¹ Yahwe kamuadanya Sara ko makini chakundu alembia, Yahwe kamuutia Sara chakundu alembia. ² Sara kapata mimba nacho kamfeja Abraham mwana o ghomi usurinyi wake, ko kigheri kija kija Makilunga alembia. ³ Abraham rina mwanake, nacho aleo nekiya kwake, na Sara, Isaka. ⁴ Abraham kamudina mwanake Isaka amesisa mifuri nane, chakundu Makilunga avekeri amembia. ⁵ Abraham nyaveoghode umri o miaka ighana jimu kigheri mwanake Isaka eghonika kwake. ⁶ Sara kambia, "Makilunga nyongiutia seko; kila mudnu kaishuwa nyapeseka anduam nainyi." ⁷ Nacho kadeda, "Nyunga apededa ko Abraham kee Sara apelea mwana, na luaha loi ngame mfeja mwana o ghomi ko usuri wake!" ⁸ Mwana kaleha mpaka kadumbujwa ionga, na Abraham kauta ndima nduwe mufuri uja Isaka aledumbuja ionga. ⁹ Sara kamwona mwana o Hajiri Mmisri, uja avekeri aleonekiya ko Abraham, kamrasa. ¹⁰ Ko ikyo kambia Abraham, "Mudchire mkaachu mtumwa anduam na mwanake: ko kitevi mwana cho o mukaa mtumwa apedima iva murisi anduam na mwanakwa Isaka." ¹¹ Ijambo ijo jikahusunisha munu Abraham ko kitevi kya kee nyi mwanake. ¹² Kake Makilunga kambia Abraham, "Ulahusunike ko kitevi kya msoro chuu, nako kitevi kya muka chuu mtumwa wapo. Adanya shidedo isho akededa Sara ko kindo ikiyo, ko kitevi kipeva kipeidia ko Isaka kee ushao wapo nyupelaghua. ¹³ Ngapemuuta nave mwana o uya ko orika, ko kitevi nyi ushao wapo." ¹⁴ Abraham katukwa kitalang'a aghera, kairia boflo na ndivi ya muringa, kamuninga Hajiri, kamveki ya ikosonyi jake, kafuna mundu musoro kamningia Hajiri nacho kavasembera. Hajiri kakure kadekiya olukung'unyi lo Beerisheba. ¹⁵ Muringa osiija ndivinyi kamtija msoro uja ngudunyi. ¹⁶ Nacho kakure kadamia kwacha kinina na msoro uja, kwacha chaandu pekumba mufi, chakundu alededa, "Ngalalambwe kipu kya mwana iho andu edamije emkabili, kafuna iruu jake kafurigha. ¹⁷ Makilunga kaichwa iruu jaa msorocho efugha, na malaika o Makilunga kamudikira Hajiri ifuma ruveu, kambia, "Ngikiyo kinakusumbua? Ulaogue ko kuwa Makilunga ameichwa ifugha ja msoro andu akeri. ¹⁸ Imuka umuimusane mwana, na umuvikie ngoo; am ngapemvika nave orika ludue." ¹⁹ Nacho Makilunga kashukwa meso va Hajiri, nacho kaona irungu ja muringa. Kaenda kadaha muringa, nacho kamninga uja nacho kanyua. ²⁰ Makilunga kava na msoro uja, nacho kaleha. Kava edamia olukung'unyi kava mundu olasa nyamandu. ²¹ Kadamia olukungunyi lo parani, na maye kamduaja muka ifuma Misri. ²² Ikava kee kigheri kija Abimeleki na Fikoli kamanda o jeshi jake kambia Abraham, kambia, Makilunga nyakeri anduam na igue ko isho shose ukeshiuta. ²³ Luaha ngiapia ko Makilunga kee upengiutia ovichuapo, nama mwanakwapo, nama nama ushao okwapo. Ngilora kokwa na ko orika luja uvedamije agano jija jija ja uaminifu najo ngalekulora iguwe." ²⁴ Abraham kambia, "Nga apa." ²⁵ Abraham nacho kamlalamikia Abimeleki ko kitevi kya irungu ja muringa najo vatumishi va Abimeleki valemsoka. ²⁶ Abimeleki kambia, "Ngamanya nyi unga aleuta kindo kyopo. Ulengivia torekeapo; na ngalejiichwa po ila nyinu." ²⁷ Ko ikyo Abraham kairia imondo na ng'umbe ya ghomi kamningia Abimeleki, na iva vevavi vakauta agano. ²⁸ Nacho Abraham kasambura mamondo va vaka saba vavenyi. ²⁹ Abimeleki kambia Abraham, "Ngikiyo maana ya mamondo iva va vaka saba vasa ovasmbura vavenyi?" ³⁰ Nacho kamujibu, "Mamondo iva va vaka saba upevaadija ifuma mookonyi vakwa, ili kee uve nyicho ushahidi kokwa, kee ngapekula irungu iji." ³¹ Ko ikyo kadikira andu aja Beerisheba, ko kitevi anduaja vose vevavi valeapa kiapo kimu. ³² Valeuta agano iha Bersheba, nacho Abimeleki na Fikoli, amri o jeshi, vakauya orika lo Vafilisti. ³³ Abraham kavaja kidi kya muhoya iho Beerisheba. Na aja kamtereva Yahwe, Makilunga o ndarasi. ³⁴ Abraham kabaki iva mughenu orika lo Vafilisti ko mifuri ifoje.