¹ Ci yí etenɔnɔkpɔ mí va wú egan mì ɔ, mì vá sɔ́ gbeta mɔ mìwo ɖekɛwo a cí Atɛnu jugan mɛ ² yí dɔ Timɔte, mìwo nɔvi ɖaɖa mí. É nyí kpedonutɔ nɔ́ mì le Mawu 'dɔ mɛ yí mìwo kodo eyɛ bɔ donɔ Yesu Kliso 'ŋɛnyui lɔ. Mì dɔ́ɛ ɖaɖa mí gbɔ nɔ́ á va do ŋsɛn lanmɛ nɔ mí le gbɔngbɔn mɛ yí a dó ŋsɛn lanmɛ nɔ mí le xɔse mɛ. ³ Gahunnɔtɔmɛ ɔ, amɛɖe d'a tran emɔ nɔ́ aya ciwo yí é dukɔ ŋci o. Ɖó míwoŋtɔwo mí nya vɔ mɔ ayaɖuɖu yí nyí mìwo Klisotɔwo 'dɔ́. ⁴ Hwecinu yí mì le mí gbɔ ɔ, mì doŋkɔ yí nú nɔ́ mí mɔ mì a vá ɖu aya yí é gbe jɔ do jí ahan yí mí kpɔ. ⁵ É yí ná taɖo yí ci yí é va wu egan ŋ ɔ, ŋ dɔ Timɔte ɖaɖa mí gbɔ nɔ́ á vayi kpɔ lehanci yí míwo xɔse le do. Ŋ vɔnkɔ mɔ taŋfɔin ɔ, Legba vá te mí kpɔ yí edɔ ci yí mì wa a trɔ́ edɔgbali. ⁶ Vɔ ci yí Timɔte va mí gbɔ yí trɔgbɔ ɔ, é nú enyɔ nyuiwo nɔ́ mì soso míwo xɔse koɖo míwo lɔnlɔn nu. É nú nɔ́ mì hɛnnɛ mɔ́ mí kpɔtɔ ɖokɔ eŋui mì tɛgbɛɛ yí mìwo kpɔkpɔ drokɔ mí shigbe lehanci yí míwo kpɔkpɔ drokɔ mìwo cán dó ɛnɛ. ⁷ Nɔvinyɛwo, le mìwo 'yaɖuɖuwo koɖo mìwo xaxawo mɛ ɔ, mí na yí mì donɔ eji, nɔ́ xɔse ci yí mí ɖo ŋci. ⁸ Ecɛyɛ ɔ, ezo gbe ɖo lanmɛ nɔ mì; ɖó ɔ, mí kpɔtɔ le eju koɖo Axwetɔ góŋgóŋ. ⁹ Eji jɔkɔ mì sugbɔ do mí nu keke kpɔ́ mì de gbe nya lehanci yí mì a dó akpe lɔ nɔ́ mìwo Mawu dó o. ¹⁰ Ezan koɖo keɖe ɔ, mì wanɔ kuifan veviɖe mɔ́ Mawu lé kpedo mì nú nɔ́ mì a trɔva yí a vá kpɔ́ mí yí a kplá mí enu ciwo yí hwedo le míwo xɔse nu. ¹¹ Mìwo 'da Mawu ŋtɔ koɖo mìwo 'xwetɔ Yesu lé ɖe emɔ nɔ́ mì nɔ́ mì a sɛ́n ɛŋ a vá mí gbɔ. ¹² Mìwo 'xwetɔ lé wɛɛ nɔ́ mí a lɔn míwonɔnɔwo koɖo amɛshamɛ sɔwu ahan shigbe lehanci yí mì lɔn mí do ɛnɛ. ¹³ Gahunnɔtɔmɛ ɔ, á do ŋsɛn mí yí mí a kɔ le mìwo 'da Mawu ŋmɛ hwecinu yí mìwo 'xwetɔ Yesu a trɔgbɔva xexe lɔ mɛ koɖo yi 'mɛwo pleŋ. Eyi amɛɖe d'a kpɔ́ ehwɛ ɖe a dó mí o! Xoaɖyi!