¹ Mndumi kalaa na mkake, Kapata mimba na kamfee Kaini. Kadeda, "Ngamfee mundumi ko msaada o Yahwe." ² Kavi kamfee munduavo Habili. Naiho Habili kava mwombia, kake Kaini nyaleva idema mdeme. ³ Ikava kee idema ja Kaini nyaleende shija adema ifuma guanda cha sadaka ko Yahwe. ⁴ Habili nacho, nyaleende ishao ja kuvoka ja nyamandu sake inuhie. Yahwe kamwidikija Habili anduam na sadaka yake, ⁵ kake Kaini anduam na sadaka yake Makilunga kailegha. Ko ikyo Kaini kailusha munu, na kiamu kyake kikakonjovana. ⁶ Yahwe kambia Kaini, "Ngikyo oilushia na ngiki kiyamu kyapo kyakonjovana? ⁷ Chakire kouta shicha, ngesa upepata kibalipo? Kake chakire ulapeuta kikeri kicha, sambi ikeri nyina kufumia mongo na nyina kulangua ikuitorie, kake ujikase uiide. ⁸ Kaini kambia Habili mwanavo. Hata kigheri jikeri mdemenyi, Kaini nyalekure uye ya Habili mwavo kamwangha. (ko kidedo kya kala sikededa, Kaini nyalembia Habili mwanavo," mave midemenyi na kigheri vakeri mdemenyi, Kaini nyalemdediya Habili mwanavo kamwagha). ⁹ Nacho Yahwe kamvesera Kaini, "Mwananu Habili nguku akeri?" Ngamanyapo. Ale inyi nyi muringi o mwenedu?" ¹⁰ Yahwe kadeda, "Ngikiyo outa ndakame ya mwananu inangidikira inyi ikefuma guanda. ¹¹ Na luaha nyotijiwa ng'oki iguwe ifuma guanda nayo yaruguwa momu wake iadija ndakame ya mwananu ifuma maokonyi vapo. ¹² Ko dema mdeme, ivokia luaha na iendelea ipekufunia igue oru luapopo. Nyi upeva mokambia kambia na mundu alaode kitiri orikenyi.'' ¹³ Kaini kambia Yahwe, "Adhabu yakwa nyi ndue kuliko oru lokwa lorimija. ¹⁴ Ko loi nyongichira mfuri chu o inu ifuma guandai na ngalaonuwa mbele ya oshangu lwapo. Ngapeva mokambia kambia na mundu ngalaode kitiri orikenyi, nacho oose apengiona nyapengiagha." ¹⁵ Yahwe kambia, "Ko kira mundu oose apekuagha Kaini, kisasis kipeva kwake mara saba." Nacho Yahwe kavikia mbuana Kaini, ili kee chakire mundu oose uja kamuona, mundu cho alamuaghe. ¹⁶ Ko ikyo Kaini kafuma mbele ya oshangu lo Yahwe na kandedamia orika lo Nodi, mashariki ya Edeni. ¹⁷ Kaini kammanya mkake nacho kapata mimba. Kamfee Henoko. Kashumba muri na iudikira ko rina ja mwanake Henoko. ¹⁸ Ko Henoko kaoneka Iradi. Iradi kamfee Mehuyaeli. Mehuyaeli kamfee Methushaeli. Methushaeli kamfee Lameki. ¹⁹ Lameki kadua vaka vavi: rina ja iu umu nyalelaghua Ada, na rina ja iu ungi nyalelaghua Sila. ²⁰ Ada kamfee Yabali. Iuu nyicho avekeri ndiavo na vaja vekedamia hemenyi navo vekenapunga nyamandu. ²¹ Munuavo nyalelaghua Yubali. Ichu nyavekeri ndiavo o vaja vechekava kinubi na filimbi. ²² Sila nacho kamfee Tubal Kaini, nyeesana shimbo sha shaba na menya. Msacha o Tubal Kain nyevekeri Naama. ²³ Lameki kavavia vaka vake Ada na Sila, adanyenyi iruu jakwa; inyuwe vaka va Lameki, adanyenyi kindo ngakideda. Ko kuwa ngame muagha mundu ko ingiumisa, mundu musoro ko ingipuchua. ²⁴ Chakire Kaini nyapelipiwa kisasi mara saba, nacho Lameki nyapelipisiwa kisasi mara sabini na saba." ²⁵ Adam kammanya mkake kavi, na kamfee mwana o ghomi. Kamlagha rina jake Sethi na kadeda, "Makilunga angininga mwana ungi o ghomi ko nafasi ya Habili, ko kitevi Kaini alemuagha." ²⁶ Mwana oo ghomi kaonika ko Sethi nacho kamlagha rina jake Enoshi. Kigheri ikyo vandu valevoka idikira rina ja Yahwe.