MENSAH-ajg-x-dogbogbe_1th_text

ETA 2

¹ Nɔvinyɛwo, míwoŋtɔwo mí nya bé míwo gbɔ vava de gú go. ² Mí gbe nya bé wo dó aya nɔ mì yí zu mì le Filipi jugan mɛ. ci yí cukaɖa sugbɔ le Tɛsaloniki hɛnnɛ cán ɔ, Mawu ná yí mì gbé edɔn yí nú yi 'ŋɛnyui lɔ nɔ́ mí. ³ Ci yió mì biɔbiɔ so amɛwo gbɔ́ bé wo lé xɔ Mawu 'nyɔ lɔ jí se ɔ, d'é nyí enyɔ é nyi yí mì nunuɔ koŋ go yí d'é nyí susu baɖa ɖe yí mì sɔ́ nuinuiɛ go. Nɛnɛke d'é nyí amɛ yí mì blebleɛ do mɛ go nɛ. ⁴ Vɔ ɔ, enyɔ ciwo yí Mawu nú bé miwo lé nú yi mí nú. Ɖo ci yí é do mì kpɔ, e sɔ́ eŋɛnyuidodo doashi nɔ́ mì. Mì de xoxoɔ nuxu yí a je eŋ nɔ egbetɔwo go. Vɔ ɔ, mì xoixoiɛ yí a je eŋ nɔ Mawu ci yí kpɔnɔ ejimɛ nɔ amɛ. ⁵ Mì nya nyuiɖe be d'é nyí enumɛ yí mì vá vivi le mì gbɔ go yí d'é nyí va mì vá xo nuxu nɔ́ mì yí sɔ́ le ele ɖe jiɛ go. Mawu ŋtɔ a ɖe kunu nɔ mì. ⁶ Mí cán, amɛbuɖewo cán, mì de jí bé amɛɖe lé bu mì go. ⁷ Nɔ́ mî jí sasa ɔ, mì a wanɔ enu shigbe egawo nɛnɛ. Ɖó mì nyí Kliso 'mɛdɔdɔwo. Kpɔ́ mì de wɛɛ nɛnɛ go. Mì fá ecu yí nɔ míwo domɛ shigbe lehanci yí ajinɔ nɔnɔ eviɛwo gbɔ do nɛnɛ. ⁸ Mì lɔn mí sugbɔ kaka d'é nyí Mawu 'ŋɛnyui lɔ ɖekɛ yí mì jijiɛ a nú nɔ́ mí sasa go. Vɔ ɔ, mì le egbesɔsɔ a sɔ́ mìwo 'gbe ke. Nyɔnɔnuitɔ, mí ve nɔ́ mì sugbɔ. ⁹ Nɔvinyɛwo, mí ɖoɖoɔ eŋui lehanci yí mì wa edɔ sɛnŋsɛnŋɖe le mí gbɔ dó. Mì wa edɔ ezan kodo kede nɔ́ mì ŋgbe va biɔbiɔ enu mí hwɛhɔnnu cí yí mì le Mawu 'ŋɛnyui lɔ doɔ nɔ mí kodo axwa go. ¹⁰ Mìwo kodo Mawu a sɛ́n eŋ ɖe kunu nɔ mì bé ci yí mì nɔ míwo xɔsetɔwo gbɔ ɔ, mì nɔ agbe kɔkɔɛɖe jɔjɔɛɖe yí amɛɖe de kpɔ́ ehwɛ ɖe a dó mì go. ¹¹ Mí nya hɛnnɛ bé mì kplɔ mí pleŋ shigbe lehanci yí evida kplɔnɔ eviɛwo dó nɛnɛ. ¹² Mì donɔ eji exo nɔ mí yí donɔ ŋsɛn lanmɛ nɔ mì. Mì gbe biɔnɔ so mí gbɔ bé míwo lé nɔ agbe shigbe lehanci yí Mawu ci yí yɔ́ mí va yí 'fiɔɖuxu kodo yi klɛnklɛn lɔ mɛ ji do nɛnɛ. ¹³ Enu ci taɖo yí mìwo cán, mì gbe dodɔ akpe nɔ́ Mawu mamimami dó yí nyí kpɔ́ bé mí xɔ Mawu 'ŋɛ ci yí mì vá dó nɔ́ mí lɔ. Mì de xɔɛ do agbetwo 'nyɔkpakpa ji go. Vɔ ɔ, mí sɔɛ do enu ci yí é nyí jí nyɔnnɔnui, Mawu 'ŋɛ ci yí só Mawu ŋtɔ gbɔ́ nɔ mí. Enyɔ lɔ yí le edɔ waa le míwo ciwo yí xɔɛ ji se mɛ. ¹⁴ Nɔvinyɛwo, mí va sɔ kodo Mawuha ciwo yí le Yesu Kliso mɛ le Yuɖa 'kamɛ. Ɖo ɔ, mìwo 'jumɛvi ciwo yí de xɔ Yesu jí se ci yumɛ nɔ míwo can shigbe lahanci yí yuɖatɔ ciwo yí de xɔ yesu Kliso jise go ci yumɛ nɔ Klisotɔ ciwo yí le Ʒude 'kanmɛ do nɛnɛ. ¹⁵ Yuɖatɔ hɔnwo ciwo yí wu Axwetɔ Yesu kodo eŋɛdotɔ ɖewo yí gbe ci yumɛ nɔ mìwo can. Wo de wanɔ enu do Mawuyɔji go yí nyi ketɔwo nɔ agbetɔwo pleŋ. ¹⁶ Wo xexeɛ emɔ nɔ mì ŋgbe yí nu Mawu 'nyɔ lɔ nɔ́ amɛmanyi yuɖatɔwo nɔ́ Mawu a hwlɛn wo gan go. Enu hɔnwo na be wowo nuvɔnwo va su egbɔ do jí kaka ɖɔ́ kɔkɔ. Eyi le vɔvɔnu ɔ, Mawu wa dɔmɛzi do wo. ¹⁷ Nɔvinyɛwo, mìwo viɛ ɔ, mì só le mí gbɔ viɛ ɔ, d'é jiji go. Ci yí mì degbe le mí gbɔ o can ɔ, mìwo susuwo le mí ji. É dro mì sugbɔ yí mì tekpɔ zenɛniɖe be mí a trɔva mí gbɔ. ¹⁸ D'é nyi zeɖeka oyíde nyí zevz o, eyi mì ji be mì a trɔva mí gbɔ. Veviɖe enyɛŋtɔ Pɔlu ɔ, ŋ jinɔ be na trɔva mí gbɔ gbɔxwe yí legba xenɔ emɔ nɔ ŋ. ¹⁹ Ɖo mìwo can ɔ, mí na yí mì kpɔnɔ emɔ nɔ mawu kodo kankandoji. Mí gbe na yí mì le jijɔ kpɔɔ hɛnnɛ. Mìwo ɖu jí. Enu ci yí a va ná yí mì a kpɔ jijɔ gbecigbe yí míwo 'xwetɔ Yesu a va trɔ gbɔ nɛ. ²⁰ Nyao ɔ mí ná yí wo kannɔfu mì yí mì gbe kpɔnɔ jijɔ.