¹ Makilunga kamlambwa Nuhu, nyamandu sose sa msudunyi, na nyamandu sose sepungua naso sivekeri anduam na nacho iposhi safinenyi. Makilunga kadumia mukuma orikenyi na muringa ukavoka iuya guanda. ² Njoro sose na shilindi anduamu na madirisha va ruveu shikashingua na mbua ikaimuka na ikava. ³ Muringa o gharika ukavooka ilama kinina nina orikenyi. na mwisho o mifuri ighana jimu na makumi vatanu muringa ukalama guanda wose. ⁴ Safina ikaimuka ko miori saba, mufuri o ikumi na saba ya mori, uye ya ifumbu ja Ararati. ⁵ Muringa ukaendelea iomija guanda mpaka mori o ikumi. Mfuri okuvoka o mori, shilele sha mafumbu shikaonekana. ⁶ Ikafumia kee baada ya mifuri makumi vaana Nuhu karugua idirisha ja safina iya aleitobira. ⁷ Kaduma ikuru kuru jikaloola muringa ukaomija orikenyi. ⁸ Kavi kaduma itaa ilambwa kee muringa umeomija guanda ifuma kiamunyi kya orika, ⁹ kake itaa jileona andu kuimuka kudede kwake po, na jikauya safinenyi, ko kitevi muringa bado nyuveshikije orika luose. Kaghorua kuoko kwake, kamwiria na imudera safinenyi anduam nacho. ¹⁰ Kavedeja mifuri ingi saba kaduma kavi itaa ifuma safinenyi. ¹¹ Itaa jikapurunduka kiukwanyi. Lambwa! momunyi wake kuveode iraa ja mzeituni jivishishi jikorie. Ko ikyo Nuhu kamanya kee muringa umesia iomija guanda ya orika. ¹² Kavedija mifuri saba ingi na kaduma itaa kavi. Itaa jikauya kwake kavi. ¹³ Ikava kee mwaka o maghana sita na umu mori uja o kuvoka, mfuri uja okuvoka o mori, muringa nyuvekeri umeomija orikenyi. Nuhu kapungua mbiniko ya safina, kalambwa inja kaona kee, lambwa kiamu kya orika kuvekeri kumeomija. ¹⁴ Ko mori uja okavi, mfuri uja o makumi vavi na saba o mori, orika luvekeri lumeomija. ¹⁵ Makilunga kambia Nuhu, ¹⁶ ''Fuma nnja ya safina, wewe, mke wako, vana vapo va ghomi na vaka vavo andum na iguwe. ¹⁷ Vairie ufume navo nnja anduam na kila kiumbe kirukie kija kiode osese kija kikeri haingue ili kee shidime ileha na iva shifoje munu na shiumbe shirukie orika lose na ishaana na iongenjika orikenyi." ¹⁸ Ko ikyo Nuhu kafuma nnja anduam na vana vake va ghomi na mkaake na vaka va vana vake anduam nacho. ¹⁹ Na kija kyokyose kirukie, kija kipeafu, na ndeghe, na kija kipedambuka uye ya orika, ko mbari savo, vakaitija safina. ²⁰ Nuhu kashumba madhabahu va Yahwe. Kairi nyama sij siiliye na ndeghe sija sicha, na ifu na sadaka ye kora uye ya madhibahu. ²¹ Yahwe kadasha mdaho mucha uvorokiye nacho kadeda ngoonyi yake, "Ngapeitija mbiagho kavi guandapo ko kitevi kya mundupo, am nia savo ngoonyi savo nyi mbichwa ifuma vanina. Nama ngapenyamara kyo kyosekija kirukie, chakundu ngaleutapo. ²² Kigheri orika lulebaki, kigheri kyevaja mbeu na isambua, mbeho na murike, kirangasi na kigheri kya mbeho na murike, kirangasi na kigheri kya mbeho, msanyenyi na kiyo isho shipesiapo."