¹ Ikava kee baada ya shindo sho Makilunga kampima Abraham. Kambia, "Abraham!" Abraham kambia, "Au ngakeri iha." ² Nacho Makilunga kambia, "Mwirie mwanapo, mwana po o kianya umukundiye, Isaka, udambuke nacho orika lo moria. Umufune cha sadaka ye kora uye ya mafumbu vaja usambure jimu, najo ngapekuvia." ³ Nacho Abraham katukwa kitalang'a aghera, kakava ipunda jake, kavairia vasoro vake vavi, anduam na Isaka mwanake. Katema inngu ko ajili ya sadak ye kora, nacho kapanga kiaro kiyedambuka andu Makilunga alembia. ⁴ Mfuri akaradu Abraham kalambua uye kaona andu kukeri uye. ⁵ Abraham kavavia vasoro vake, "Damienyi iha anduam na ipundaji, inyi na Isaka jipedambuka aja. Jipereva na ade jipeuya iha kwanu." ⁶ Nyiho Abraham kairia inngu ko kitevi kya sadaka ye kora kasivekia uye ya Isaka mwanake. Kuokonyi kwake kairia modo na kiandu; na vose ve vavi vakakure anduam. ⁷ Isaka kadeda na Abraham ndiye kambia, "Papa," nacho kadeda, "Eee mwanakwa." Kambia, "Lambua iuu nyi modo na inngu, Aaa imondo ja sadaka ye kora jeku?" ⁸ Abraham kambia, "Makilunga amonyi apejininga imondo ko kitevi kya sadaka ye kora, mwanakwa." Ko ikyo vakaendelea, vose ve vavi anduam. ⁹ Veshika anduaja Makilunga alembia, Abraham kashumba mazibahu aja nacho kalekeria inngu uye yake. Nacho kampunga Isaka mwanake, nacho kamlara uye ya mazabahu, uye ya inngu sija. ¹⁰ Abraham kaghorua kuoko kwake kairia kiandu ili na mwaghe mwanake. ¹¹ Nyiho malaika o Yahwe kamudikira ifuma ruveu nacho kambia, "Abraham, Abraham!" nacho kambia, "Inyi au iha." ¹² Kambia, "Ulaghoruwe kuoko kwapo ko msoro choo, nama ulaute kyokyose kyemuumisa, ko kitevi luaha ngaichi loi uchemwamini Makilunga, ko iona kee omuima mwanapo po, mwana o peepo, ko kitevi kyakuwa." ¹³ Abraham kalambua uye na lambua, numa yapo kuveode imondo ja ghomi jioduwa mbembe sake ngudunyi. Abraham kaenda kairia imondo jija cha sadaka ye kora badala ya mwanake. ¹⁴ Ko ikyo Abraham kalagha andu aja, Yahwe apefuna," Na kuchelaghua kudo mpaka inuu. "Uye ya ifumbu ja Yahwe ipefunua." ¹⁵ Malaika o Yahwe kamudikira Abraham ko mara ya kavi ifuma ruveu ¹⁶ nacho kambia - iki nyi muma o Yahwe, "Ko kitevi kya nafsi yakwa ngaapa kee ko kira outa ijambo iji, na ongiima mwanapo po, mwanapo o pekee, ¹⁷ loi ngapekuninga mbora, na ngapeongerija ushao wapo cha ng'eng'eri sa ruveu, na cha maifu vakeri ngemenyi ya olubalibalinyi na ushao wapo nyupemiliki miongo ya vavichwa vavo. ¹⁸ Idia ushao wapo njiorika sose sa orika vapeni ngua mbora ko kitevi nyotii iruu jakwa." ¹⁹ Nacho Abraham kavaghuja vasoro vake, navo vakakure vakadambuka anduam Beerisheba, nacho kadamia Beerisheba. ²⁰ Kikava kee baada ya shindo isho iutika Abraham nyaleviwa, "Milka amemfeja mwana, munduanu Nahori." ²¹ Iva vavekeri nyi usi mwonika o kuvoka, Busi mwanavo, Kemueli uja alemfee Aramu, ²² Kesedi, Hazo, Pildashi, Yidlafu, na Bethueli. ²³ Bethuel kamfee Rebeka. Iva vavekeri nyi vana vaja ve nane nacho Milka alevafee ko Nahori, munduavo na Abraham. ²⁴ Suria wake, nacho nyalelaghua Reuma, nacho kamfee Teba, Gahamu, Tahashi na Maaka.