¹ Yahwe kambia Nuhu, igwe na numbaapo vose, ingie nyi safinenyi, ko kitevi ngaona iguwe nyiuode haki mbele yaakwa ko kishaoki. ² Na kila nyamandu iliye upecha naso saba sa ghomi na saba sa vaka. Na ko nyamandu silailiye, ende sivi sivi, sa ghomi na sa vaka. ³ Na ndeghe sa angani, ende saba sa ghomi na saba sa vaka ili idera kishao kyavo orikenyi kose. ⁴ Ko kitevi mifuri saba ngapeende mbua ikave orikenyi ko mifuri makumi vaana msanyenyi na kiyo. Ngapenyamara kila kiumbe kirukie kija ngaleghumba oshangunyi lo orika." ⁵ Nuhu nyaleuta shose shija Yahwe alembia. ⁶ Nuhu nyaveode umuri o miaka maghana sita kigheri kyo gharika icheje orikenyi. ⁷ Nuhu, vana vake ghomi na vaka vake na vaka va vana vake valeingia safinenyi anduam ko kitevi kya muringa o gharika. ⁸ Nyamandu sija siiliye na nyamandu sija silailiye, na ndeghe, na kija kipeafu guanda, ⁹ Vavi vavi ya ghomi na ya vaka vakacha ko Nuhu na vakaingia safinyeni, chakundu Makilunga alembia Nuhu. ¹⁰ Ikava kudo baada ya mifuri saba, muringa o gharika ukacha orikenyi. ¹¹ Ko mwaka o maghana sita o maisha va Nuhu, ko mori uja o kavi, ko mfuri uja o ikumi na saba ya mori, mfuri icho njoro sase sa shilindi shikuu sikabarika na irughuka, na madirisha va ruveu vakarughuka. ¹² Mbua ikavoka ikava orikenyi ko mifuri makumi vaana msanyenyi na kiyo. ¹³ Ko mfuri icho Nuhu na vana anduam Shem, Ham, na Yafethi na muka o Nuhu, na vaka varadu va vana va Nuhu anduam valeingia safiuenyi. ¹⁴ Valeingia anduam na kila nyamandu va msudunyi ko namna ake, na kila namna ya ndeghe ko namna yake, na kila namna ya kiumbe kiode makungo. ¹⁵ Shivi shivi ko kila kiode osese hakyo kiode mwoma o ruka kilecha ko Nuhu na kikaingia safinenyi. ¹⁶ Nyamandu sileingia sivekeri sa ghomi nasa vaka ko sose siode osese, sikaingia cha mbele Makilunga alembia. Naiho Yahwe kavashingia moongo. ¹⁷ Naiho gharika ikaichura orikenyi ko mifuri makumi vaana, na muringa ukaongerijika na ite shua safina uye ya orika. ¹⁸ Muringa ukashikija chee orika loose, na safina ikaelea uye ya kiamu kya muringa. ¹⁹ Muringa ukaongerijika munu orikenyi mpaka mafumbu vose valehiye mpaka ipo uye vakashikijuwa. ²⁰ Muringa okaongenjika dhiraa ikumi na sitanu uye ya shilele sha mafumbu. ²¹ Shindo shose shirukiye shekedambuka uyee ya orika shikapa, shipungwa, nyamandu sa msudunyi, shiumbe shirukiye shose shifoje shiledamia uye ya orika, andumu na vandu. ²² Shiumbe shose shiledamia uye ya orika, shija shekeomwa mwomwa urukie ko njia ya mbua, shilepa. ²³ Ko ikyo kija kirukiye nakyo kivekeri uye ya orika kilefutwa, ivokia vandu mpaka nyamandu nduwe, mpaka shija shiafua, na mpaka na ndeghe sa angani. Shose shileangamiswa ifuma orikenyi. Nuhu anduam na vaja vekeri safinenyi nyivo valeibaki. ²⁴ Muringa chu nyulema guanda ya orika ko kigheri kya mifuri ighana jimu na makumi vatanu.