¹ Nayo njoka nyekeri nyiranguhie kuliko nyamandu singi sose sa kondeni nacho Yahwe Makilunga nyalevaghumba. Ambia mkaaoja, "Ale naloi chakundu Makilunga adeda, 'Kee mlaaje ndunda ifuma kidinyi kyokyose bustaninyi?" ² Mkaa uja kambia njoka, "Jipedima ija ndunda ifuma kidinyi kya bustanyi, ³ kake kyehusu itunda ja kidi kija kikeri gholosi ya bustani, Makilunga nyalededa, 'mlaje nama muulauwade, isho shingi mpeja." ⁴ Njoka ikambia mkaa uja, "Loi mpepapo. ⁵ Kitevi kyake Makilunga nyaichi kee mfuri mpeja meso vanu vaperughuka, na mpeva cha Makilunga, mpemanya shicha na shivichua." ⁶ Na mkaa oja kaona kee kidi iki nyi kicha ko kando, na nyi kiorokiye mesonyi, na kee nyi kidi kikundikye ko mundu naranguhe, kairia kipande kya itunda kaja. Na kipande kingi kakidamadia miake ekeri nacho, nacho kaja. ⁷ Meso va vose vevavi vakarughuka, na vakamanya kee vakeri duhu. Vakashona mara va shidi anduam na vakatebira she kushikija ivo vavenyi. ⁸ Vakaichwa iriu ja Yahwe Makilunga akeeda bustanyi kigheri kya ki ukwanyi ruva jimeoloja ko ikyo mundumi na mkaake vakaova ivo vavenyi shidinyi sha bustanyi iova riso ja Yahwe Makilunga. ⁹ Yahwe Makilunga kamudikira mundumi na imbia, "nguku ukeri?" ¹⁰ Mundumi kadeda, "ngamekuichwa bustanyi, na ngakuogwa, ko kitevi ngavekeri duhu. Ko ikyo ngaogua." ¹¹ Makilunga kadeda, "Nyi unga akuvia kee nyuvekeri duhu? Luaha nyoja ifuma kidinyi kija ngalekuvia ulakije ndunda sake?" ¹² Mundumi kadeda, "Mukaa ulengininga nave nainyi, ncho alengininga ndunda ifuma kidinyikyo, nainyi ngaja." ¹³ Yahwe Makilunga kambia igue muka, " Ngikiyo iki ukiuta?" mkaa oja kadeda, "njoka yangilemba, nainyi ngaja." ¹⁴ Yahwe Makilunga kambia njoka, "Ko kitevi outa ijambo iji, otijua ng'oki igue kumonyi gholosi ya nyamandu sose sepungua na nyamandu sose sa msudunyi. Nyapeva oburumuka na ndeu uke dambuka, na maifu upeja ko mifuri yoose ya maisha vapo. ¹⁵ Ngapedera uvichwa kati yapo na mundumuka, na kati ya ushao wapo na ushao wake. Nyapekukava mudo wapo na igue nyupemada tutunu yake." ¹⁶ Na ko mundumuka kadeda, ngapeongenja uchungu wakati kye fee vana; nyupevaviwa kigheri kye fee vana. Ndakire yapo nyipeva ko miapo, kake nyapekuitorie." ¹⁷ Ko Adamu kadeda, "Ko kitevi nyoadanya iriu ja mkaapo, na koja ifuma kidinyi kija ngalekuvia, " ulaje ndunda sake', guanda yapata ng'oki ko kitevi kyapo; nyupeidia uya uode ivaviwa nyupeja kando ka guanda komifuri yapo yose maisha vapo. ¹⁸ A guanda nyipeshaa misha na ndighiri ko kitevi kyapo na nyupeja shidi sha mdemenyi. ¹⁹ Ko murike o kiamu kyapo upeja iboflo, mpaka ipa japo, ko ikyo nyulefuma maifunyi ko ikyo iguwe maifunyi upeuya." ²⁰ Mundumi kamdumbuja mkake rina jake nyicho Hawa ko kitevi nyavekeri mama o vose varukie. ²¹ Yahwe Makilunga katobira nguvo ya njonyi ko kitevi kya Adam na mkake na kavararika. ²² Yahwe Makilunga kadeda, "Luaha mundu chu avaacha ise luaha aichi shicha na shivichwa. Ko ikyo luaha aperuhusiwa iada ko kuoko kwakepo, na iiriya ndunda ya kidiki kya uchapo, na ija ili nadamie kavi ndarasipo." ²³ Ko ikyo Yahwe Makilunga kamusembera ifuma bostaninyi ya Edeni, na dambuke nandema guanda isa avekeri aleghumbiwa. ²⁴ Ko ikyo Makilunga kamdichira mundu chu nja ya bostani, na kadera kadera kerubi mashariki o bostani ya Edeni, na ipanga ja modo jipeghaluka ghaluka kose kose, ili iringa njia ye dambuka kidinyi kya ucha.