¹ Abraham kaoda kiaro kyefuma aja mpaka orika lo Negebu, nacho kadamia gholosi ya Kadeshi na Shuri. Kava mughenu akedamia Gerari. ² Abraham kadeda eveveda na mkaake Sara, "kee nyi msacha okwa." Ko ikiyo Abimeleki mangi o Gerari kaduma vandu vake vachemwiria Sara. ³ Kake Makilunga kamfumia Abimeleki kio ko iloswa, kambia, "Lambuwa, igue nyi upie ko kitevi kya muka icho omwiria, ko kuwa nyi muka o mundu." ⁴ Basi Abimeleki nyavekeri bado amemushikia ko ikyo kadeda, "Mndumi, aluaha le nopeagha orika luja luode haki? ⁵ Ng'amba nyicho amonyi alengivia, Sara nyi msacha ake?' Nacho Sara amonyi nalengivia, 'Keenyi munduavo.' Ngauta iki ko uadilifu o ngoo yakwa na ko maoko valaode ovichwa." ⁶ Nacho Makilunga kadeda nacho ko iloswa, "Loi, ngaichi kee nyouta ikyo ko ngoo ya uadilifu wapo, na inyi ngalekuima ulaute sambi kitevi kyakua ngimonyi. Nyikiyo maana ngalakuruhusu umwade. ⁷ Ko ikyo, muurighe mukaacho o mundu, ko kitevi munducho nyi muiroto. Apekuterevia, na upedamia. Kake ulamemurighe, umanye kee iguwe anduam navose vakeri va kwapo mpepa muose. ⁸ Abimeleki katukwa kitalang'a aghera kavadikira vatumishi vake vose vache kuake. Kavavia shindo shose, na vandu vaja vakaogua munu. ⁹ Nacho Abimeleki kamdikira Abraham kambia, "Angikiyo iki ujiutia? Nyi ko kitevi kiki ngakuutia sambi isa ong'iendie inyi na umangi okwa sambi nyi ndue? Nyongiutia inyi kindo nakyo kilainyarie kiutwa." ¹⁰ Abimeleki kambia Abraham, "Ngikyo kileku ningia igue iuta kindo iki?" ¹¹ Abraham kadeda, "Nyi ko kitevi ngalekusara kee kuode imiogua Makilunga ina kwanupo, na kura kee vapengiagha ko kitevi kya muka okwa.' ¹² Kura kee nyi loi nyi msacha okwa, mwanakanyi o papa okwa, kura chii mwanakanyi o mamapo; na nyicho aleutika iva muka okwa. ¹³ Kigheri Makilunga engisembera numbenyi ya papa na ienda kiaro ifuma andu idambuka andu kungi, ngalembia muka akuwa, ko kila andu jipedambuka, ulangilore ukundo wapo cha muka akwa guai: Ko kila andu jipedambuka, uambe ihusu inyi, "Nyi msaacha apo."" ¹⁴ Nyiho andu Abimeleki aleiria mamondo, kairi maksai, masinga va ghomi na vava vaka kamninga Abraham. Basi Abimeleki kamuurigha Sara, muka o Abraham. ¹⁵ Abimeleki kambia, Lambua, orika lokwa lukeri mbele yapo. Damia andu ko kose okunda." ¹⁶ Na ko Sara kambia, lambua, ngamuninga munduanu shipande kiku kimu sha hela. Nasho nyi ko kitevi kye shikija ikosa jojose japo mesonyi ko vose vakeri anduam na igue na mbele ya kila mundu usa omuvika nave na haki." ¹⁷ Nacho Abraham katereva ko Makilunga, Na Makilunga kamkira Abimeleki, mukaake, na vatumwa vake va vaka navo vakadima ipata vana. ¹⁸ Ko kilevi kya Yahwe nyekeri amevapunga vaka vose va numba ya Abimeleki iva iva vagumba ko kilevi kya Sara, muka o Abraham.