¹ Kikava kigheri vandu valevooka iongenjika kiamunyi kya orika na vana va vaka vakaonika kwavo, ² vana va Makilunga veona kee vana kanyi va vandu nyi veburuaja. Valevairia iva vaka vavo, kila uja alemsambura. ³ Yahwe kaomwa, " ngoo yakwa ipedamia ko mundu po ndarasi, ko kuwa ivo nyi nyaa. Vapedamia miaka 120." ⁴ Mando madue vekeri kiamunyi kya orika kigheri kyo, na baada ya iho. Iki kilefumia kigheri ky vana va Makilunga vevadua vepu va vandu, na ipata vana navo. Iva vekeri vandu hodari kala, vandu vaode sifa. ⁵ Yahwe kaona kee unyamari o vandu ofua orikenyi, nakee mawaso va ngoo yavo mfuri ose ikeendelea tu ko unyamari. ⁶ Yahwe kajuta ngiki amughumba mundu orikenyi, ikamuhusunisha ngoonyi yake. ⁷ Ko ikyo Yahwe kadeda, "Ngapemdichiria kwacha mundu nacho ngalemughumba orikenyi; mundu na nyamandu ndue, na shija sipeafua na ndeghe sa angani, ko kitevi ngahusunika kyaki ngalevaghumba." ⁸ Kake Nuhu kapata mbora ya okundo mesonyi va Yahwe. ⁹ Kuveode matukio vapemwada Nuhu. Nuhu nyavekeri mundu aode haki, na alaode amuilushie gholosi ya vandu ko kigheri kyake. Nuhu nyaledambuka na Makilunga. ¹⁰ Nuhu kava papa o vana varadu va ghomi: Shem, Ham na Yafeti. ¹¹ Orika lulenyamarika mbele sa Makilunga, no ikaichura unangua olodo. ¹² Makilunga kaona orika, lambwa, luvekeri, lume marika, ko kitevi vose vaode osese vavekeri vamenyamarika njia savo orikenyi. ¹³ Makilunga kambia Nuhu, 'Ngameo kee luaha nyikigheri kya mwisho ko vose vaode osese, ko kitevi orika luichurie unangua-olodo ko kitevi kiyavo. Loi, ngapevanyamara ivo anduam na orika. ¹⁴ Tobira safina ya kidi kya mvinje ko ajili yapo. Tobira shichumba iposhi safinenyi, na ushishikije ko lami iposhi ndani na nnja. ¹⁵ Ikyo nyikyo upeuta: urefu o safina dhiraa maghana varadu, upana wake dhira makumi vatanu, idambu uye dhiraa makumi varadu. ¹⁶ Tobira ipaa ja safina, na umarije ko kipimo kya dhiraa ifuma uye ovari lumu. Vikya moongo ovari lo safina na utobire kahi ka guanda ngaliko ya kaavi na ya karadu. ¹⁷ Adanya, ngameshikya iende gharika ya muringa orikenyi, inyamara vaode osese ivo vadamije iposhi orikenyi ivo vaode muomwa o iruka ipo guanda ya ruveu. Kila kindo kyokose kikeri ipo orikenyi kipepa. ¹⁸ Kake ngapeimukiya loi agano jakwa na iguwe. Nyupeingia safinenyi, iguwe, na osese, shivi sha kila aina ushiende safinenyi, ili shidamie shirukie anduam na iguwe, sha vaka na sha ghomi. ¹⁹ Ko kila kindo kyokyose kirukie osese na shiade shivi shivi nashiingire safinenyi, ili shibaki shirukie anduamu nacho shavaka na sha ghomi. ²⁰ Na ndeghe ko namna yake, na nyamandu ndue ko namna yake, na kija kyokyose kipeafua guanda ko namna yake, shivi sha kila namna shipecha kwapo ili shiruke. ²¹ Sangiria kila aina ya kando kokose kija kipejuwa na ukidere, ili kee kive kando kapo na kyavo." ²² Ko ikyo Nuhu kuvika kudo. Ihana na shose shisa Makilunga ambia, nakudo alevika.