnɛ o. ⁵ Ɖó ɔ, klɛnklɛn kodo kedemɛ 'viwo yí mí pleŋ nyi yi d'é nyi vivici kodo ezanmɛ 'viwo mí nyi go. ⁶ Ci yí é le nɛnɛ ɔ, mì de ɖó a dɔ́n alɔn shigbe amɛ kpɛtɛwo nɛnɛ go. Vɔ ɔ, mì a nɔ zanŋte yí a mi sukanujiji. ⁷ Ezanmɛ yí wo dɔnnɔ alɔn. Ezanmɛ lɔ ké yí wo nunɔ aha yí munɔ. ⁸ Mìwo viɛ, ci mì nyi kedemɛ 'viwo ŋci ɔ, mì de ɖó a jí sukanu o. Mì a kpɔtɔ a xɔnɔ Mawu ji se yí a lɔnnɔ amɛ. Ɖó ɔ, é le shigbe mìsɔ akɔncɔnnuga do nɛnɛ. Kliso á vá hwlɛn mì gán. Ɖó ɔ, emɔkpɔpɔ hɔnwo nyi ahwakuku nɛnɛ. ⁹ Mawu de yɔ́ mì yí a sɔ́ yi dɔmɛzi trɔn mì o. Vɔ ɔ, é yɔ mì keŋ yí a hwlɛn mì gan sɔ tó axwetɔ Yesu Kliso ji. ¹⁰ Yesu Kliso hɔn kú dó mìwo 'ta. Gahɔnmɛ nɔ́ mì le agbe can alo nɔ́ mì kú cán, mì a nɔ eju kodoi. ¹¹ Ci é le nɛnɛ ɔ, mí do eji exo nɔ míwonɔnɔwo yí a dó alɔ míwonɔnɔwo le xose mɛ shigbe leci yí mí wɛwɛ do vɔ nɛnɛ. ¹² Nɔvunyɛwo mì biɔbiɔ so mí gbɔ be míwo le bu amɛ ciwo yí wawa edɔ le mí mɛ. Woxo yí kplɔnɔ mí le Axwetɔ mɛ yí gbe ɖonɔ afɔ afɔta nɔ mí. ¹³ Mí ɖo bubu nɔ wo sugbɔ yí a lɔn wo dó edɔ ci yí wo wawa ŋci. Mí nɔ agbe le fafa mɛ kodo míwonɔnɔwo. ¹⁴ Nɔvinyɛwo mì gbe biɔbiɔ so mí gbɔ be míwo le nú nɔ́ ɖyiɖɔnɔwo nɔ wo a mi ɖyiɖɔ wawa. Mí do eji exo nɔ vɔnvɔntɔnɔwo, a dó alɔ amɛ ciwo yí gbɔjɔ yí a xɔnɔ jigbɔnɖɛ ɖaɖa amɛshamɛ gbɔ. ¹⁵ Mí kpɔ nyuiɖe! Amɛɖe ŋgbe wa evon do evɔn tɔxu o. Vɔ le hweshahwenu ɔ, mí kpɔtɔ a wanɔ enyui ɖaɖa míwonɔnɔwo kodo amɛshaɛ gbɔ. ¹⁶ Eji le jɔnɔ mí tɛgbɛɛ, ¹⁷ Yí mí a wanɔ gbedoɖa mamimami. ¹⁸ Mí donɔ akpe nɔ mawu le nɔnɔmɛ ɖekpokpoi mɛ. Enu ciwo yí Mawu jijiɛ so mí gbɔ le míwo 'gbenɔnɔ kodo Yesu Kliso lɔ mɛ nɛ. ¹⁹ Mí ŋgbe xe emɔ nɔ́ gbongbɔn kokoɛ go. ²⁰ Mí ŋgbe gbalinɔ Mawu ŋɛ dotɔwo 'nyɔwo go. ²¹ Vɔ ɔ, mì gbe je enuwo pleŋ mɛ kpɔ yí a cán cí yí ²² nyɔ́ yí ze nɔ enuvɔn alɔkpa alɔkpawo pleŋ. ²³ Mawu ci yí nanɔ fafa amɛ le wɛɛ nɔ mí a nyi yito blebu. Lé sɔ́ ashi cɔ́n agbetɔ blebu ɖeka ɖeka jí, agbetɔ lɔ gbɔngbɔn, yi 'se kodo yi lankpu nɔ wo a nɔ́ sɛnsinɖe, nɔ ŋgbe va kṕ ehwɛ ɖe adó wo gbecigbe yí mìwo 'xwetɔ Yesu Kliso a trɔva o. ²⁴ Wo kando amɛ ci yí cán mí ji. É yí lɔ hé yí a wɛɛ nɔ mí. ²⁵ Nɔvinyɛwo, mí wa gbedoɖa do eta nɔ mìwo hɛnnɛ. ²⁶ Mí kpla ashi ekɔ no míwo nɔviwo yí a sɔ́ dó egbe nɔ wo. ²⁷ Ŋ ɖe kuku nɔ́ mí le Axwetɔ nyikɔ mɛ be miwo lé hlɛn wema cɛ nɔ ehamɛvi lɔwo pleŋ. ²⁸ Mìwo 'xwetɔ Yesu Kliso xomɛvu lé nɔ kodo mí.