¹ Naiho ruveu na orika silesiija, na shiumbe shirukie shose shija shileichurusa ruveu na orika. ² Mfuri o saba Makilunga nyaleshika mwisho o uya wake uja ale uuta, na ko ikyo nyaletotona mfuri uja saba ifuma uyenyi wake oose. ³ Makilunga kaininga mbora mfuri uja o saba na kaitakasa ko kitevi ko mfuri icho nyaletotona ifuma uyenyi wake wose uja aleuuta ko ighumba. ⁴ Ishi shivekeri nyi shindo shehusu ruveu na orika, kigheri shileghumbua, ko mfuri uja Yahwe Makilunga aleghumba orika na ruveu. ⁵ Kuveode msudu o mdemenyi uvekeri orikenyipo na kubeode nama kidi kya mdemenyi kikeripo, ko kuwa Yahwe Makilunga nyavekeri ameidikija mbua ikave orikenyipo, na kuveode nama mundu apedema guandapo. ⁶ Kake okungu nyuleimuka uye ifuma orikenyi na ivikya muringa kyamu kyose kya orika loose lo guanda. ⁷ Yahwe Makilunga aleghumba mundu ifuma mavumbi va guanda, na imwofija mbuenyi muomwa ooruka na mundu kava kiumbe kirukiye. ⁸ Yahwe Makilunga nyalefuna bustani ngaliko ya mashariki, ya Edeni, na aja kamdera mundu uja alemughumba. ⁹ Ifuma guanda Yahwe Makilunga nyalevaja kila kidi kifume nakyo kivorokie na nyi kicha ko kando. Iki nyi anduam na kidi kya ucha nakyo kivekeri gulosi ya bostani, na kidi kye manya macha na mavichwa. ¹⁰ Dahu ikafuma nja ya Edeni naivikya muringa bustani. Na ifuma aja ukalekana na iva dahu siina. ¹¹ Rina ja dahu ya kuvoka nyi Pishoni. Iuu nyi uja uchedambuka idiya orika loose lo Havila, napo kuvode dhahabu. ¹² Dhahabu ya orika luja nyi njicha munu. Na kuode bedola no ighoo shohamu. ¹³ Rina ja dahu ya kavi nyi Gihoni. Iuu nyi uja uchedambuka idiya orika loose lo Kushi. ¹⁴ Rina ja dahu karadu nyi Hidekeli, nacho nyu chedambuka mashariki ya Ashuru. Dahu ya kaana nyi Frati. ¹⁵ Yahwe Makilunga nyaleiria mundu naimudera bustani ya Edeni nademe na iitunza. ¹⁶ Yahwe Makilunga nyalembia mundu nyalededa, "ifuma kila kidi kya bustanini upedima uje ko uhuru. ¹⁷ Kake ifuma kidi kye manya macha na mavichwa ulaje, ko kitevi mfuri uja upekija ifuma kidinyi kyo, nyupepa loi." ¹⁸ Nacho Yahwe Makilunga kadeda, "Chi kindo kichapo mundu icho nave amonyipo. Ngapemningia msaidizi nacho apenifaa." ¹⁹ Ifuma guanda Yahwe Makilunga kavika kila nyama ndu va kondeni na kila ndeghe sa angani. Nacho kashiende ko mundu chu nashione nyale shininga marina maki. Rina ja mundu ichu nyaledi kira kiumbe kirukie ko rina jake, na ijo jikava rina jake. ²⁰ Mundu cho nyaleninga nyamandu sose marina, na ndeghe sose sa angani, nakila nyamandu ya msudunyi. Kake ko mundu amonyi kuveghode msaidizi apemfaa ichopo. ²¹ Yahwe Makilunga kaende madiyo mashubu ko mundu icho, ko ikyo mundu icho nyalelaa. Yahwe Makilunga nyalefuna ovari luumu lo munducho kashinga anduaja afuna ovari. ²² Ko ovari luja Yahwe Makilunga nyalefuna ifuma ko mundu chuu, kaumba mundumuka na kamwende ko mundu cho. ²³ Mundumicho kadeda, "Ko luaha ichu nyi mafua ko mafua vakwa, na nyama ko nyama sakwa. Nyapedikirwa, 'mundumuka,' ko kitevi nyafunuwa ko mundumi. ²⁴ Ko ikyo mundumi nyapetia ndiye na maye, nyapeungana andumu na mkaake, na vapeva osese luumu. ²⁵ Vose vevavi vekeri duhu, mundumi na mkaake, kake valeona sonu po.