¹ Bsi Abraham nyavekeri msuri munu na Yahwe kamninga bora ko shindo shose. ² Abraham kambia isinga jake, nacho nyavekeri mudue kuliko vose va kanyi kwake na mudue o shose shija ashighode.'' Vikiya kuoko kwapo guanda ya kinama kiyakuwa ³ na ngapekuvika uape ko Yahwe, Makilunga o ruveu na orika, na upemuninga mwana kwa muka ifuma ko vanakanyi va Kanaani, gholosi yavo vaja ngadamije gholosi yavo. ⁴ Kake upedambuka orikenyi lokwa, na ko vandu vakwa, na imushighia mwanakwa Isaka muka." ⁵ Nacho isinga jake jikambia, "Kipeva kuda chakire muka cho apevadiana nainyi hadi orikenyi ilo? Ale ngapemurigha mwanacho orikenyi luja alefuma?" ⁶ Abraham kambia, "Hakikisha kee upemuurigha mwanakwa kujapo! ⁷ Yahwe, Makilunga o ruveu, usa alengifuna inyi ifuma numbenyi ya papa okwa na ifuma orikenyi lo vando du, na choo nyalengilarija ko kiapo malumu kambia, "Ngapevaninga vana va ushao wapo orika iluu, Ngapeduma malaika vakwa mbele yapo, na nyupepata muka ko kitevi kya mwanakwa ifumaa ipo. ⁸ Kake kikava mundumuka alapeva tayari, nyiho andu upeva huru ko kiapo kyakwa. Kya muhimu tu nyi kee ulache muurigha mwanakwa ipo." ⁹ Ko ikyo isinga jikavikiya kuoko kwake guanda ya kinama kya Abrahamu mundumi wake, nacho kaapa ko kindo ikii. ¹⁰ Isinga jikairia ngamia ikumi sa mundumi waake nacho kakure. Karia aina sose sa sawadi ifuma ko mundumi wake. Kakure na idambuka mkoa o Aramu Naharaimu, muri o Nahori. ¹¹ Kavailika indi ngamia inja ya muri karibu na irungu ja muringa. Kuvekeri kiukwanyi kigheri kisa vaka vachendedaha muringa. ¹² Nacho kambia, "Yahwe, Makilunga o mundumi okwa Abraham, nangijalie ngipate inu nacho nalore agano ja uaminifu ko mundumi wake Abraham. ¹³ Lambwa, ngaimukie iha kufui na njoro ya muringa na vepu va vandu va muri vakenacha chedaha muringa na ikafumia kee mpuu uja ngapembia. ¹⁴ Na kikava kee, mpuu uja ngapembia, ngakutereva sosa nungu yapo ili ungininge muringa onywa; nacho kangivia, nyua, na kee ngapenyosa na ngamia sapoo,' icho nyicho nave usa omsamburi mtumwa wapo Isaka. Ko njia iyo ngapemanya kee ongilorora agano ja uaminifu ko mundumi okwa." ¹⁵ Ikava kee nama alememarija ideda, lambwa, Rebeka kacha na nungu yake ya muringa makosonyi vake. Rebeka nyaleghonika ko Bethueli mwana o Milka, muka, o Nahori, munduavo o Abraham. ¹⁶ Mpuu chuu nyavekeri aghorokiye na nyavekeri bikira. Kuveode mundumi oose avekeri amelaa nachopo. Kashika irungunyi na ichuruja nungu yake, na idoja uye. ¹⁷ Nacho mtumwa uja kakambia ndemtorocha mpuu uja nacho kambia, "Ngatereva muringa kinina onyua ifuma nungunyi yapo." ¹⁸ Nacho kambia, "Nyua ngakutereva mundumi okwa," na cho kasosa nungu yake ko mooko vake, nacho kamuninga muringa onyua. ¹⁹ Iho akeri amemarija imuninga muringa, kambia, "Ngapedaha muringa ko kitevi kya ngamia sapo, mpaka siimarijike inyua. ²⁰ Iho kauta upesi kabusua muringa uja ukeri nungu nyi kiombonyi kija kye nyosiangamia, na kakambia kavi irungunyi kadaha muringa, kasininga muringa ngamia sake sose. ²¹ Mundu uja kamlambua mpuu uja akeri aghovie sau iona kee Yahwe atebirija njia yaake ana guai. ²² Ngamia semarija inyua muringa, muundu uja kaende pete ya mbua ya dhahabu iyode ilemeja ja nusu shekeli, na bangili sivi sa dhahabu ko kitevi kya mooko vake siode ilemeja ja shekeli ikumi, ²³ kamvesera, "Iguwe nyi mwana o aau? Ngivia ngakutereva, Ale nakuode mwanya ipo kanyi ko ndiyo ko kitevi kyedu kyepuumsika kio iki?" ²⁴ Nacho kambia, "Inyi nyi mpuu o Bethuel mwana o Milka, nacho alemfee ko Nahori." ²⁵ Kambia kavi, "Jiode malisho vafoje na kando, na ikeri nafasi ko ajili yapo yelaa kioki." ²⁶ Nacho mundu uja karama guanda na imtereva Yahwe. ²⁷ Kambia, "Abarikiwe Yahwe, Makilunga o mundumi odu Abraham, nacho aletija agano jake ja uaminifu naloi mbele ya mndumi okwa. Ko kitevi Yahwe nyangisongoja moja ko numbenyi ya vanduavo va mndumi okwa." ²⁸ Nacho mpuu uja kakambia na idambuka ndevavia vandu va numbenyi ya mae ko shindo shi shose shafumia. ²⁹ Nacho Rebeka nyaveode munduavo o ghomi rina jake nyicho Labani. Labani kakambia ko mundu uja avekeri bare barenyi kufui na irungu ja muringa. ³⁰ Nacho iona hereni ya mbuenyi anduam na bangili sija maokonyi va msacha ake na iichua shidedo shija sha Rebeka msaachake, "Ikiyo nyikiyo mundu uja angivia," Nyaledambuka ko mundu uja, Lambua, nyavekeri aimukie kufui na ngamia aja irungunyi ja muringa. ³¹ Labani kambia, "Njio, iguwe oningua mbora na Yahwe. Angiki oimuka injaa? Ngameanda numba, anduam na andu ko ngamia." ³² Ko iko mundu uja kaingia numbenyi na isosa misigo uye ya ngamia. Ngamia naso sikaningu kando, muringa ukafuma isanja madende vake anduam na madende va vandu vaja avekeri anduam navo. ³³ Vakaandaa kando mbele yake, nacho kadeda, "Ngapejaapo mpaka ngiambe kija ngauri kiamba." Ko ikyo Labani kambia, "Ambaa." Nacho ³⁴ kambia, "Inyi ngavekeri mtumwa o Abraham. ³⁵ Yahwe nyalemuninga mbora munu mndumi okwa na luaha nyaleva mundu mdue. Nyalemuninga nyamandu sepunga na nyamandu singi, hela, dhahabu, vatumwa va ghomi na vatumwa vavaka, anduam na ngamia na punda. ³⁶ Sara, muka omndumi okwa, nyalemfeja mwana mundumi okwa akeri msuri, na nyalemuninga mwanake kila kindo kija akiode. ³⁷ Mndumi okwa nyalengiapisha, ededa, "Ulachemduaja mwanakwa muka ifuma ko vepu Vakanaani, am ngaledamia kwavo. ³⁸ Badala ake, nyi lasima uende ko vandu vaja va kanyi ko papa okwa, nako vandodu, na uduwe muka ko ajili ya mwanakwa.' ³⁹ Nainyi ng'ambia mundumi okwa, nakipedima mundumuka icho naleghe ivadiana nainyi.' ⁴⁰ Nacho kangivia, Yahwe, usa ngakenaenda mbele yake, nacho apeduma malaika vake anduam na iguwe na upepata njia yapo, na iguwe upepata muka ko ajili ya mwanakwa ifuma gholosi ya vando du na ifuma mbarinyi ya papa okwa. ⁴¹ Kake nyupe na uhuru ko kiapo kyakuwa chakire oshika ko vando du navo valakuruhusu icha nacho. Nyiho andu upeva huru ko muma okwa. ⁴² Na inu ngashika irungunyi ja muringa, nainyi ngadeda, 'O Yahwe, Makilunga o mdumi okwa Abraham, ngakutereva chakire loi okusudia kiaro kyakuwa iva kiode ucha - ⁴³ lambua ngakeri iha ngaimukiye irungunyi ja muringa - na kive kee mpuu icho apecha chedaha muringa, icho ngapembia, "Ngatereva ungininge muringa kinina ifuma nungunyi yaapo nyinyue," mpuu icho apengivia, ⁴⁴ "Nyua, na ngapedahia ngamia sapo muringa sinyue" - nave nyicho usa omusamburia igue Yahwe, mwana o mundumi okwa." ⁴⁵ Ikava nama ngalamemarija ideda ngoonyi yakwa, Lambua, Rebeka kacha na nungu yake ikosonyi jake kasokiya guanda irungunyi ja muringa. Nainyi ng'ambia, "Ngalereva muringa nginyue.' ⁴⁶ Naho nacho kasosa hungu yake ikosonyi jake kangivia, "Nyua, na ngapesininga ngamia sapo muringa,' nainyi nganyua, nacho kasininga ngamia muringa. ⁴⁷ Nainyi ngamuvesera, 'Igue nyi mpuu ouu?' Kangivia, mpuu o Bethueli, Mwana o Nahori, usa milka alemfeja kwake.' Nainyi ngamvikia pete mbuenyi yake anduam na bangili maokonyi vake. ⁴⁸ Nainyi ngarama guanda ngamtereva Yahwe, na imuninga mbora Yahwe, Makilunga o mundumi okwa Abraham, usa alengisongoja ko njia yempata mpuu o vandu va ko mundumi okwa ko kitevi kya mwanake. ⁴⁹ Ko ikyo, jikava jikeri tayari imuutia rehema na loi, ngivienyi. Kake chekire lecho, ngivienyi, ili kee ngidime idambuka upande o kujo ana kumoso." ⁵⁰ Nacho Labani na Bethueli vakamjibu na imbia, "Kindo iki kyafuma ko Yahwe; jipedima ideda kwapo kidedo kyo kyose kivichua ana kichapo. ⁵¹ Lambumbua, Rebeka acho iho mbele yapo. Mwirie na mudambke, ili nandeva muka o mwana o mundumi wapo, chakundu Yahwe aleamba." ⁵² Mtumwa o Abraham eechuwa shidedo sho, karama amonyi guanda maifunyi ko imtereva Yahwe. ⁵³ Mtumwa kaende sha hela na shipande sha dhahabu, na nguvo, kamuningia Rebeka. Kamninga nacho munduavo na maye sawadi siode thamani. ⁵⁴ Icho amonyi na vandu vaja vekeri iho nacho vakaja kando na inyua. Vakadamia aja mpaka kio, na vetukuwa kitalang'a, kavavia, ngiruhusunyi ngidambuke ko mundumi okwa." ⁵⁵ Munduavo o ghomi na maye vakambia, mtije mpuu ichu nabaki naise ko mifuri mifui, cha mifuri ikumi. Baada ya iho apedima nadambuke." ⁵⁶ Kake nacho kavavia, mlangisuiye, ko kuwa Yahwe amengifanikishia njia yakwa. Ngiruhusunyi ngidambuke ko mundumi okwa." ⁵⁷ Vakambia, "Jipemudikira mpuu icho na jimvesere." ⁵⁸ Ko ikyo vakamdikira Rebeka na vakamvesera, "Ale upedambuka na mundu chuu?" Nacho kavajibu kavavia, "Ngapedambuka." ⁵⁹ Ko ikyo vakamdamada msacha ake na Rebeka, anduam na vatumishi vake va vaka veda mbuka njia andu am na vatumishi va Abraham na vandu vake. ⁶⁰ Vakamuninga mbora Rebeka, navo vakambia, "Mndodu, na uve maye o shiku, na makumi va shiku, ushao wapo upate imiliki moongo o vaja vapeilusha." ⁶¹ Nacho Rebeka kaimu kana, icho na vatumishi vake ko itala ngamia, navo vakamvadia mundu uja. Navo vatumishi vakamuiria Rebeka, na vakadambuka." ⁶² Kigheri ikiyo Isaka nyavekeri edamia Negebu, na nyavekeri tu kandi auyaa efuma Beerlahairoi. ⁶³ Isaka kadambuka indekusara ipo mudemenyi kiukuanyi. Nacho elambua kaona, na kigheri akelambua kuveode ngamia siikecha! ⁶⁴ Rebeka kalambua nacho kamuona Isaka, katola ifuma uye ya ngamia. ⁶⁵ Kambia mtumwa, "mundu ichu nyuunga akena anga kunu mudemenyi nacho nyakena chejiadija?" mtumwa kambia, "Nyi mundumi okuwa." Nacho Rebeka kairia shela yaake kakushikija. ⁶⁶ Mtumwaoja kambia Isaka shindo shose shija aleshiuta. ⁶⁷ Nacho Isaka kamuende hemenyi iya ya Sara maye nacho kamuiria Rebeka, nacho kava muka ake nacho kamu kunda. Ko ikyo Isaka kafarijika baada ya kipu kya maye.